Ɨlɨkaaja ɨlya Babeli lighua
18
Ye sikilile isio,
nɨkamwagha ʉnyamhola ʉjʉnge ʉnya vʉtavʉlɨlua ʉvʉvaha,
ikwika kuhʉma kʉkyanya.
Ʉnyamhola ʉjuo akava ivalatɨka,
ɨɨsi jooni jɨkamulikua nʉ lʉvalatɨko lwake.
2 Akajova fiijo akati,
“Lɨghwile!
Ɨlɨkaaja ɨlɨvaha ɨlya Babeli lɨghwile lwoni!
Lɨno,
vukalo vwa mapepo,
amapepo ghooni amalamafu,
vukalo vwa njuni sooni indamafu sino sikalasia.
3 Lɨghwile,
ʉlwakʉva avaanhu ava ɨɨsi sooni,
vaghalile ʉlʉhʉʉje ʉlʉkali ʉlwa vʉghendamwalu vwake,
avatwa va ɨɨsi vavwafwike nʉ mwene.
Avaghʉsia fiinu ava mʉ ɨɨsi,
vakavile ʉvʉmofu vwɨmɨla ʉvʉnoghelua vwake
vʉno vʉkililiile.”
4 Pambele nɨkapʉlɨka ɨlɨsio ɨlɨngɨ kuhʉma kʉkyanya liiti,
“Mwe vaanhu vango,
mʉvʉʉke pa mwene,
mʉleke pivɨngɨlɨla ʉvʉhosi vwake,
kuuti mʉleke kukwambʉlɨla ʉlʉpumuko lwake.
5 Ʉlwakʉva ʉvʉhosi vwake vwinga,
kuhanga vʉfikile kʉkyanya,
najʉ Ngʉlʉve naisyemua ʉvʉhosi vwake.
6 Mʉmpumusie ndavʉle avapumwisie avange,
mʉmpumusie kukila vʉle avombile ʉmwene.
Mʉtoole ɨkɨkombe kyake,
mʉmpeele ʉlʉhʉʉje ʉlʉkali
kukila lʉno akavapeliile avange.
7 Mʉmpumusie na kʉkʉmpeela ʉvʉvafi,
mʉ kɨghelelo kɨno ʉmwene ighiniagha
na kukunooma mʉ vʉmofu vwake.
Ʉlwakʉva ʉmwene ikughinia mʉ mwojo ghwake iiti,
‘Ʉne nɨlɨ Malikia,a
nɨtemile ɨɨsi.
Nanɨlɨ mfwɨle,
nanɨngave nʉ vʉvafi ndavʉle ʉmfwɨle nambe padebe!’
8 Mʉ ʉluo mʉ kɨghono kɨmo ikwʉpɨla imhumuko sooni:
ʉvʉfue,
ʉlʉsukunalo,
ɨnjala
na kunyanyua lwoni nʉ mwoto.
Ikwʉpɨla isio,
ʉlwakʉva ʉMʉtwa ʉNgʉlʉve
jʉno ɨkʉmhɨgha ghwe nya ngʉfu.”
9 Avatwa va ɨɨsi vano vakavwafwike nʉ mwene na kunenela ɨkyʉma palɨkɨmo nʉ mwene,
viliiva vikʉlyagha ɨlyosi lyake pano ipia,
vililɨla na kusukunala.
10 Vilikwɨma patali vikwoghopa imhumuko saake,
vilɨlagha vitisagha,
“Ɨga,
ɨga ghwe Babeli,
ghwe lɨkaaja lɨvaha,
ɨlɨnya ngʉfu!
Ʉvʉhɨghi vwako vwisile mʉ kavalɨlo kamo.”
11 Voope avaghʉsia fiinu ava mʉ ɨɨsi vililɨla na kusukunala vwɨmɨla ʉmwene,
ʉlwakʉva nakwale ʉjʉnge ʉghwa kʉghʉla ifiinu fyave.
12 Nakwale ʉghwa kʉghʉla isahabu,
ifiinu ifya kyʉma,
ifiinu fino filengadɨka,
inyambo isa ndalama nyinga,
amenda agha ndalama nyinga,
amenda amanya langi ɨnyavʉso na menda amalangali.
Ʉtʉpiki ʉtʉnya lʉnuusi ʉlʉnono,
ifikongʼholo fino fitendilue na mapembe na mapiki amanono,
fino fitendilue ni shaba,
nɨ kyʉma na mavue amanono.
