Ʉvʉlanga ʉvʉpia nɨ ɨɨsi ɨmhia
21
Pambele nɨkavwagha ʉvʉlanga ʉvʉpia nɨ ɨɨsi ɨmhia,
ʉlwakʉva ʉvʉlanga vwa kwanda nɨ ɨɨsi ɨja kwanda fikasovaniike,
najɨ nyanja napwejɨkaale kange.
2 Nɨkalyagha ɨlɨkaaja ɨlyɨmɨke,
je Yelusalemu ɨmhia,
likwika kuhʉma kʉkyanya kwa Ngʉlʉve,
lɨlɨngʼhanɨsivue ndavʉle ʉmhɨnja jʉno vantogile kʉkʉmʉlɨngʼhania ʉvʉtolani.
3 Nɨkapʉlɨka ɨlɨsio ɨlɨvaha kuhʉma pa kɨtengo ɨkya kɨtwa liiti,
“Lolagha,
ʉvukalo vwa Ngʉlʉve vʉlɨ pakate pa vaanhu!
Ʉmwene ikukalagha palɨkɨmo na veene,
voope vivisagha vaanhu vaake,
ghwope ivisagha Ngʉlʉve ghwave.
4 Ʉmwene ilipulusia amasosi ghaave ghooni.
Avaanhu navifwisagha nambe kusukunala,
navilɨlagha nambe kuuva nʉ vʉvafi,
ʉlwakʉva isa mʼbʉkʉʉlʉ isio sikilile.”
5 Pe jʉno ikukala pa kɨtengo ɨkya kɨtwa akati,
“Lolagha,
nivɨɨka fyoni kuuva fipia!”
Akambʉʉla akati,
“Lemba amasio agha,
ʉlwakʉva gha kʉhʉvɨlua kange gha kyangʼhaani.”
6 Akambʉʉla kange akati,
“Sivombiike!
Ʉne neene Alufa kange neene Omega,
kwekʉti neene vʉtengʉlɨlo kange neene vʉsililo.
Ʉmuunhu jʉno alɨ nɨ kyʉmɨlua nɨkʉmpeela amalenga vʉvʉle kuhʉma mʉ kɨnʼdwivu ɨkya malenga agha vwʉmi.
7 Ʉmuunhu jʉno ɨkʉsilema ingelo,
nɨkʉmpeela isio sooni,
ʉne niiva Ngʉlʉve ghwake ghwope iiva mwanango.
8 Neke avoghofi,
na vasila lwɨtɨko,
na vano vikʉnkalasia ʉNgʉlʉve,
na vabudi,
na vavwafu,
na vahavi,
na vano vikwɨmɨka ifihwani,
na vadesi vooni,
vitaghua mʉ lɨsʉmbe ɨlya mwoto nɨ salufaa jɨno jiviika.
Ʉvuo vuuva vwe vʉfue vwa vʉvɨlɨ.”
ƗYelusalemu ɨmhia
9 Pe akiisa ʉnyamhola ʉmo mʉ vanyamhola vala lekelalʉbale,
vano vakaale ni fivʉghaana fino fikamemile imhumuko sila lekelalʉbale isa vʉsililo,
akambʉʉla akati,
“Ghwise kʉno,
nɨkʉsoone ʉmhɨnja jʉno itapitolua,
ʉnʼdala ghwa Kakolo.”
10 Pe ʉMhepo ghwa Ngʉlʉve akanhoola kuhanga kufika pa kɨdunda ɨkɨvaha,
kange kɨtali.
Akasoona ɨlɨkaaja ɨlyɨmɨke ɨlya Yelusalemu likwika kuhʉma kʉkyanya kwa Ngʉlʉve,
11 livalatɨka ʉvʉvaha vwa Ngʉlʉve,
kange lɨkava lilengadɨka hwene mavue agha ndalama nyinga,
kange lilangaasa ghwene kɨlolelo.
12 Ɨlɨkaaja ɨlio lɨkaale nʉ lʉvɨɨka ʉlʉnya lʉvʉmba lʉkome kange lʉtali,
lɨkaale na malyango kɨjigho na ghavɨlɨ.
Amalyango aghuo ghakaale ghilolelelua na vanyamhola kɨjigho na vavɨlɨ,
kange kɨla mʉlyango pakyanya ghʉkalembilue ɨlɨtavua ɨlya kɨkolo kɨmo kuhʉma mʉ fikolo fila kɨjigho na fivɨlɨ ifya Vaisilaeli.
13 Ʉlʉbale ʉlwa kʉvʉdibulo mʉ lʉvɨɨka ʉluo pweghakaale amalyango ghatatu,
ʉlʉbale ʉlwa kʉvwehe amalyango ghatatu,
kʉmavemba amalyango ghatatu,
na kʉvʉseemo amalyango ghatatu.
