Ʉmʉghendamwalu ʉmʼbaha nɨ lɨkanu ɨlɨlangali
17
Pambele akiisa ʉmo mʉ vanyamhola vala lekelalʉbale vano vakaale ni fivʉghaana fila lekelalʉbale,
akajova nuune akati,
“Ghwise kʉno nɨkʉsoone vʉle ahɨghilue kupumuka ʉmʉghendamwalu jʉla,
jʉno lye lɨkaaja lɨno lɨjengilue pakate pa fikogha finga.
2 Avatwa va ɨɨsi vavwafwike nʉ mʉghendamwalu ʉjuo,
voope avaanhu ava mʉ ɨɨsi vaghalile ʉvʉghendamwalu vwake.”
3 Pambele ʉMhepo ghwa Ngʉlʉve akanhoola kuhanga kufika kʉ lʉkʉve.
Ʉkuo nɨkamwagha ʉmʉkɨjʉʉva ikalile pakyanya pa lɨkanu,
lɨlangali fiijo,
lɨnya matu lekelalʉbale na mapembe kɨjigho.
Ʉmʼbɨlɨ ghwoni lɨkalembilue amatavua agha kʉmʉligha ʉNgʉlʉve.
4 Ʉmʉkɨjʉʉva ʉjuo akafwalile amenda amanono amanya langi ɨnyavʉso nɨ ndangali.
Kange,
itogile ni fiinu ifya sahabu ni fya mavue ghano ghilengadɨka ni nyambo isa ndalama nyinga.
Mʉ lʉvoko akakolile ɨkɨkombe ɨkya sahabu kɨno kɨmemile ifiinu ifilamafu ifya kʉkalasia ni fiinu fino fihʉfia ʉvʉghendamwalu vwake.
5 Pa vweni lɨkalembilue ɨlɨtavua lɨno ʉmʉlʉvo ghwake nakyale kɨhʉʉgʉ kukagʉla.
Ɨlɨtavua ɨlio lye ɨlɨ,
Ɨlɨkaaja ɨlɨvaha ɨlya Babeli,
ghwe ngʼina ghwa Vaghendamwalu
ni ndamafu sino sikalasia mʉ ɨɨsi.
6 Nɨkavona ʉmʉkɨjʉʉva jʉla aghalile ɨdanda ɨja vaanhu avɨmɨke vano valyabudilue vwɨmɨla kukwoleka imhola sa Yesu.
Ye nɨkʉmwagha,
nɨkadegha fiijo.
7 Neke ʉnyamhola jʉla akati,
“Ghudegha kɨki?
Leke nɨkʉvʉʉle ʉmʉlʉvo ʉghwa mʉkɨjʉʉva ʉjuo nɨ lɨkanu lɨla lɨno lɨmpɨndile,
ɨlɨnya matu lekelalʉbale na mapembe kɨjigho.
8 Ɨlɨkanu ɨlio lɨno ʉlyaghile,
lɨlyale lyʉmi neke pambele lɨkafua.
Lɨno,
lɨlɨ piipi pihʉma mʉ liina kʉvʉfue na kulʉta kutipulua.
Avaanhu mʉ ɨɨsi vano amatavua ghaave naghalembilue mʉ kɨtabu ɨkya vwʉmi kuhʉma ʉNgʉlʉve ipela ɨɨsi,
vilidegha kʉkʉlyagha ɨlɨkanu ɨlio,
ʉlwakʉva ʉnsiki ghʉmonga kwelɨlyale,
pambele lɨkafua,
neke lilivoneka kange.
9 “Apuo lulondua ʉmuunhu avisaghe nʉ vʉkagʉsi.
Amatu ghala lekelalʉbale,
fye fidunda lekelalʉbale fino ikaliile ʉmʉkɨjʉʉva jʉla,
kange ve vatwa lekelalʉbale.
10 Mʉ vatwa avuo lekelalʉbale,
vahaano vafwile,
ʉntwa jʉmo ajiighe itema,
ʉntwa ʉjʉnge akyale pitema,
neke angiise,
itema ʉnsiki nʼdebe.
11 Ɨlɨkanu lɨla lɨno kwelɨlyale neke pambele lɨkafua,
ghwe ntwa ʉghwa lekelakwoni.
Ʉjuo ghwe ʉmo mʉ vatwa vala lekelalʉbale.
Ghwope ilʉta kutipulua.
12 “Amapembe ghala kɨjigho ghano ghwaghaagha,
ve vatwa kɨjigho vano vakyale kutema.
Neke avatwa ava,
vilipelua ʉvʉtavʉlɨlua ʉvwa kʉtema palɨkɨmo nɨ lɨkanu ɨlio kʉ nsiki ʉghwa kavalɨlo kamo keene.
13 Avatwa ava,
valɨ nʉ vʉfumbue vʉmo ʉvwa kʉlɨpeela ɨlɨkanu lɨla ingʉfu saave nʉ vʉtavʉlɨlua vwave.
14 Vivisagha palɨkɨmo nɨ lyene kulua nʉ Kakolo.
Neke ʉKakolo ilikʉvalema,
ʉlwakʉva ʉmwene ghwe Mʼbaha ghwa vavaha,
kange ghwe Ntwa ghwa vatwa.
Ʉmwene iliiva palɨkɨmo na vaanhu vaake vano avakemelile,
avasalwile,
kange vikʉmʼbombela vʉnofu.”
15 Ʉnyamhola jʉla akambʉʉla kange akati,
“Amalenga ghala ghano ghwaghaagha pano ikalile ʉmʉghendamwalu jʉla,
ghe mapʉgha gha vaanhu vooni:
avaanhu kuhʉma ɨɨsi sooni,
na vaanhu va njovele sooni.
16 “Amapembe kɨjigho ghano ghwaghaagha nɨ lɨkanu lɨla,
ghilikʉnkalalɨla ʉmʉghendamwalu jʉla.
Ghilitoola ifiinu fyake fyoni,
ghikʉmʉleka vʉfuula.
Ghililia ɨnyama jaake,
jɨno jɨsighiile ghilinyanyɨlɨla lwoni pa mwoto.
17 Luliiva enendɨɨkɨ,
ʉlwakʉva ʉNgʉlʉve avapeleliile avatwa avuo kɨjigho vaave nʉ vʉfumbue vʉmo ʉvwa kʉlɨpeela ɨlɨkanu ɨlio ingʉfu saave isa kʉtema.
Vifivombagha ʉluo kuhanga sino ajovile ʉNgʉlʉve,
sivombeke.
18 Ʉmʉkɨjʉʉva jʉno ghwamwagha,
lye lɨkaaja lɨla ɨlɨvaha lɨno litema avatwa vooni mʉ ɨɨsi.”