13 Nakwale ʉmuunhu ʉghwa kʉghʉla idalasini,
ɨiliki,
ʉvʉfumba,
imanemane nambe ʉvʉbani,
ʉlʉhʉʉje,
amafuta agha miseituni,
ʉvʉtine ʉvʉnofu,
ɨngano,
ingʼombe,
ingʼholo,
ifalaasi,
igaale isa kʉkwesua ni falaasi,
nambe avakami.
14 Avaghʉsia fiinu vilikʉlɨvʉʉla ɨlɨkaaja lɨla kuuti,
“Ʉlʉvʉmbʉlɨlo lʉno ghwahʉvɨlagha lʉpulumwike.
Ʉvʉmofu nʉ lʉtogo lwako fisovaniike,
nʉngafyaghe kange.”
15 Avaghʉsia fiinu vano vakakavile ʉvʉmofu kukilila ʉmwene,
vilikwɨma patali,
vikwoghopagha imhumuko isio,
vilɨlagha na kusukunala.
16 Kange vitisagha,
“Ɨga,
ɨga ghwe lɨkaaja lɨvaha!
Ghwe jʉno vakʉfwasisie amenda agha ndalama nyinga,
amenda agha langi ɨnyavʉso
na menda amalangali.
Vakʉtogile ni fiinu ifya sahabu,
ni fya mavue ghano ghilengadɨka
ni nyambo isa ndalama nyinga.
17 Mʉ kavalɨlo kamo keene
ʉvʉmofu vwako vwoni vʉtipulue.”
Avaanhu vooni vano vighendesia ingalava na vano vikyʉla ni ngalava,
na vano vivomba ɨmbombo mʉ ngalava,
na vange vooni vano vikava ifiinu vwɨmɨla ingalava,
vilikwɨma patali.
18 Viliiva vikʉlyagha ɨlyosi lyake pano lipia,
vililɨla kyongo vitisagha,
“Nalɨghelile kuvoneka ɨlɨkaaja ɨlɨngɨ ndavʉle ɨlɨkaaja ɨlɨvaha lɨla!”
19 Avaanhu avuo vikutikulilagha ɨlɨngʼhʉnde kʉ matu ghaave,
vilɨlagha na kusukunala vitisagha,
“Ɨga,
ɨga ghwe lɨkaaja lɨvaha!
Ɨlɨkaaja lɨno avaanhu vooni avanya ngalava mʉ nyanja
lɨvapeleliile kuuva vamofu.
Lɨno,
mʉ kavalɨlo kamo keene lɨtipulue lwoni.”
20 Mʉhovokaghe ʉmue mwe vano mukukala kʉkyanya,
mwe vɨmɨke,
mwe vasungʼhua na vavɨli!
Ʉlwakʉva ʉNgʉlʉve amhɨghile
vwɨmɨla sino alyavavombiile ʉmue.
21 Pambele akiisa ʉnyamhola ʉnya ngʉfu,
akinula ʉlwala akataagha mʉ nyanja,
akajova akati,
“Ɨlɨkaaja ɨlɨvaha ɨlya Babeli
lilitaghua kʉ ngʉfu enendɨɨkɨ
na kusovanɨka lwoni.
22 Mʉ lɨkaaja ɨlio namʉlapʉlɨkɨka nambe padebe
ɨlɨsio lya vano vikwɨmba,
avakʉva finanda,
avakʉva magombo,
avakʉva filongilongi nambe avakʉva lʉkelemo.
Naalavoneka nambe lʉsiku mʉlyʉve
ʉmuunhu jʉno itenda ifiinu.
Nambe kupʉlɨkɨka ʉmuunhu ihavʉla pa lwala!
23 Nakʉlavoneka nambe lʉmuli lwa taala.
Nambe ɨkɨluulu ɨkya vʉtolani,
nakɨlapʉlɨkɨka mʉlyʉve
Luliiva enendɨɨkɨ kʉlyʉve,
ʉlwakʉva avaghʉsia fiinu vaako
valyale vavaha mʉ ɨɨsi,
ɨɨsi sooni sisyangilue nʉ vʉhavi vwako.
24 Mʉ lɨkaaja mʉlyʉve jɨvoniike ɨdanda ɨja vavɨli nɨ ja vɨmɨke,
nɨ ja vaanhu vooni vano vabudilue mʉ ɨɨsi.”