ɄKakolo na vaanhu vaake
14
Pe nɨkalola,
nɨkamwagha ʉKakolo ɨmile pa kɨdunda ɨkya Syoni,
palɨkɨmo na vaanhu imbilima kɨlʉndo ni mbilima fijigho fine ni mbilima ine (144,000).
Avaanhu avuo valembilue pa vweni ɨlɨtavua ɨlya Kakolo nɨ lɨtavua ɨlya Viise.
2 Nɨkapʉlɨka ɨlɨsio kuhʉma kʉkyanya hwene lwʉjɨɨlo lwa malenga minga ghano ghikwika pa lɨsalala,
likuuta hwene lʉgulumo lwa fula.
Lɨkava lipʉlɨkɨka hwene avaanhu vikʉva amagombo,
3 vikwɨmba ʉlwɨmbo ʉlʉpia pavʉlongolo pa kɨtengo ɨkya kɨtwa,
na pamaaso gha fipelua fila fine ifinya vwʉmi na vagojo vala fijigho fivɨlɨ na vane.
Nakwale jʉno akanoghiile kumanyɨla ʉlwɨmbo ʉluo,
looli va vano vikwɨmba,
avaanhu vala imbilima kɨlʉndo ni mbilima fijigho fine ni mbilima ine vano valyavangilue kuhʉma mʉ ɨɨsi.
4 Avaanhu avuo ve vano vikʉmʼbɨngɨlɨla ʉKakolo kwoni kʉno ilʉta.
Navavombile ʉvʉnyali ʉvwa kʉvwafuka,
ʉlwakʉva valɨ ndavʉle ʉmhɨnja jʉno naammanyile ʉmʉghoosi.
Vavangilue kuhʉma mʉ vaanhu avange,
kuuti lɨɨve lɨtekelo ɨlɨtasi kwa Ngʉlʉve na kwa Kakolo.
5 Navaghelile kujova ʉvʉdesi,
vasila nambe vʉviivi vʉmonga.
Avanyamhola vatatu vipʉlɨsia ɨmhola ja Ngʉlʉve
6 Pambele nɨkamwagha ʉnyamhola ʉjʉnge ipululuka kʉkyanya.
Ʉnyamhola ʉjuo akaale nɨ Mhola ɨNofu ɨja kʉvʉsila kʉsila ɨja kʉpʉlɨsia kʉ vaanhu vano vikukala mʉ ɨɨsi:
avaanhu ava ɨɨsi sooni,
ifisina fyoni,
ni njovele sooni.
7 Pe akajova fiijo akati,
“Mʉmwoghopaghe ʉNgʉlʉve na kʉkʉmʉghinia,
ʉlwakʉva ʉnsiki ʉghwa kʉhɨgha avaanhu ghʉfikile.
Mʉmwɨmɨkaghe jʉno apelile ʉvʉlanga nɨ ɨɨsi,
nɨ nyanja,
ni finʼdwivu.”
8 Ʉnyamhola ʉghwa vʉvɨlɨ ghwope akiisa akati,
“Ɨlɨkaaja ɨlɨvaha ɨlya Babeli lɨghwile lwoni!
Ɨlɨkaaja lɨla lɨvapeliile ʉlʉhʉʉjea lwake avaanhu ava ɨɨsi sooni vanyue vaghaale,
ʉlʉhʉʉje ʉlʉkali ʉlwa vʉghendamwalu vwake.”
9 Pe akiisa ʉnyamhola ʉghwa vʉtatu akati,
“Ʉmuunhu ghweni angalyɨmɨke ɨlɨkanu ɨlio nɨ kɨhwani kyake,
na kuvɨkua ɨkɨvalɨlo pa vweni nambe mʉ lʉvoko,
10 ʉjuo inyua ʉlʉhʉʉje ʉlʉkali ʉlwa ngʼhalaasi ja Ngʉlʉve lʉno nalʉhasɨngʼhiine na malenga.
ɄNgʉlʉve ɨkʉnkilivulila ʉlʉhʉʉje mʉ kɨkombe ɨkya ngʼhalaasi jaake,
anyue.
