Avaanhu va Ngʉlʉve vivɨkua ɨkɨvalɨlo
7
Ye sivombiike isio,
nɨkavaagha avanyamhola vane,
vɨmile mʉ mbale ine isa ɨɨsi.
Avanyamhola avuo vasighagha ɨmhepo kuhʉma imbale sooni ine isa ɨɨsi kuuti jɨleke kugugula mʉ ɨɨsi,
nambe mʉ nyanja nambe mʉ mapiki.
2 Nɨkamwagha ʉnyamhola ʉjʉnge itogha kʉkyanya kuhʉma ʉlʉbale ʉlwa kʉvʉdibulo,
akolile ʉmuhuli ghwa Ngʉlʉve ʉmwʉmi.
Akavakemeela fiijo avanyamhola vane vala vano vapelilue ingʉfu isa kʉnangania ɨɨsi nɨ nyanja,
3 akati,
“Namʉngananganiaghe ɨɨsi nambe nyanja,
nambe mapiki,
kuhanga tʉvavɨɨke ɨkɨvalɨlo pa vweni avavombi vooni va Ngʉlʉve ghwitu.”
4 Pe nɨkapʉlɨka kuuti,
ɨmbalɨlo ɨja vaanhu vano vavɨkilue ɨkɨvalɨlo mʉ fikolo fyoni ifya Vaisilaeli,
valɨ imbilima kɨlʉndo kɨmo ni mbilima fijigho fine ni mbilima ine (144,000).
5 Avaanhu ava kɨkolo ɨkya Yuuda
valɨ imbilima kɨjigho ni mbilima ivɨlɨ,
ɨkɨkolo ɨkya Leubeni valɨ imbilima kɨjigho ni mbilima ivɨlɨ,
ɨkɨkolo ɨkya Gadi valɨ imbilima kɨjigho ni mbilima ivɨlɨ.
6 Ɨkɨkolo ɨkya Aseli valɨ imbilima kɨjigho ni mbilima ivɨlɨ,
ɨkɨkolo ɨkya Nafutali valɨ imbilima kɨjigho ni mbilima ivɨlɨ,
ɨkɨkolo ɨkya Manase valɨ imbilima kɨjigho ni mbilima ivɨlɨ.
7 Ɨkɨkolo ɨkya Simioni valɨ imbilima kɨjigho ni mbilima ivɨlɨ,
ɨkɨkolo ɨkya Leevi valɨ imbilima kɨjigho ni mbilima ivɨlɨ,
ɨkɨkolo ɨkya Isikali valɨ imbilima kɨjigho ni mbilima ivɨlɨ.
8 Ɨkɨkolo ɨkya Sabuloni valɨ imbilima kɨjigho ni mbilima ivɨlɨ,
ɨkɨkolo ɨkya Yosefu valɨ imbilima kɨjigho ni mbilima ivɨlɨ,
nɨ kɨkolo ɨkya Benyamini
valɨ imbilima kɨjigho ni mbilima ivɨlɨ.
Avaanhu va ɨɨsi sooni pamaaso gha Kakolo
9 Ye sivombiike isio,
nɨkalola nɨkalyagha ɨlɨpʉgha ɨlya vaanhu lɨno nambe muunhu naangaghele kuvala.
Avaanhu kuhʉma ɨɨsi sooni,
ifikolo fyoni ni njovele sooni vɨmile pavʉlongolo pa kɨtengo ɨkya kɨtwa na pamaaso gha Kakolo,
vafwalile amenda amavalafu,
vakolile amataafi agha mapiki ghano ghitambʉlua mitende.
10 Vijova fiijo viiti,
“Ʉvʉpoki vuhʉma kwa Ngʉlʉve ghwitu,
jʉno ikukala pa kɨtengo ɨkya kɨtwa,
na kwa Kakolo.”
11 Avanyamhola vooni vakɨmile kusyʉta ɨkɨtengo ɨkya kɨtwa,
na kusyʉta avagojo vala ni fipelua fila fine ifinya vwʉmi.
Pe vakafughama pavʉlongolo pa kɨtengo ɨkya kɨtwa,
vakamwɨmɨka ʉNgʉlʉve,
12 vakati,
“Ameni!
Amalʉmbo,
nʉ vʉvaha,
nʉ vʉkagʉsi,
nʉ lʉhongesio,
nʉ vwoghopua,
nʉ vʉtavʉlɨlua,
ni ngʉfu,
fili nʉ Ngʉlʉve ghwitu ifighono fyoni.
Ameni!”
13 Ʉmo mʉ vagojo vala akamhosia akati,
“Vano vafwalile amenda amavalafu ve vaveeni?
Vahʉmile kʉʉghi?”
14 Nɨkamwamʉla nɨkati,
“Ntwa ghwango,
ʉve veeve ʉkagwile.”
Akambʉʉla akati,
“Avuo ve vano vahʉmile mʉ mhumuko imbaha,
amenda ghaave mavalafu swee,
ʉlwakʉva vasukile nɨ danda ɨja Kakolo.
15 Fye nambe valɨ pavʉlongolo
pa kɨtengo ɨkya kɨtwa ɨkya Ngʉlʉve.
Vikʉmʼbombela ʉNgʉlʉve pakɨlo na pamwisi
mʉ nyumba jaake ɨnyɨmɨke.
Neke jʉno ikukala pa kɨtengo ɨkya kɨtwa
ivisagha palɨkɨmo na veene ɨkʉvalolelela.
16 Navivisagha nɨ njala kange,
nambe kyʉmɨlua.
Navangavalɨlue nʉ lʉjʉva,
nambe ɨlɨfuke kʉkʉvajetʉla.
17 Ʉlwakʉva,
ʉKakolo jʉno alɨ pakate
pa kɨtengo ɨkya kɨtwa ɨkʉvadɨɨma
na kʉkʉvalongosia kʉ malenga amanya vwʉmi.
Ghwope ʉNgʉlʉve ɨkʉvapulusia amasosi.”