Ʉmʉkɨjʉʉva nɨ lɨjoka
12
Pambele kɨkavoneka ɨkɨvalɨlo ɨkɨvaha kʉkyanya.
Ʉmʉkɨjʉʉva afwɨkilue ɨlɨjʉva,
ʉmwesi ghʉkaale paasi pa maghʉlʉ ghaake.
Kʉ mutu afwalile ɨngeela ɨnya nhondue kɨjigho ni vɨlɨ.
2 Ʉmʉkɨjʉʉva ʉjuo akaale nkunue,
akava ilɨla fiijo nʉ vʉvafi ʉvwa kʉpaapa.
3 Kɨkavoneka ɨkɨvalɨlo ɨkɨngɨ kʉkyanya.
Ɨlɨjoka ɨlɨvaha ɨlɨlangali,
ɨlɨnya matu lekelalʉbale na mapembe kɨjigho,
amatu ghaake ghakaale ni ngeela indebe lekelalʉbale.
4 Ɨlɨjoka lɨla lɨkakwesa nʉ nkɨla ghwake ɨkɨghavo kɨmo ɨkya nhondue mʉ fighavo fitatu,
na kutaagha mʉ ɨɨsi.
Pe lɨkɨɨma pamaaso gha mʉkɨjʉʉva jʉla jʉno alɨ piipi kupaapa kuuti kyande ipaapa,
lɨmʉlie ʉmwanaake.
5 Ʉmʉkɨjʉʉva jʉla akapaapa ʉmwana ʉnʼdɨɨmi,
jʉno ilitema ɨɨsi sooni ni ngʉfu.
Ʉmwana ʉjuo akatolua na kutwalua kʉkyanya kwa Ngʉlʉve,
pa kɨtengo kyake ɨkya kɨtwa.
6 Pe ʉmʉkɨjʉʉva jʉla akakɨmbɨlɨla kʉ lɨhaka,
kʉno ʉNgʉlʉve amʉlɨngʼhanɨkisie kuuti vamʉlolelele ifighono ɨmbilima jɨmo ni filʉndo fivɨlɨ ni fijigho ntanda.
7 Pambele kʉkava nɨ lɨlʉgʉ kʉkyanya,
ʉnyamhola ʉmʼbaha ʉMikaeli na vanyamhola vaake vakava vilua nɨ lɨjoka lɨla;
lyope ɨlɨjoka na vanyamhola vaake vilua nʉ Mikaeli na vanyamhola vaake.
8 Neke ɨlɨjoka na vanyamhola vaake vakadwegha,
pe vakadagua vakava vasila vukalo kange kʉkyanya.
9 Pe ɨlɨjoka ɨlio ɨlɨvaha lɨkataghua mʉ ɨɨsi.
Lye lɨjoka ɨlɨkʉʉlʉ lɨno litambʉlua Mhosi nambe Setano.
Lisyanga avaanhu vooni.
Kyangʼhaani lɨkataghua mʉ ɨɨsi palɨkɨmo na vanyamhola vaake.
10 Pambele nɨkapʉlɨka ɨlɨsio ɨlɨvaha kuhʉma kʉkyanya liiti,
“Lɨno,
ʉNgʉlʉve ghwitu avapokile avaanhu vaake,
ahʉfisie ingʉfu saake nʉ Vʉtwa vwake!
Aletile ʉvʉtavʉlɨlua ʉvwa Kɨlɨsite ghwake,
ʉlwakʉva ataghilue paasi ʉmʉlʉgʉ ghwinu,
jʉno ijova kwa Ngʉlʉve kuuti,
ʉmue mwe vavombi vajiitu mʉhɨghue,
jʉno ivʉlɨlɨla kwa Ngʉlʉve ghwitu pakɨlo na pamwisi.
11 Lɨno,
avavombi avajiitu vamʉlefisie nɨ danda ja Kakolo,
vwɨmɨla ʉvwolesi vwave,
ʉlwakʉva vakitavwile kufua.
12 Lɨno,
mʉhovokaghe,
ʉmue mweni mwe vano mukukala kʉkyanya!
Ɨga ghwe ɨɨsi nuuve nyanja,
ʉlwakʉva ʉSetano ikile kʉlyʉmue,
amemile ɨngʼhalaasi,
ʉlwakʉva akagwile kuuti ifighono fyake fidebe.”
13 Ɨlɨjoka lɨla ye lɨvwene lɨtaghilue mʉ ɨɨsi,
lɨkatengʉla kʉkʉmfwɨma ʉmʉkɨjʉʉva jʉla jʉno apapile ʉmwana ʉnʼdɨɨmi.
14 Ʉmʉkɨjʉʉva jʉla akapelua amapɨga ghavɨlɨ agha lɨtumbusi lɨla ɨlɨvaha,
kuuti apululuke kulʉta kʉ lɨhaka kʉno alɨngʼhanɨsivue,
aave patali nɨ lɨjoka.
Ʉkuo ilolelelua amaaka ghatatu na meesi ntanda.
15 Ɨlɨjoka lɨkahʉmia amalenga minga mʉ mʉlomo ghwake.
Amalenga aghuo ghakahʉma minga hwene kɨkogha,
ghilʉta kʉnsana kwa mʉkɨjʉʉva jʉla,
neke ghansyole.
16 Neke ɨɨsi jɨkantanga ʉmʉkɨjʉʉva jʉla,
jɨkagabʉka hwene mʉlomo,
jɨkanyua amalenga ghala ghooni ghano ghahʉmile mʉ mʉlomo ghwa lɨjoka lɨla.
17 Ɨlɨjoka lɨla pe lɨkankalalɨla ʉmʉkɨjʉʉva jʉla,
lɨkavʉʉka lilʉta kulua na vaana va mʉkɨjʉʉva jʉla vano vasighiile,
vano vivɨngɨlɨla indaghɨlo sa Ngʉlʉve na kukwoleka imhola sa Yesu.
18 Pe ɨlɨjoka lɨla lɨkɨɨma mʉlʉbale mʉ nyanja.