ɄNgʉlʉve ighinisivua
19
Ye sikilile isio,
nɨkapʉlɨka ɨlɨsio kʉkyanya hwene lɨpʉgha lɨvaha ɨlya vaanhu vijova fiijo viiti,
“Aghinwaghe ʉNgʉlʉve!
Ʉvʉpoki nʉ vʉvaha ni ngʉfu
fihʉma kwa Ngʉlʉve ghwitu,
2 ʉlwakʉva ʉvʉhɨghi vwake vwa kyangʼhaani,
kange ihɨgha mʉ vʉgholofu.
Amhɨghile ʉmʉghendamwalu ʉmʼbaha,
jʉno ananginie ɨɨsi nʉ vʉghendamwalu vwake.
ɄNgʉlʉve ankopile,
ʉlwakʉva akungʼile ɨdanda ɨja vavombi vaake.”
3 Vakajova kange vakati,
“Aghinwaghe ʉNgʉlʉve!
Ɨlyosi ɨlya mʉkɨjʉʉva ʉmʉghendamwalu
jʉno ipia pa mwoto,
litogha kʉkyanya ifighono fyoni.”
4 Avagojo vala fijigho fivɨlɨ na vane ni fipelua fila fine vakafughama na kʉkʉmwɨmɨka ʉNgʉlʉve jʉno ikalile pa kɨtengo ɨkya kɨtwa,
vijova viiti,
“Ameni!
Aghinwaghe ʉNgʉlʉve!”
5 Nɨkapʉlɨka ɨlɨsio kuhʉma pa kɨtengo ɨkya kɨtwa lijova liiti,
“Mʉmpalaghe ʉNgʉlʉve ghwitu,
mwe vavombi vaake mweni.
Ʉmue mwe vano mʉkʉmwɨmɨka,
mwe vavaha na vadebe!”
6 Pambele nɨkapʉlɨka ɨlɨsio hwene lɨpʉgha lɨvaha ɨlya vaanhu vijova.
Ɨlɨsio ɨlio lɨlyale hwene lwʉjɨɨlo lwa malenga minga ghano ghikwika pa lɨsalala,
likuuta hwene lʉgulumo ʉlʉvaha ʉlwa fula liiti,
“Aghinwaghe ʉNgʉlʉve!
Ʉlwakʉva ʉMʉtwa ʉNgʉlʉve ghwitu ʉNyangʉfu Sooni,
atemile.
7 Tʉhovokaghe,
tululutilaghe na kʉkʉmʉghinia,
ʉlwakʉva ʉvʉtolani ʉvwa Kakolo vʉfikile,
nʉ nya kʉtolua ilɨngʼhanisie.
8 Ʉnya kʉtolua vampeliile amenda agha ndalama nyinga,
amenda amapala ghano ghivalatɨka,
mavalafu fiijo.”
Amenda agha ndalama nyinga ghihʉfia amaghendele amagholofu gha vaanhu avɨmɨke.
9 Ʉnyamhola jʉla akambʉʉla akati,
“Lemba amasio agha:
Vafunyilue vano vaghongolilue kʉ kɨkulukulu ɨkya vʉtolani vwa Kakolo.”
Akambʉʉla kange akati,
“Amasio aghuo ghano nɨjovile,
gha kyangʼhaani ghahʉmile kwa Ngʉlʉve.”
10 Pe nɨkafughama pa maghʉlʉ gha nyamhola jʉla,
neke nɨmwɨmɨke.
Ʉmwene akambʉʉla akati,
“Ʉleke kuvomba ʉluo,
ʉne nɨlɨ mʼbombi ndavʉle ʉve na vanino vano vikwoleka imhola sa Yesu.
Ʉmwɨmɨkaghe ʉNgʉlʉve!
Ʉlwakʉva ʉvwolesi vʉno akoliike ʉYesu,
se ngʉfu sino sikʉvalongosia avavɨli.”
Ʉmwangalɨla ɨfalaasi ɨmbalafu
11 Pambele nɨkavona ʉvʉlanga vʉdindwike.
Nɨkajaagha ɨfalaasi ɨmbalafu,
jʉno ajangaliile itambʉlua Mʉgholofu,
kange Ghwa Kyangʼhaani.
Ʉmwene ihɨgha na kulua ɨlɨlʉgʉ mʉ vwakyangʼhaani.
12 Amaaso ghaake ghakaale hwene ndape sa mwoto.
Kʉ mutu akafwalile ingeela nyinga.
Akalembilue ɨlɨtavua lɨno nakwale ʉmuunhu jʉno alɨmanyile,
looli alɨmanyile jʉjuo.
13 Akafwalile ʉmwenda ʉnsʉvike mʉ danda.
Ɨlɨtavua lyake ghwe Lɨsio lya Ngʉlʉve.
14 Amapʉgha gha vasikali ava kʉkyanya ghakamʼbɨngɨlɨla,
vafwalile amenda agha ndalama nyinga,
mapala kange mavalafu.
Vangaliile ifalaasi imbalafu.
15 Ʉmwene ʉjuo mʉ mʉlomo ghwake jihʉma ɨbamba ɨnhemi ɨja kʉvalefia avaanhu va ɨɨsi sooni.
Kange,
ɨkʉvalongosyagha ni ngʉfu.
Ihʉjagha isabibu mʉ liina ɨlya kʉhʉjɨla lɨno lɨmemile ɨngʼhalaasi ɨja Ngʉlʉve ʉNyangʉfu Sooni.
16 Pa mwenda ghwake na pa lɨfundo pakɨnena palyalembilue ɨlɨtavua ɨlɨ,
ɄNtwa ghwa vatwa,
kange Mʼbaha ghwa vavaha.
17 Pambele nɨkamwagha ʉnyamhola jʉmo ɨmile pa lɨjʉva,
ikemeela fiijo injuni sooni sino sipululuka kʉkyanya iiti,
“Mwise,
mʉkongʼhaane kʉ kɨkulukulu ɨkɨvaha ɨkya Ngʉlʉve.
18 Mwise mʉlie amafimba gha vatwa,
agha vavaha va vasikali,
na gha vaanhu avanya ngʉfu.
Mʉlie amafimba gha falaasi na gha vangalɨla falaasi,
na mafimba gha vaanhu vooni:
avakami na vavʉke,
avavaha na vadebe.”
19 Nɨkalyagha ɨlɨkanu lɨla na vatwa va ɨɨsi na valua lɨlʉgʉ vaave,
vakongʼhanile kulua ɨlɨlʉgʉ na jʉno angaliile ɨfalaasi palɨkɨmo na valua lɨlʉgʉ vaake.
20 Neke ɨlɨkanu lɨla palɨkɨmo nʉ mʼbɨli ghwake ʉghwa vʉdesi jʉno avombagha ifidegho vwɨmɨla ɨlyene,
vakaghomua.
Ʉmʼbɨli ʉjuo vwɨmɨla kuvomba ifidegho,
akavasyangile avaanhu vano vakavɨkilue ɨkɨvalɨlo ɨkya lɨkanu ɨlio na kukwɨmɨka ɨkɨhwani kyake.
Vooni ve vavɨɨlɨ vakataghua vajiighe vʉʉmi mʉ lɨsʉmbe ɨlya mwoto ʉghwa salufa.
21 Avange vano vakasighiile vakabudua nɨ bamba jɨno jɨkava jihʉma mʉ mʉlomo ghwa jʉno angaliile ɨfalaasi ɨmbalafu.
Injuni sooni sila sikalia amafimba ghala,
sikikuta.