पुट्गड्मि 1

पुट्गड्मि

कलि गडि किय्वल

1 मोदोल बगवंतल कलि गडि कीतोर.

2 अस्के दर्तुरि रूप सेल्वक्ने सिम-सम मत्ता.

सम्दुर्ता येत पोरो सिकटि निन्चि मत्ता.

बगवंतना आत्मा अद येत पोरो अलदि तिरिसेर मत्ता.

मोदोडा दिवोस्ने - वेड्चि

3 अस्के बगवंतल, “वेड्चि आयना” इनेकेन वेड्चि आता.

4 अद वेड्चि बगवंतन चोकोट दिस्ता.

वेड्चितुन सिकटितल अलग कीतोर.

5 बगवंतल वेड्चितुन ‘दिहा’ इन्जेर सिकटितुन ‘रात’ इन्जेर पोरोल दोस्तोर.

रात आसि दिहा आतते, मोदोडा दिवोस आता.

रेंडवा दिवोस्ने - हाबर

6-7 बगवंतल, “येतुन पाकि किय्ले, उंदि बेय डगुर जागा नड्डुम आयना” इनेकेन अद येर पोरो अनि बूड पाके माता.

8 बगवंतल अद बेय डगुर जागतुन, ‘हाबर’ इन्जेर पोरोल दोस्तोर.

रात आसि दिहा आतते, रेंडवा दिवोस आता.

मूडवा दिवोस्ने - वत्ता बोमि, जाडि-पोदेलङ

9 बगवंतल, “हाबडुन बूड्ना येर उंदि जागा मीरे मासि, सरुता बोमि दिसना” इनेकेन दिस्ता.

10 बगवंतल अद सरुता जागतुन, ‘बोमि’ अनि मीरे माता येतुन ‘सम्दुर्क’ इन्जेर पोरोल्क दोस्तोर.

अव बगवंतन चोकोट दिस्तङ.

11-12 अस्के बगवंतल, “बोमिति!

विजा सिय्वलिक जाडि-पोदेलङ अनि तम्वा तम्वा जाति तीर काया-पंडि सिय्वलिक मरक पिरुसा” इनेकेन अद पिरुसीता.

अहन अव जाडि-पोदेलङ अनि तीर-तीर्दङ काया पंडिनङ मरक पिर्तङ. अव बगवंतन चोकोट दिस्तङ.

13 रात आसि दिहा आतते, मूडवा दिवोस आता.

नाल्गवा दिवोस्ने - पोड्द, नेलेन्ज अनि सुकुक

14 बगवंतल, “रात-दिहतुन पाकि किय्ले, वेड्चि सिय्वलिक जोतिङ हाबडगा निव्डे मायना” इनेकेन निव्डे मातङ.

“अव जोतिङ गालुमकुन, दिनमकुन अनि सालकुन करि किय्ले, गवा मंदनुङ.

15 दर्तुरित पोरो वेड्चि सिय्ले, हाबडगा अव जोतिङ मिड्चेर मंदनुङ” इन्जेर बगवंतल हुकुम सीतोर.

ते अहन जर्ग्तङ.

16 बगवंतल सक्ति वालेक रंड जोतिङ इर्तोर: दिहतुन ताकुस्ले, वेले वेड्चि वाले जोति^* अनि रातुन ताकुस्ले, कमि वेड्चि वाले जोति.

^* इवे आय्वा सुकुकुन गिर वोर निव्डि कीतोर.

17-18 दर्तुरित पोरो वेड्चि सिय्ले, रात-दिहतुन वागि किय्ले, वेड्चि-सिकटितुन पाकि किय्ले, बगवंतल अवेन हाबडगा इर्तोर.

अव बगवंतन चोकोट दिस्तङ.

19 रात आसि दिहा आतते, नाल्गवा दिवोस आता.

अय्दवा दिवोस्ने - जिव्रस अनि पिटे-पुरड

20 बगवंतल, “येत रोपो मंवल डगुर चुडुर जिव्रस पग्रे मासि, निन्चि दानुङ अनि पिटे-पुरड पूरो दर्तुरित पोरोडा हाबडगा परिसेर मंदनुङ” इत्तोर.

21 बगवंतल येत रोपो मंवल तीर-तीर्दा जिव्रस अनि जीवते मेलिसेर मंवलिक सम्दिने निव्डि कीतोर.

अह्‍ने हाबडगा बदेना अद जाति वालेक परिवलिक पिटे-पुरडुन निव्डि कीतोर.

अव बगवंतन चोकोट दिस्तङ.

22 बगवंतल “पोरिक तेंड्सि, सम्दुर्ता येतगा निन्चि सोंट अनि पिटे-पुरडुन पूरो दर्तुरित पोरो पग्रे मासि सोंट” इन्जेर अवेन आसिर्वाद सीतोर.

23 रात आसि दिहा आतते, अय्दवा दिवोस आता.

बगवंतल कलित रोपो सम्दो गडि कीतोर

आरवा दिवोस्ने - जिव्रस अनि नरिमन्कलिर

24 बगवंतल, “बवेना अवेन जाति तीर डोर-जंवर, पुर्ग-बुसि अनि केडता जंवरतुन पूरो बोमित पोरो पग्रे मासि निन्चि दानुङ” इनेकेन अहन आतङ.

25 बगवंतल बवेना अव जाति तीर केडता जंवर, डोर-जंवरतुन अनि पुर्ग-बुसितुन दर्तुरित पोरो निव्डि कीतोर.

अव बगवंतन चोकोट दिस्तङ.

26 बगवंतल, “मावा रूप्ने मा दात नरिमन्कलिरकुन निव्डि कीकट.

वूर नरिमन्कलिर सम्दुर्ता जिव्रस, हाबडा पिटे-पुरड, दर्तुरित पोरोडा जंवर अनि पुर्ग-बुसि इंवलिक सम्दोन वागि कीनिर” इत्तोर.

27 ते बगवंतल तंवा रूप्ने नरिमन्कलिरकुन निव्डि कीतोर.

मायनल-वेय्लोन तंवा दात निव्डि कीतोर.

28 अनि बगवंतल, “मिरट मरि-मियडुन जल्मा सीसि, दर्तुरि पूरो निन्चि, पग्रे मासि अदिकार तोहट अनि येता जिव्रस, हाबडङ पिटे-पुरडुन, दर्तुरित पोरो ताक्वलिक सम्दो जिव्रसुन वागि कीम्ट” इन्जेर वेह्‍चि, वूरकुन आसिर्वाद सीतोर.

29 बगवंतल, “इचुला!

मीकुन दर्तुरित पोरोडङ हरियेक विजा सिय्वलिक जाडि-पोदेलङ अनि हरियेक काया-पंडि पेडेक सिय्वलिक मरकुन सीसि वाड्तोन. इव मी साटि चंदि आसि दानुङ.

30 दर्तुरित पोरोडा सम्दो जंवरतुन साटि, वडिदे परिवलिक सम्दो पिटे-पुरडुन साटि, सम्दो पुर्ग-बुसितुन साटि, सम्दो जिव्रसुन साटि, जाडि अनि दुस्रोक हिर्वलिक मरक चारो आनुङ” इत्तोर.

अहन बगवंतल इत्ता तीर आता.

31 बगवंतल तना गडि कीता सम्दोत सूड्तोर.

अव बगवंतन चोकोट दिस्तङ.

रात आसि दिहा आतते, आरवा दिवोस आता.