Avolesi vavɨlɨ ava Ngʉlʉve
11
Nɨkapelua ʉlʉlaasi ʉlwa kʉpimila.
Nɨkavʉlua kuuti,
“Ɨma ʉlʉte kupima ɨnyumba ɨnyɨmɨke ɨja Ngʉlʉvea nɨ kɨtekelelo,
na kuvala avaanhu vano vikufuunya ʉmuo.
2 Neke ʉlʉvɨɨka ʉlwa nyumba ɨjio nʉngapimaghe,
ʉlwakʉva vapelilue avaanhu vano naVayahudi.
Avaanhu avuo vilikanya ɨlɨkaaja ɨlio ɨlyɨmɨke ameesi fijigho fine na ghavɨlɨ.
3 Na jʉʉne nilikʉvasuungʼha avolesi vango vavɨlɨ,
kuuti vavɨle mʉ fighono mbilima jɨmo ni filʉndo fivɨlɨ ni fijigho ntanda.
Vivɨlagha kʉmo vafwalile amagunila.”
4 Avolesi avuo ghe mapiki ghala ghavɨlɨ agha miseituni ni fyɨmɨlo fila fivɨlɨ ifya taala fino fili pamaaso gha Mʉtwa jʉno itema ɨɨsi.
5 Nave ʉmuunhu ilonda pikʉvalemasia,
ʉmwoto ghuhʉmagha mʉ malomo ghaave na kʉkʉvabuda avalʉgʉ vaave.
Enendɨɨkɨ fye ibudua ʉmuunhu ghweni jʉno ilonda pikʉvalemasia.
6 Avolesi avuo valɨ nʉ vʉtavʉlɨlua ʉvwa kʉsigha ʉvʉlanga,
kuuti ɨfula jɨleke kutoonya ʉnsiki ghʉno aveene vivɨla.
Kange,
valɨ nʉ vʉtavʉlɨlua ʉvwa kʉhambʉsia amalenga kuuva danda,
na kupumusia ɨɨsi ni mhumuko sino sili papinga ʉnsiki ghwoni ghʉno vighanile.
7 Neke vangamale ʉvwolesi vwave,
ɨlɨkanu lɨla lɨno lihʉma kʉ liina kʉvʉfue lilua navo,
lɨkʉvatola na kʉkʉvabuda.
8 Amafimba ghaave ghiiva mʉ nsevo ʉghwa lɨkaaja lɨla ɨlɨvaha,
muno ʉMʉtwa ghwave alyakomelilue pa kɨkovekano.
Ɨlɨkaaja ɨlio lɨhwaniine na vaanhu va kʉ Sodoma na kʉ Misili.
9 Avaanhu ava fikolo fyoni ni njovele sooni ni ɨɨsi sooni,
vilolagha amafimba aghuo ifighono fitatu ni fivalɨlo ntanda,
kange nakwale ʉmuunhu jʉno ikwɨtɨkɨsivwagha kusyɨla amafimba aghuo.
10 Kufua avavɨli avuo vavɨlɨ,
kʉkʉvapelela avaanhu vano navikʉmwɨtɨka ʉNgʉlʉve vahovoke.
Vihovokagha na kuvonolana,
ʉlwakʉva avavɨli avuo vavagasyagha kyongo mʉ ɨɨsi.
11 Neke pambele ye fikilile ifighono ifio fitatu ni fivalɨlo ntanda,
ʉNgʉlʉve akavapulila ʉmwʉja ʉghwa vwʉmi avavɨli vala avafue.
Avavɨli vala vakɨɨma.
Avaanhu vooni vano vakavaghile,
vakava nʉ lʉdwesi ʉlʉvaha.
12 Avavɨli avuo vakapʉlɨka ɨlɨsio ɨlɨvaha kuhʉma kʉkyanya liiti,
“Mwise kʉkyanya kʉno!”
Pe vakalʉta kʉkyanya nɨ lɨfunde,
avalʉgʉ vaave vakava vikʉvalola.
13 Ʉnsiki ghʉghuo kʉkava nɨ kɨsenyeena ɨkɨvaha.
Ɨɨsi ɨkɨghavo kɨmo mʉ fighavo kɨjigho,
jɨkaghua.
Avaanhu imbilima lekelalʉbale vakafua vwɨmɨla ɨkɨsenyeenya ɨkio.
Vano vakasighiile vakava vikwoghopa kyongo,
vakamʉghinia ʉNgʉlʉve ʉghwa kʉkyanya.
14 Imhumuko isa vʉvɨlɨ sikilile,
lolagha,
imhumuko isa vʉtatu sili piipi pikwisa.
Ʉnyamhola ʉghwa lekelalʉbale ikʉva ʉlʉkelemo
15 Ʉnyamhola jʉla ʉghwa lekelalʉbale akakʉva ʉlʉkelemo.
Lɨkapʉlɨkɨka ɨlɨsio ɨlɨvaha kuhʉma kʉkyanya liiti,
“Lɨno,
ʉvʉtwa vwa ɨɨsi,
Vʉtwa vwa Mʉtwa ʉNgʉlʉve ghwitu nʉ Kɨlɨsite ghwake.
Ʉmwene itemagha ifighono fyoni.”
16 Pe avagojo vala fijigho fivɨlɨ na vane vano vikukala mʉ fitengo fyave ifya kɨtwa pamaaso gha Ngʉlʉve,
vakafughama,
vakamwɨmɨka ʉNgʉlʉve,
17 vakati,
“Ghwe Mʉtwa Ngʉlʉve,
ghwe Nyangʉfu Sooni,
ghwe jʉno kweʉle kange kweʉlyale,
tʉkʉkʉhongesia,
ʉlwakʉva ʉhʉfisie ingʉfu saako imbaha,
na kutengʉla kutema.
18 Avaanhu vano navikʉkwɨtɨka,
vakakʉkalaliile.
Lɨno,
ʉnsiki ʉghwa kʉhʉfia ɨngʼhalaasi jaako ghʉfikile,
ghwe nsiki ʉghwa kʉhɨgha avafue,
ghwe nsiki ʉghwa kʉvonola avavombi vaako
avavɨli na vɨmɨke,
na vano vikʉlyɨmɨka ɨlɨtavua lyako,
avavaha na vadebe.
Ghwe nsiki ʉghwa kʉvatipula avuo,
vano vinangania ɨɨsi.”
19 Pe ɨnyumba ɨnyɨmɨke ɨja Ngʉlʉve jɨno jɨlɨ kʉkyanya jɨkadinduka,
nalɨ lɨvokosi ɨlya lʉfingob lwake lɨkavoneka mʉ nyumba ɨnyɨmɨke ɨjio.
Kʉkava nʉ lʉmuli lwa fula,
nʉ lwʉjɨɨlo,
nʉ lʉgulumo,
nɨ kɨsenyeena,
nɨ fula ɨmbaha ɨja mavue.