Imhumuko isa vʉsililo
15
Pambele nɨkalola,
nɨkakyagha ɨkɨvalɨlo ɨkɨngɨ kʉkyanya,
kɨvaha kange kya kʉdegha.
Nɨkavaagha avanyamhola lekelalʉbale vano vileeta imhumuko lekelalʉbale isa vʉsililo.
Imhumuko isio singavombeke,
ɨngʼhalaasi ja Ngʉlʉve jiiva jɨsilile.
2 Kange,
nɨkakyagha ɨkɨɨnu hwene nyanja,
jɨno jilangaasa hwene kɨlolelo jɨhasɨngʼhiine nʉ mwoto.
Mʉlʉbale mʉ kɨɨnu ɨkio vɨmile avaanhu vala vano valefisie ɨlɨkanu lɨla nɨ kɨhwani kyake na kukaana kuvɨkua ɨkɨvalɨlo ni mbalɨlo sila sino lye lɨtavua lyake.
Avaanhu avuo vakolile amagombo ghano vapelilue nʉ Ngʉlʉve.
3 Vikwɨmba ʉlwɨmbo ʉlwa Moose ʉmʼbombi ghwa Ngʉlʉvea nʉ lwɨmbo ʉlwa Kakolo viiti,
“Ghwe Ngʉlʉve ghwe Nyangʉfu Sooni,
imbombo saako mbaha kange sa kʉdegha.
Ʉve ʉlɨ Ntwa ghwa ɨɨsi sooni,
ghuvomba mʉ vʉgholofu na mʉ vwakyangʼhaani.
4 Ghwe Mʉtwa,
avaanhu vooni vakwoghopaghe,
vooni vakʉghiniaghe,
ʉlwakʉva veeve mwɨmɨke jʉʉve.
Avaanhu ava ɨɨsi sooni vikwisa kʉkʉkwɨmɨka,
ʉlwakʉva imbombo saako isa vʉgholofu
sivoneka pa vʉvalafu.”
5 Pambele ye sikilile isio nɨkalola,
nɨkavona ɨnyumba ɨnyɨmɨke ɨja Ngʉlʉve kʉkyanya jɨdindulilue.
Ɨnyumba ɨjio lye lɨheemab lɨno lihʉfia kuuti ʉNgʉlʉve pwale.
6 Avanyamhola vala lekelalʉbale vano vileeta imhumuko lekelalʉbale vakahʉma mʉ nyumba ɨnyɨmɨke jɨla.
Vakahʉma vafwalile amenda agha ndalama nyinga,
ghivalatɨka,
vipinyile ingoji inya sahabu mʉ fifuva fyave.
7 Ɨkɨpelua kɨmonga mʉ fipelua fila fine ifinya vwʉmi kɨkavapeela avanyamhola vala lekelalʉbale,
nʉjʉnge ɨkɨvʉghaana kɨmo ɨkya sahabu kɨno kɨmemile ɨngʼhalaasi ɨja Ngʉlʉve jʉno mwʉmi ifighono fyoni.
8 Mʉ nyumba ɨnyɨmɨke ɨja Ngʉlʉve lɨkamema ɨlyosi vwɨmɨla ʉvʉvaha vwa Ngʉlʉve ni ngʉfu saake.
Nakwale nambe jʉmo jʉno akanoghiile kukwingila mula,
kuhanga imhumuko sila lekelalʉbale isa vanyamhola vala sivombeke.