ɄKakolo ihʉdʉla ɨkɨhʉdɨko ɨkya lekelalʉbale
8
ɄKakolo akahʉdʉla ɨkɨhʉdɨko ɨkya lekelalʉbale.
Ye ihʉdʉla,
kʉkyanya kʉkava kɨmihe ʉnsiki nʼdebe.
2 Pe nɨkavaagha avanyamhola vala lekelalʉbale vano vavikwɨma pamaaso gha Ngʉlʉve,
vakapelua amakelemo lekelalʉbale.
3 Akiisa ʉnyamhola ʉjʉnge,
akolile ɨkɨvʉghaana ɨkya sahabu.
Akɨɨma pavʉlongolo pa kɨtekelelo,
akapelua ʉvʉfumba ifiinu ifinya lʉnuusi ʉlʉnono.
Akapelua ifiinu ifio kuuti atavʉle palɨkɨmo ni nyifuunyo isa vɨmɨke vooni,
pa kɨtekelelo ɨkya sahabu,
kɨno kɨlɨ pavʉlongolo pa kɨtengo ɨkya kɨtwa.
4 Ɨlyosi ɨlya vʉfumba palɨkɨmo ni nyifuunyo isa vɨmɨke,
fikatogha kʉkyanya kwa Ngʉlʉve kuhʉma mʉ mavoko gha nyamhola ʉjuo.
5 Ʉnyamhola ʉjuo akatoola ɨkɨvʉghaana kɨla,
akamemia ʉmwoto ʉghwa pa kɨtekelelo,
akataagha mʉ ɨɨsi,
pe kʉkava nʉ lʉgulumo,
nʉ lwʉjɨɨlo,
nʉ lʉmuli lwa fula nɨ kɨsenyeena.
Avanyamhola vikʉva ʉlʉkelemo
6 Avanyamhola vala lekelalʉbale vano vakaale na makelemo lekelalʉbale,
vakilɨngʼhania kukʉva amakelemo aghuo.
7 Ʉnyamhola ʉghwa kwanda akakʉva ʉlʉkelemo.
Ɨfula ja mavue nʉ mwoto fihasɨngʼhiine nɨ danda,
fikataghua mʉ ɨɨsi.
Ɨkɨghavo kɨmo,
mʉ fighavo fitatu ifya ɨɨsi,
amapiki na mamela ghooni amiighu ghakapia lwoni.
8 Ʉnyamhola ʉghwa vʉvɨlɨ akakʉva ʉlʉkelemo.
Ɨkɨɨnu hwene kɨdunda kɨkome kiviika ʉmwoto,
kɨkataghua mʉ nyanja.
Ɨnyanja ʉlʉbale ʉlwa kɨghavo kɨmo mʉ fighavo fitatu jɨkahambʉka danda.
9 Ʉlʉbale ʉluo mʉ nyanja,
ifipelua fyoni fikafua,
nasi ngalavaa sikanangɨka lwoni.
10 Ʉnyamhola ʉghwa vʉtatu akakʉva ʉlʉkelemo.
Ɨnhondue ɨmbaha jɨno jiviika hwene taala,
jɨkaghua kuhʉma kʉkyanya.
Jɨkaghwɨla ifikogha ni finʼdwivu ɨkɨghavo kɨmo mʉ fighavo fitatu.
11 Ɨnhondue ɨjio jitambʉlua Vʉkali.
Amalenga ɨkɨghavo kɨmo mʉ fighavo fitatu ghakava makali,
avaanhu vinga vakafua vwɨmɨla kunyua amalenga aghuo,
ʉlwakʉva ghakaale makali kyongo.
12 Ʉnyamhola ʉghwa vʉne akakʉva ʉlʉkelemo.
Ɨkɨghavo kɨmo ɨkya lɨjʉva mʉ fighavo fitatu,
nɨ kɨghavo kɨmo ɨkya mwesi mʉ fighavo fitatu,
nɨ kɨghavo kɨmo ɨkya nhondue mʉ fighavo fitatu,
fikatovua.
Pe ɨmwisi ɨkɨghavo kɨmo mʉ fighavo fitatu jɨkava ngʼhiisi,
joope ɨkɨlo ɨkɨghavo kɨmo mʉ fighavo fitatu jɨkava ngʼhiisi.
13 Pe nɨkalola kange,
nɨkavona ɨlɨtumbusi lipululuka kʉkyanya,
lijova fiijo liiti,
“Ɨga!
Ɨga!
Ɨga kʉ vaanhu vano vikukala mʉ ɨɨsi,
ʉlwakʉva avanyamhola vatatu vilɨngʼhanisie kukʉva ingʼhelemo.”