Ɨlɨkanu ɨlya kwanda
13
Pambele nɨkalyagha ɨlɨkanu lihʉma mʉ nyanja,
lɨlɨ na mapembe kɨjigho na matu lekelalʉbale.
Kʉvʉsililo vwa mapembe aghuo,
nɨlɨngɨ lɨkaale nɨ ngeela ɨndebe.
Kʉ matu,
nʉghʉnge ghʉkalembilue ɨlɨtavua ɨlya kʉmʉligha ʉNgʉlʉve.
2 Ɨlɨkanu ɨlio lɨkahwaniine nɨ duuma,
amaghʉlʉ ghaake ghakaale hwene gha dubu,
ʉmʉlomo ghwake ghʉkaale hwene ghwa nyalʉpala.
Ɨlɨjoka lɨla lɨkalɨpeela ɨlɨkanu ɨlio ingʉfu nɨ kɨtengo kyake ɨkya kɨtwa nʉ vʉtavʉlɨlua ʉvʉvaha.
3 Nɨkavona ʉmutu ghʉmonga ʉghwa lɨkanu ɨlio hwene ghʉkalemiile kyongo,
lɨkaale lɨnya kʉfua,
neke ɨngʼhoongʼo ɨjio jɨkasokile.
Avaanhu vooni mʉ ɨɨsi vakava vikʉlɨdegha na kʉkʉlɨvɨngɨlɨla ɨlɨkanu ɨlio.
4 Pe avaanhu vakatengʉla kʉkʉlyɨmɨka ɨlɨjoka lɨla,
ʉlwakʉva lɨkalɨpeliile ɨlɨkanu ingʉfu saake.
Kange,
vakalyɨmɨka ɨlɨkanu lɨla vakati,
“Ghwe veeni jʉno alɨngʼhiine nɨ lɨkanu ɨlɨ?
Ghwe veeni jʉno ndepoonu ilua nalyo?”
5 Ɨlɨkanu lɨla lɨkapelua kujova amasio agha kughinia na kʉkʉmʉligha ʉNgʉlʉve.
Lɨkapelua ʉvʉtavʉlɨlua ʉvwa kʉvomba ɨmbombo jaake ameesi fijigho fine na ghavɨlɨ.
6 Pe lɨkatengʉla kʉkʉmʉligha ʉNgʉlʉve:
liligha ɨlɨtavua lya Ngʉlʉve,
ʉvukalo vwake na vano vikukala kʉkyanya.
7 Kange,
lɨkɨtɨkɨsɨvua kulua ɨlɨlʉgʉ na vɨmɨke na kʉkʉvatola.
Lɨkapelua ʉvʉtavʉlɨlua ʉvwa kʉtema avaanhu vooni,
ifisina fyoni,
injovele sooni ni ɨɨsi sooni.
8 Avaanhu vooni vano vikukala mʉ ɨɨsi vikʉlyɨmɨkagha.
Avaanhu avuo ve vano amatavua ghaave naghalembilue kuhʉma jipelua ɨɨsi mʉ kɨtabu ɨkya vwʉmi ɨkya Kakolo jʉno alyabudilue.
9 Ʉnya kʉpʉlɨka,
apʉlɨkaghe.
10 Ʉmuunhu jʉno avɨkilue ghwa kʉghomua,
ighomua.
Ʉmuunhu jʉno avɨkilue ghwa kʉbudua nɨ bamba,
ibudua nɨ bamba.
Apuo avɨmɨke vavisaghe nʉ lugudo na kujigha mʉ lwɨtɨko lwave.
Ɨlɨkanu ɨlya vʉvɨlɨ
11 Pambele nɨkalyagha ɨlɨkanu ɨlɨngɨ litogha kuhʉma paasi pa ɨɨsi.
Ɨlɨkanu ɨlio lɨkaale na mapembe ghavɨlɨ ndavʉle ɨngʼholo nɨ lɨsio hwene lya lɨjoka.
12 Lɨkava livomba nʉ vʉtavʉlɨlua ʉvwa lɨkanu ɨlya kwanda.
Pe ɨlɨkanu ɨlio ɨlya vʉvɨlɨ lɨkafyʉmɨlɨsia ifiinu fyoni mʉ ɨɨsi filyɨmɨkaghe ɨlɨkanu ɨlya kwanda,
ɨlɨkanu ɨlɨnya ngʼhoongʼo jɨno jalonda jɨpelele lɨfue,
neke jɨsokile.
13 Ɨlɨkanu ɨlio ɨlya vʉvɨlɨ lɨkavomba ifidegho ifivaha,
kuhanga lɨkapelela ʉmwoto kuhʉma kʉkyanya,
ghwike mʉ ɨɨsi nava vaanhu vikʉghwagha vʉle ghʉlɨvuo.
14 Lɨkavasyanga avaanhu vano vikukala mʉ ɨɨsi.
Lɨkavasyanga vwɨmɨla ifidegho fino lɨkapelilue kuvomba pamaaso gha lɨkanu lɨla ɨlya kwanda.
Lɨkavavʉʉla kuuti,
vatende ɨkɨhwani ɨkya lɨkanu lɨla ɨlya kwanda lɨno lɨkaale nɨ ngʼhoongʼo jɨno lɨkatemilue nɨ bamba,
pambele lɨkasooka.
15 Ɨlɨkanu lɨla ɨlya vʉvɨlɨ,
lɨkapelua ingʉfu kupulila ʉmwʉja ʉghwa vwʉmi mʉ kɨhwani ɨkya lɨkanu ɨlya kwanda kuuti,
kɨjovaghe na kulaghila kubuda vooni vano navikʉkyɨmɨka.
16 Lɨkavʉmɨlɨsia avaanhu vooni avavaha na vadebe,
avamofu na vakotofu,
avavʉke na vakami,
vavɨkue ɨkɨvalɨlo mʉ mavoko ghaave agha kʉndio nambe pa vweni.
17 Lɨkakaana ʉmuunhu ghweni ʉnsila kɨvalɨlo kughʉla nambe kughʉsia kɨmonga.
Ɨkɨvalɨlo ɨkio lye lɨtavua ɨlya lɨkanu lɨla nambe imbalɨlo isa fikelo ifya lɨtavuaa ɨlya lɨkanu ɨlio.
18 Apuo lulondua ʉmuunhu avisaghe nʉ vʉkagʉsi.
Ʉnya vʉkagʉsi alʉvʉlanie imbalɨlo sino sɨmile vwɨmɨla ifikelo ifya lɨtavua ɨlya lɨkanu ɨlio,
ʉlwakʉva imbalɨlo isio lɨtavua lya muunhu jʉmonga.
Imbalɨlo isio se isi:
ifilʉndo ntanda ni fijigho ntanda nɨ ntanda.