Ifivʉghaana lekelalʉbale ifya ngʼhalaasi ja Ngʉlʉve
16
Nɨkapʉlɨka ɨlɨsio ɨlɨvaha kuhʉma mʉ nyumba ɨnyɨmɨke ɨja Ngʉlʉve,
lɨkʉvavʉʉla avanyamhola vala lekelalʉbale liiti,
“Lʉtagha mʉkuungʼe mʉ ɨɨsi ɨngʼhalaasi ja Ngʉlʉve jɨno jɨlɨ mʉ fivʉghaana lekelalʉbale.”
2 Ʉnyamhola ʉghwa kwanda akalʉta,
akakuungʼa ɨkɨvʉghaana kyake mʉ ɨɨsi.
Ʉnsiki ghʉghuo avaanhu vooni avanya kɨvalɨlo ɨkya lɨkanu lɨla na vano vikwɨmɨka ɨkɨhwani kyake,
vakava na mavʉlasi ghano ghivava kyongo.
3 Ʉnyamhola ʉghwa vʉvɨlɨ akakuungʼa ɨkɨvʉghaana kyake mʉ nyanja.
Amalenga ghakahambʉka ghakava danda ndavʉle ɨdanda ɨja muunhu jʉno afwile.
Ifipelua fyoni mʉ nyanja fikafua.
4 Ʉnyamhola ʉghwa vʉtatu akakuungʼa ɨkɨvʉghaana kyake mʉ fikogha na mʉ finʼdwivu,
amalenga ghakahambʉka ghakava danda.
5 Pe nɨkapʉlɨka ʉnyamhola jʉno ikwɨmɨlɨla amalenga iiti,
“Ghwe Ngʉlʉve Mwɨmɨke,
kweʉle kange kweʉlyale,
ʉve ʉhɨghile isi mʉ vwakyangʼhaani.
6 Ʉlwakʉva avaanhu avuo valyakungʼile ɨdanda,
ɨdanda ɨja vaanhu vaako avɨmɨke na vavɨli vaako,
na jʉʉve ʉvapeliile ɨdanda,
vanyue.
Avuo vanoghiile ʉlʉpumuko ʉluo!”
7 Pe nɨkapʉlɨka ɨlɨsio kuhʉma pa kɨtekelelo liiti,
“Eena Mʉtwa Ngʉlʉve ghwe Nyangʉfu Sooni,
ghuhɨgha mʉ vʉgholofu na mʉ vwakyangʼhaani.”
8 Ʉnyamhola ʉghwa vʉne akakuungʼa ɨkɨvʉghaana kyake kʉ lɨjʉva.
Ɨlɨjʉva lɨkapelua ingʉfu isa kʉnyaanya avaanhu.
9 Avaanhu vakapia kyongo.
Neke navakalaata nambe kʉkʉmʉghinia ʉNgʉlʉve,
ʉlwene vakamʉligha kyongo napano ghwe nya vʉtavʉlɨlua vwa mhumuko isio.
10 Ʉnyamhola ʉghwa vʉhaano akakuungʼa ɨkɨvʉghaana kyake pa kɨtengo ɨkya kɨtwa ɨkya lɨkanu lɨla.
Ʉnsiki ghʉghuo ɨngʼhiisi jɨkakupikila ʉvʉtwa vwake.
Avaanhu vakava vikungʼenyengʼhania imili saave vwɨmɨla ʉvʉvafi vʉno valɨ navwo.
11 Neke navakalaata vwɨmɨla imbombo saave imbiivi,
ʉlwene vakamʉligha kyongo ʉNgʉlʉve ʉghwa kʉkyanya vwɨmɨla amavʉlasi ghano ghakava ghivava fiijo.
12 Ʉnyamhola ʉghwa ntanda akakuungʼa ɨkɨvʉghaana kyake mʉ kɨkogha ɨkɨvaha ɨkya Eufulati.
Amalenga ghala ghakʉʉma kuuti jɨɨve sɨla,
vakilaghe avatwa vano vihʉma ʉlʉbale ʉlwa kʉvʉdibulo.
13 Pambele nɨkaghaagha amapepo amalamafu ghatatu,
ghahwaniine na manyotu.
Amapepo aghuo ghakaale ghihʉma mʉ mʉlomo ghwa lɨjoka lɨla,
na mʉ mʉlomo ghwa lɨkanu lɨla,
na mʉ mʉlomo ghwa mʼbɨli jʉla ʉghwa vʉdesi.a
14 Aghuo ghe mapepo ghano ghivomba ifidegho fino fihʉfia ifivalɨlo.
Ghe ghano ghilʉta kʉ vatwa vooni mʉ ɨɨsi na kʉkʉvakongʼhania,
value ɨlɨlʉgʉ ɨkɨghono kɨla ɨkɨvaha ɨkya Ngʉlʉve ʉNyangʉfu Sooni.b
15 “Pʉlɨkɨsia!
Nilikwisa mʉ ngʼhenyemʉkɨla ndavʉle ʉmʉlyasi.
Afunyilue jʉno alɨ maaso na kulolelela vʉnono amenda ghaake kuuti aleke pighenda vʉfuula na kusʉʉka.”
16 Pe amapepo ghala ghakavakongʼhania avatwa avuo pamonga pano mʉ njovele ɨja Kɨebulania pitambʉlua Halimagedoni.
17 Pe ʉnyamhola ʉghwa lekelalʉbale akakuungʼa ɨkɨvʉghaana kyake kʉ vʉlanga.
Lɨkapʉlɨkɨka ɨlɨsio ɨlɨvaha kuhʉma pa kɨtengo ɨkya kɨtwa mʉ nyumba ɨnyɨmɨke ɨja Ngʉlʉve liiti,
“Sivombiike!”
18 Pe kʉkava nʉ lʉmuli lwa fula,
ʉlwʉjɨɨlo,
nʉ lʉgulumo lwa fula,
nɨ kɨsenyeena ɨkɨvaha kɨno nakɨghelile kuhʉmɨla kuhʉma ʉNgʉlʉve ipela ʉmuunhu.
19 Pe ɨlɨkaaja lɨla lɨkaghavɨka pa tatu.
Na makaaja ghooni amavaha mʉ ɨɨsi ghakanangɨka.
Ɨlɨkaaja ɨlɨvaha ɨlya Babeli ʉNgʉlʉve naakasyemilue kʉkʉlɨnywesia ɨkɨkombe ɨkya ngʼhalaasi jaake ɨmbaha.
20 Ɨkɨsenyeena kɨla kɨkapelela ɨɨsi sooni sino sili pakate pa nyanja sisovanɨke,
nafi fidunda fyoni nafikavoneka kange.
21 Ɨfula ɨja mavue amakome jɨkavatonyela avaanhu.
Ɨlɨvue lɨmo lyale ikiilo fijigho fihaano ndɨɨkɨ.
Pe vakava vikʉmʉligha kyongo ʉNgʉlʉve,
ʉlwakʉva vipumuka nɨ fula ɨjio ɨja mavue.
Ʉlʉpumuko vwɨmɨla ɨfula ɨjio lʉkaale lʉkome kyongo.