ɄSetano idindilua amaaka ɨmbilima jɨmo
20
Pambele nɨkamwagha ʉnyamhola ikwika kuhʉma kʉkyanya,
akolile ɨfungulilo ɨja kʉ liina kʉvʉfue nʉ nyololo ʉmʼbaha.
2 Akalɨkola ɨlɨjoka lɨla ɨlɨkʉʉlʉ lɨno litambʉlua Mhosi nambe Setano,
akalɨpinya nʉ nyololo amaaka ɨmbilima.
3 Akalɨtaagha kʉ liina kʉvʉfue.
Akadinda ʉmʉlyango ʉghwa kwingilila ʉkuo na kuvɨɨka ɨkɨvalɨlo kusigha lɨleke kʉkʉvasyanga kange avaanhu mʉ ɨɨsi,
kuhanga amaaka ɨmbilima ghasile.
Neke amaaka kyaghasilile,
anoghiile kudindulua ʉnsiki nʼdebe vʉvʉle.
4 Pe nɨkafyagha ifitengo ifya kɨtwa vikaliile avaanhu.
Avaanhu avuo vakapelua ʉvʉtavʉlɨlua ʉvwa kʉhɨgha.
Kange,
nɨkaghaagha amoojo gha vano vakadumulue amatu vwɨmɨla kukwoleka imhola sa Yesu nɨ lɨsio lya Ngʉlʉve.
Nɨkaghaagha na moojo gha vano navakalyɨmiike ɨlɨkanu lɨla nɨ kɨhwani kyake,
nambe kuvɨkua ɨkɨvalɨlo kyake pa vweni vwave nambe mʉ mavoko ghaave.
Avaanhu avuo vakasyʉka,
vakatema palɨkɨmo nʉ Kɨlɨsite amaaka ɨmbilima.
5 Ʉlʉsyʉko ʉluo lwale lwa kwanda.
Avafue avange vano vakasighiile navakasyʉka kuhanga ghafike amaaka ɨmbilima.
6 Vafunyilue,
kange vɨmɨke avaanhu vano vakasyʉsivue ʉlʉsyʉko ʉlwa kwanda.
Ʉvʉfue ʉvwa vʉvɨlɨ vʉsila ngʉfu kʉ veene,
viiva vatekesi va Ngʉlʉve nʉ Kɨlɨsite,
vitemagha nʉ Kɨlɨsite amaaka aghuo ɨmbilima.
ɄSetano ilitipulua
7 Amaaka ɨmbilima ghiliiva ghasilile,
ʉSetano ilidindulilua ahʉme mʉ ndinde.
8 Pe ililʉta imbale sooni isa ɨɨsi kʉkʉvasyanga avaanhu kuuti vaave valʉgʉ va Ngʉlʉve,
ɨɨsi isio sitambʉlua Gogu nɨ Magogu.a
ɄSetano ilikʉvakongʼhania avaanhu avuo kulua ɨlɨlʉgʉ,
viliiva vinga hwene lɨhanga lya kʉ nyanja.
9 Avaanhu avuo vilighenda imbale sooni isa ɨɨsi na kusyʉta ɨlɨkaaja lɨno vikukala avɨmɨke,
ɨlɨkaaja lɨno ʉNgʉlʉve alɨghanile.
Neke viliiva visyʉta,
ʉmwoto ghulikwika kuhʉma kʉkyanya,
ghulikʉvanyaanya lwoni.
10 Ghwope ʉSetano jʉno ɨkʉvasyanga,
ilitaghua mʉ lɨsʉmbe ɨlya mwoto ʉghwa salufa,
muno lɨtaghilue ɨlɨkanu lɨla nʉ mʼbɨli jʉla ʉghwa vʉdesi.
Ʉmuo vipumukagha pakɨlo na pamwisi,
ifighono fyoni.
Ʉvʉhɨghi ʉvwa vʉsililo
11 Pambele nɨkakyagha ɨkɨtengo ɨkya kɨtwa,
kɨkome kange kɨvalafu,
nɨkamwagha na jʉno ikalile pa kɨtengo ɨkio.
Ɨɨsi nʉ vʉlanga fikasovanɨka pamaaso ghaake,
nafikavoneka kange.
12 Nɨkavaagha avafue avavaha na vadebe,
vɨmile pavʉlongolo pa kɨtengo kɨla ɨkya kɨtwa.
Ifitabu fino filembilue imbombo sa vaanhu vooni fikavalʉlua,
nakɨ kɨtabu ɨkya vwʉmi kɨkavalʉlua.
Avafue avuo vakahɨghua kulɨngʼhana ni mbombo saave ndavʉle silembilue mʉ fitabu ifio.
13 Ɨnyanja jɨkavahʉmia avafue vano vakaale mʉnkate mʉ jeene.
ɄVʉfue na Kʉvʉlʉngʉ fikavahʉmia avafue vano valyale mʉnkate mʉ fyene.
Nʉjʉnge akahɨghua kulɨngʼhana ni mbombo saake.
14 Pambele ʉVʉfue na Kʉvʉlʉngʉ fikataghua mʉ lɨsʉmbe ɨlya mwoto.
Ɨlɨsʉmbe ɨlio vwe vʉfue ʉvwa vʉvɨlɨ.
15 Ʉmuunhu jʉno ɨlɨtavua lyake nalɨlembilue mʉ kɨtabu kɨla ɨkya vwʉmi,
ataghwagha mʉ lɨsʉmbe ɨlya mwoto.