Ɨkɨkogha ɨkya malenga agha vwʉmi
22
Ʉnyamhola jʉla akasoona ɨkɨkogha ɨkya malenga agha vwʉmi,
ghilangaasa hwene kɨlolelo,
ghihʉma pa kɨtengo ɨkya kɨtwa ɨkya Ngʉlʉve nʉ Kakolo.
2 Ɨkɨkogha ɨkio kɨkava kikwika pakate mʉ nsevo ʉmʼbaha ʉghwa lɨkaaja.
Imbale se ivɨɨlɨ isa kɨkogha ɨkio kweghakaale amapiki agha vwʉmi.
Amapiki aghuo ghikoma ifipeke fino fili papinga kɨjigho na fivɨlɨ.
Ghikoma ifipeke kɨla mwesi,
amatʉndʉ ghaake nkota ghwa kʉsosia avaanhu va ɨɨsi sooni.
3 Mʉ lɨkaaja ɨlio nakwekiliiva nambe kɨmonga kɨno kɨghunilue.
Ɨkɨtengo ɨkya kɨtwa ɨkya Ngʉlʉve nʉ Kakolo mwekiliiva mʉ lɨkaaja ɨlio,
na vavombi vaake vikʉmwɨmɨkagha ʉmwene.
4 Vikʉmwaghagha,
nʉjʉnge ivisagha nɨ lɨtavua lya Ngʉlʉve pa vweni vwake.
5 Ɨkɨlo nakwejivisagha kange,
nambe avaanhu kuuva nʉ vʉfumbue ʉvwa taala nambe ʉlʉmuli ʉlwa lɨjʉva,
ʉlwakʉva ʉMʉtwa ʉNgʉlʉve ɨkʉvamulikilagha,
voope vitemagha ifighono fyoni.
Amasio agha vʉsililo
6 Pambele ʉnyamhola jʉla akambʉʉla akati,
“Amasio agha,
gha kyangʼhaani kange gha kʉhʉvɨlua.
ɄMʉtwa ʉNgʉlʉve jʉno ɨkʉvapeela avavɨli ʉMhepo ghwake,
akansungʼhile ʉnyamhola ghwake kʉkʉvahʉfia avavombi vaake sino ndalʉve ndaani sivombeka ʉnsiki nʼdebe ghʉno ghukwisa.”
7 ɄYesu iiti,
“Pʉlɨkɨsia,
nikwisa ngʼhaningʼhaani,
afunyilue jʉno igadɨlɨla amasio agha vʉvɨli na masio ghano ghalembilue mʉ kɨtabu ɨkɨ.”
8 Ʉne ne Yohani nɨkasivwene na kʉkʉsipʉlɨka isi sooni.
Ye nɨsipʉliike na kʉkʉsivona,
nɨkafughama pa maghʉlʉ gha nyamhola jʉno ahʉfia isio,
neke nɨmwɨmɨke.
9 Ʉmwene akambʉʉla akati,
“Ʉleke kuvomba ʉluo,
ʉne nɨlɨ mʼbombi ndavʉle ʉve na vanino avavɨli na vano vigadɨlɨla amasio agha kɨtabu ɨkɨ.
Ʉmwɨmɨkaghe ʉNgʉlʉve mwene!”
10 Pe ʉnyamhola ʉjuo akambʉʉla akati,
“Nʉngafisaghe amasio agha vʉvɨli ghano ghalɨ mʉ kɨtabu ɨkɨ,
ʉlwakʉva ʉnsiki ʉghwa kʉvombeka isio sooni ghʉlɨ piipi.
11 Lɨno,
jʉno ivomba ʉvʉhosi afivombaghe ʉvʉhosi,
jʉno ivomba inyali afivombaghe inyali.
Ʉmʉgholofu afivombaghe isa vʉgholofu,
ʉmwɨmɨke afivombaghe isa vwɨmɨke.”
12 ɄYesu iiti,
“Lolagha,
nikwisa ngʼhaningʼhaani kʉkʉmhomba nʉjʉnge kulɨngʼhana ni mbombo saake.
13 Ʉne neene Alufa kange neene Omega,
kwekʉti neene vʉtengʉlɨlo kange neene vʉsililo.
Neene ghwa kwanda,
neene ghwa vʉsililo.”
14 Vafunyilue vano visuka amenda ghaave,
kuuti vɨtɨkɨsɨvue kulia ifipeke ifya mpiki ghʉla ʉghwa vwʉmi na kukwingila mʉ lɨkaaja kukilila mʉ malyango gha lɨkaaja ɨlio.
15 Neke avahavi,
avavwafu,
avabudi,
vano vikwɨmɨka ifihwani na vano vikeela fiijo kujova ʉvʉdesi navilikwingila mʉ lɨkaaja ɨlio,
vilijigha kʉnji ndavʉle imbua.
16 “Ʉne ne Yesu,
nɨnsungʼhile ʉnyamhola ghwango kʉkʉvoleka ʉmue imhola isi mʉ fipʉgha ifya vɨtɨki.
Ʉne neene ghwa kɨsina kya ntwa ʉDavɨdi.
Kange,
neene nhondue jɨno jivalatɨka palwakɨlo.”
17 ɄMhepo ghwa Ngʉlʉve nʉ Mhɨnja jʉno itolua viiti,
“Ghwise!”
Ʉmuunhu ghweni jʉno ipʉlɨka amasio agha,
atisaghe,
“Ghwise!”
Jʉno alɨ nɨ kyʉmɨlua iise,
jʉno ilonda,
iise anyue amalenga agha vwʉmi vʉvʉle,
kɨsila kʉghʉla.
18 Nɨkʉmpavɨla ʉmuunhu ghweni jʉno ipʉlɨka amasio gha vʉvɨli ghano ghalembilue mʉ kɨtabu ɨkɨ.
Ʉmuunhu angongelesie kɨmonga mʉ masio agha,
ʉNgʉlʉve ilikʉmpeela imhumuko sooni sino silembilue mʉ kɨtabu ɨkɨ.
19 Kange,
ʉmuunhu angavʉsie kɨmonga mʉ masio gha vʉvɨli ghano ghalembilue mʉ kɨtabu ɨkɨ,
ʉNgʉlʉve ivʉsia ɨlɨghavo lyake ɨlya fipeke mʉ mpiki ghwa vwʉmi.
Kange,
ivʉsia ʉvukalo vwake mʉ lɨkaaja lɨla ɨlyɨmɨke lɨno imhola saake silembilue mʉ kɨtabu ɨkɨ.
20 Jʉno ikwoleka imhola isi iiti,
“Kyangʼhaani,
nikwisa ngʼhaningʼhaani.”
Ameni.
Ghwise ghwe Mʉtwa Yesu!
21 Ʉlʉsʉngʉ lwa Mʉtwa ʉYesu lʉvisaghe numue mweni.
Ameni.