Kange,
ɨkʉmpumusia nʉ mwoto nɨ salufa jɨno jiviika.
Ɨkʉmpumusia pamaaso gha vanyamhola avɨmɨke na pamaaso gha Kakolo.
11 Ɨlyosi ɨlya mwoto ʉghuo ghʉno ghʉkʉvapumusia,
litoghagha kʉkyanya ifighono fyoni.
Avaanhu avuo viiva vasila lʉkeelo pakɨlo na pamwisi,
ʉlwakʉva valyɨmiike ɨlɨkanu nɨ kɨhwani kyake na kuvɨkua ɨkɨvalɨlo ɨkya lɨtavua lyake.”
12 Apuo avɨmɨke vavisaghe nʉ lugudo,
avuo vano vivɨngɨlɨla indaghɨlo sa Ngʉlʉve na kʉkʉmwɨtɨka ʉYesu.
13 Pe nɨkapʉlɨka ɨlɨsio kuhʉma kʉkyanya liiti,
“Lemba amasio agha:
Vafunyilue avaanhu vano kutengʉlɨla lɨno vifwɨla mwa Mʉtwa ʉYesu.”
ɄMhepo ghwa Ngʉlʉve iiti,
“Eena,
vipʉʉma kuhʉma mʉ mhumuko saave,
ʉlwakʉva vipelua ʉlʉvonolo vwɨmɨla imbombo saave inofu.”
Ʉmpeto ghwa ɨɨsi
14 Pambele nɨkalyagha ɨlɨfunde ɨlɨvalafu,
pakyanya pa lɨfunde ɨlio ikalile ʉmuunhu.
Ʉmuunhu ʉjuo ahwene ghwe Mwana ghwa Muunhu,b
afwalile ɨngeela ɨja sahabu kʉ mutu ghwake na mʉ lʉvoko akolile ʉvʉmego ʉvʉtemi fiijo.
15 Apuo ʉnyamhola ʉjʉnge akahʉma mʉ nyumba ɨnyɨmɨke ɨja Ngʉlʉve,
akajova fiijo kʉkʉmʼbʉʉla jʉno ikalile pakyanya pa lɨfunde iiti,
“Toola ʉvʉmego vwako ʉkapete,
ʉlwakʉva ʉnsiki ʉghwa kʉpeta mʉ ɨɨsi ghʉfikile.”
16 Pe jʉno ikalile pakyanya pa lɨfunde akajughuja ʉvʉmego vwake mʉ ɨɨsi na kupeta fyoni.
17 Pambele ʉnyamhola ʉjʉnge akahʉma mʉ nyumba ɨnyɨmɨke ɨja Ngʉlʉve ɨja kʉkyanya.
Ghwope akolile ʉvʉmego ʉvʉtemi fiijo.
18 Pe ʉnyamhola ʉjʉnge ʉmwɨmɨlɨli ghwa mwoto akahʉma mʉ kɨtekelelo.
Akajova fiijo kwa nyamhola ʉnya vʉmego ʉvʉtemi akati,
“Toola ʉvʉmego vwako ʉvʉtemi,
ʉkapete isabibu isa ɨɨsi,
ʉlwakʉva sivesile.”
19 Pe ʉnyamhola jʉla akajughuja ʉvʉmego vwake mʉ ɨɨsi,
akapeta isabibu isa ɨɨsi,
akavɨɨka mʉ liina ɨlɨvaha ɨlya kʉhʉjɨla,c
ɨliina ɨlio kɨhwanɨkɨsio kya ngʼhalaasi ja Ngʉlʉve.
20 Isabibu sikahʉjua mʉ liina kʉnji kʉ lɨkaaja.
Jɨkahʉma ɨdanda,
jɨkajelema jɨkiika hwene kɨkogha,
jɨkafika ʉvʉtali ikilomita filʉndo fitatu ndɨɨkɨ,
kange jɨkiika paasi pa lɨhanga ʉvʉtali ʉvwa mita jɨmo nɨ nusu.