14 Ʉlʉvɨɨka ʉluo lʉlyale nʉ lwalo ʉlʉnya mavue kɨjigho na ghavɨlɨ.
Amavue aghuo nɨlɨngɨ lɨkalembilue ɨlɨtavua lɨmo mʉ matavua gha vasungʼhua vala kɨjigho na vavɨlɨ ava Kakolo.
15 Ʉnyamhola jʉla jʉno akaale ijova nuune akaale nʉ lʉkwegho ʉlwa sahabu ʉlwa kʉpimila ɨlɨkaaja ɨlio na malyango ghaake nʉ lʉvʉmba lwake.
16 Ɨlɨkaaja ɨlio ʉvʉtali vwake imbale sooni se ine sikalɨngʼhiine.
Ʉnyamhola akapima ɨlɨkaaja lɨla,
ʉvʉtali lɨlyale kilomita imbilima ivɨlɨ ni filʉndo fine,
ʉvweleefu lɨlyale kilomita imbilima ivɨlɨ ni filʉndo fine,
ʉvwimo lɨlyale kilomita imbilima ivɨlɨ ni filʉndo fine.
17 Kange,
ʉnyamhola jʉla akapima ʉvʉkome vwa lʉvʉmba lʉno lwale lwe lʉvɨɨka lwa lɨkaaja lɨla.
Ʉvʉkome ʉvwa lʉvʉmba ʉluo vʉlyale imita fijigho ntanda ndɨɨkɨ.
Akapima mʉ fipimilo fino avaanhu vipimila jaatu mʉ mbombo saave.
18 Ʉlʉvʉmba ʉluo lʉkajengilue na mavue agha ndalama nyinga ghano ghilengadɨka.
Neke ɨlɨkaaja ɨlio lɨkajengilue ni sahabu inofu sino silangaasa hwene kɨlolelo.
19 Ʉlwalo ʉlwa lʉvɨɨka ʉlwa lɨkaaja ɨlio lʉkanosivue na mavue amanono ghano ghalɨ papinga.
Ɨlɨvue ɨlya kwanda mʉ lwalo lɨkaale litambʉlua yasipi,
ɨlya vʉvɨlɨ yakuti,
ɨlya vʉtatu kalikedoni,
ɨlya vʉne sumalidi.
20 Ɨlɨvue ɨlya vʉhaano lɨkaale litambʉlua salidoniki,
ɨlya ntanda akiki,
ɨlya lekelalʉbale kilisolito,
ɨlya lekelakwoni sabalajadi,
ɨlya budikalʉbale topasi,
ɨlya kɨjigho kilisopulaso,
ɨlya kɨjigho na kɨmo haikinto,
ɨlya kɨjigho na ghavɨlɨ ametisito.
21 Amalyango kɨjigho na ghavɨlɨ agha lɨkaaja ɨlio ghakatendilue na mavue agha ndalama nyinga ghano ghitambʉlua lulu,
kwekʉti ʉmʉlyango ghʉmo jaale lulu jɨmo!
Ʉnsevo ʉmʼbaha ʉghwa lɨkaaja ɨlio ghʉkatendilue ni sahabu inofu,
sino sikaale sivalatɨka hwene kɨlolelo.
22 Nanɨkajaghile ɨnyumba ɨnyɨmɨke ɨja kufunyila mʉ lɨkaaja ʉmuo,
ʉlwakʉva ʉMʉtwa ʉNgʉlʉve ʉNyangʉfu Sooni nʉ Kakolo je nyumba ɨnyɨmɨke ɨja kufunyila.
23 Mʉ lɨkaaja ɨlio nakʉlɨ vʉfumbue vwa lɨjʉva nambe ʉmwesi,
kuuti fimulikaghe,
ʉlwakʉva ʉvʉvaha vwa Ngʉlʉve vumulika,
najʉ Kakolo je taala.
24 Avaanhu va ɨɨsi sooni vighendagha mʉ lʉmuli ʉlwa lɨkaaja ɨlio,
na vatwa va ɨɨsi vikwingilagha mʉ lɨkaaja ɨlio kuleeta ifiinu fyave ifya ndalama nyinga.
25 Amalyango agha lɨkaaja ɨlio ghivisagha madindule ʉnsiki ghwoni,
ʉlwakʉva nakwejivisagha ɨkɨlo.
26 Avaanhu kuhʉma mʉ ɨɨsi isingi viletagha ʉvʉmofu vwave ni fiinu fyave ifya lʉtogo mʉ lɨkaaja ɨlio.
27 Neke nakwekɨlɨ nambe ɨkɨɨnu ɨkɨlamafu kɨno kilikwingila mʉ lɨkaaja ɨlio,
nambe jʉno ivomba isa kʉkalasia na kujova ʉvʉdesi.
Looli,
vilikwingila vano amatavua ghaave ghalembilue mʉ kɨtabu ɨkya vwʉmi ɨkya Kakolo.