Ʉnyamhola ʉnya kɨtabu ɨkɨdebe
10
Pambele nɨkamwagha ʉnyamhola ʉjʉnge ʉnya ngʉfu ikwika kuhʉma kʉkyanya,
afwɨkilue ɨlɨfunde nʉ lʉnʼgangalyosi kʉ mutu,
kʉ maaso ivalatɨka hwene lɨjʉva,
amaghʉlʉ ghaake ghahwene sɨmbɨlɨ sa mwoto.
2 Mʉ lʉvoko lwake akolile ɨkɨtabu ɨkɨdebe,
kɨvalʉle.
Ʉlʉghʉlʉ lwake ʉlwa ndio lʉkanyile pa nyanja,
ʉlwa ngʼhɨghɨ lʉkanyile pa ɨɨsi.
3 Akakemeela fiijo ndavʉle ɨnyalʉpala vʉle jikuluma.
Ye akemelile,
ingulumo lekelalʉbale isa fula sikapʉlɨkɨka fiijo.
4 Ye sigulwime,
nikilɨngʼhania kulemba,
neke nɨkapʉlɨka ɨlɨsio kuhʉma kʉkyanya liiti,
“Amasio gha ngulumo isio lekelalʉbale,
nʉngalembaghe nambe kʉkʉmʼbʉʉla muunhu!”
5 Ʉnyamhola jʉla jʉno namwagha,
ʉlʉghʉlʉ lʉmo akanyile pa nyanja,
ʉlʉnge pa ɨɨsi,
akagholosia ʉlʉvoko lwake ʉlwa ndio kʉkyanya.
6 Akajɨɨgha mʉ lɨtavua lya Ngʉlʉve ʉmwʉmi ifighono fyoni,
ʉNgʉlʉve jʉno apelile ʉvʉlanga ni fiinu fyoni fino fili kʉ vʉlanga,
apelile ɨɨsi ni fiinu fyoni fino fili mʉ ɨɨsi,
ɨnyanja palɨkɨmo ni fiinu fyoni fino fili mʉ nyanja.
Kange akati,
“Ʉnsiki ʉghwa kʉghuula ghusilile!
7 Neke ʉnsiki pano ʉnyamhola ʉghwa lekelalʉbale ikulɨngʼhania kukʉva ʉlʉkelemo,
apuo pepano ʉvʉsyefu vwa Ngʉlʉve vukwɨlanɨsɨvua ndavʉle alyapʉlisie kʉ vavombi vaake avavɨli.”
8 Pe nɨkapʉlɨka ɨlɨsio lɨno lɨveele lɨjovile nuune kuhʉma kʉkyanya,
lijova kange liiti,
“Lʉtagha ʉkatoole ɨkɨtabu kɨla ɨkɨvalʉle kɨno kɨlɨ mʉ lʉvoko lwa nyamhola jʉla jʉno ʉlʉghʉlʉ lʉmonga akanyile pa nyanja,
ʉlʉnge pa ɨɨsi.”
9 Nɨkalʉta kwa nyamhola jʉla,
nɨkamʼbʉʉla kuuti amheele ɨkɨtabu kɨla ɨkɨdebe.
Ʉmwene akati,
“Toola,
ʉlie,
mʉ mʉlomo kinyeengʼa hwene vwʉki,
neke mʉ lɨleme kɨkʉkʉpeela ʉvʉvafi.”
10 Pe nɨkatoola ɨkɨtabu kɨla mʉ lʉvoko lwa nyamhola jʉla nɨkalia,
mʉ mʉlomo kɨkava kinyeengʼa hwene vwʉki.
Neke ye nɨgudiike,
vʉkambona ʉvʉvafi mʉ lɨleme.
11 Pe nɨkavʉlua kuuti,
“Ghulondua kupʉlɨsia ɨmhola kuhʉma kwa Ngʉlʉve.
Ʉpʉlɨsie kʉ vaanhu,
na kʉ ɨɨsi,
na kʉ fisina,
na kʉ vatwa vinga.”