Ʉnyamhola ʉghwa vʉhaano ikʉva ʉlʉkelemo
9
Ʉnyamhola ʉghwa vʉhaano akakʉva ʉlʉkelemo.
Pe nɨkajaagha ɨnhondue jɨno jɨghwile mʉ ɨɨsi kuhʉma kʉkyanya.
Ɨnhondue ɨjio jɨkapelua ɨfungulilo ɨja kʉ liina kʉvʉfue.
2 Jɨkadindula ɨliina kʉvʉfue,
lɨkahʉma ɨlyosi hwene lya mbembelo ɨmbaha,
lɨkatogha kʉkyanya.
Ɨlɨjʉva nʉ vʉlanga nafikava fivoneka vwɨmɨla ɨlyosi.
3 Imhaasi sikahʉma mʉ lyosi lɨla,
sikalʉta mʉ ɨɨsi.
Sikapelua ingʉfu ndavʉle isa fingʼhomilevʉli.
4 Imhaasi isio sikavʉlua kuuti,
nasingananganiaghe ɨlɨsoli nambe ʉmmela nambe ʉmpiki.
Ʉlwene sivapumusyaghe avaanhu vano navalɨ nɨ kɨvalɨlo pa vweni ɨkɨhʉma kwa Ngʉlʉve.a
5 Imhaasi sila sikɨtɨkɨsɨvua kʉkʉvapumusia avaanhu ameesi ghahaano,
neke nasingavabudaghe.
Avaanhu vano vingʼenyua ni mhaasi isio ʉvʉvafi vwake vuuva ndavʉle ʉvʉvafi vwa kʉngʼenyua ni fingʼhomilevʉli.
6 Mʉ fighono ifio avaanhu vilondagha ʉvʉfue neke navikʉvwaghagha,
vilondagha pifua,
neke ʉvʉfue vʉkʉvakɨmbɨlagha.
7 Imhaasi isio sikaale na mavɨlɨ hwene falaasi sino silɨngʼhanɨsivue kulua ɨlɨlʉgʉ.
Kʉ mutu sikaale ni fiinu hwene ngeela isa sahabu,
kʉ maaso sikahwene muunhu.
8 Sikaale nɨ lɨnyele lɨtali hwene lya mʉkɨjʉʉva,
na miino hwene gha nyalʉpala.
9 Pa fifuva sikafwalile ingʉla,
hwene ngʉla sa kyʉma.
Pano sipululuka amapɨga ghakakutagha hwene lwʉjɨɨlo lwa gaale sino sikwesua ni falaasi nyinga,
silʉta lʉvɨlo kʉ lɨlʉgʉ.
10 Sikaale na makila amanya mifua ndavʉle agha fingʼhomilevʉli.
Kʉ makila sikaale ni ngʉfu isa kʉvapumusia avaanhu ameesi ghahaano.
11 Kange,
sikaale nʉ ntwa.
Ʉntwa ʉjuo ghwe nyamhola ʉghwa kʉ liina kʉvʉfue,
ɨlɨtavua lyake mʉ njovele ɨja Kɨebulania itambʉlua,
“Abadoni,”
na mʉ njovele ɨja Kɨyunaani itambʉlua,
“Apolioni,”
kwekʉti,
Ntipuli.
12 Ʉlʉpumuko lwa kwanda lʉkilile,
sijiighe isingi ivɨlɨ,
isio sikwisa pambele.
Ʉnyamhola ʉghwa ntanda ikʉva ʉlʉkelemo
13 Ʉnyamhola ʉghwa ntanda akakʉva ʉlʉkelemo.
Nɨkapʉlɨka ɨlɨsio lihʉma mʉ nguto ine isa kɨtekelelo ɨkya sahabu kɨno kɨlɨ pamaaso gha Ngʉlʉve.
14 Ɨlɨsio ɨlio lɨkʉmʼbʉʉla ʉnyamhola jʉla ʉghwa ntanda jʉno akolile ʉlʉkelemo liiti,
“Vadindulile avanyamhola vane vano vakʉngilue kʉ kɨkogha ɨkɨvaha ɨkya Eufulati.”
15 Pe akavadindulila avanyamhola avuo vano vakalɨngʼhanɨsivue kubuda avaanhu ɨkɨghavo kɨmo mʉ fighavo fitatu.
Vakalɨngʼhanɨsivue kubuda avaanhu akavalɨlo kala kala,
ɨkɨghono,
nʉ mwesi nʉ mwaka ghʉla ghʉla.
16 Nɨkapʉlɨka,
avasikali vano vangaliile ifalaasi valɨ mbilima imbilima filʉndo fivɨlɨ (200,000,000).
17 Avasikali vano vakangaliile ifalaasi isio nɨkavavona ndɨɨkɨ mʉ nyivonelo sango:
vafwalile ingʉla pa fifuva fyave.
Ingʉla isio sikaale ndangali hwene mwoto,
isingi bululu hwene lyosi,
isingi nyalʉpangue hwene salufa.
Amatu gha falaasi ghakaale ndavʉle amatu gha nyalʉpala,
mʉ malomo ghaave ghukava ghuhʉma ʉmwoto,
nɨ lyosi,
nɨ salufab jɨno jiviika.
18 Avaanhu kɨghavo kɨmo mʉ fighavo vitatu vakabudua ni mhumuko isa fiinu fitatu.
Ifiinu ifio ghwe mwoto,
ɨlyosi nɨ salufa ɨmhio kuhʉma mʉ malomo gha falaasi isio.
19 Ingʉfu isa falaasi isio silyale mʉ malomo na mʉ makila ghaave.
Amakila ghaave ghaale hwene matu gha njoka,
ghe ghano ghavombagha ɨmbombo ɨja kʉlemasia avaanhu.
20 Avaanhu vano navakabudilue ni mhumuko isio,
navakalatile ʉvʉhosi vwave.
Vakava vikufuunya kʉ mipepo ni fihwani fino vakatendagha nɨ sahabu,
nɨ kyʉma,
nɨ shaba,
na mavue,
na fino vakatendagha na mapiki.
Ifihwani ifio nafilola nambe kupʉlɨka nambe kughenda.
21 Kange,
navakalatile na kʉkʉvʉleka ʉvʉbudi,
nʉ vʉhavi,
nʉ vʉghendamwalu nʉ vʉlyasi vwave.