ɄKakolo ihʉdʉla ifihʉdɨko
6
Pe nɨkamwagha ʉKakolo ihʉdʉla ɨkɨhʉdɨko ɨkya kwanda mʉ fihʉdɨko fila lekelalʉbale.
Nɨkapʉlɨka ɨkɨpelua kɨmo mʉ fipelua fila fine ifinya vwʉmi kikemeela,
ɨlɨsio hwene lʉgulumo lwa fula kiiti,
“Ghwise!”
2 Pe nɨkalola,
nɨkajaagha ɨfalaasi ɨmbalafu,
angaliile ʉmuunhu jʉno akolile ʉlʉdibulo.
Ʉmuunhu ʉjuo akapelua ɨngeela,
akavʉʉka alefisie avalʉgʉ vaake,
kange ifilefyagha.
3 ɄKakolo akahʉdʉla ɨkɨhʉdɨko ɨkya vʉvɨlɨ.
Pe nɨkapʉlɨka ɨkɨpelua ɨkya vʉvɨlɨ ɨkɨnya vwʉmi kiiti,
“Ghwise!”
4 Pe jɨkiisa ɨfalaasi ɨjɨngɨ ɨndangali,
ʉmuunhu jʉno angaliile akapelua ɨbamba ɨmbaha ni ngʉfu isa kʉvʉsia ʉlʉtengaano mʉ ɨɨsi kuuti avaanhu vabudanaghe.
5 ɄKakolo akahʉdʉla ɨkɨhʉdɨko ɨkya vʉtatu.
Nɨkapʉlɨka ɨkɨpelua ɨkya vʉtatu ɨkɨnya vwʉmi kiiti,
“Ghwise!”
Nɨkalola,
nɨkajaagha ɨfalaasi ɨnhiitu,
ʉmuunhu jʉno angaliile,
akolile ɨkɨghelelo ɨkya kʉghelela ʉvʉsito.
6 Nɨkapʉlɨka kɨmonga hwene lɨsio lya muunhu,
lihʉma pakate pa fipelua fila fine ifinya vwʉmi,
liiti,
“Ɨkiilo jɨmo ɨja vʉtine vwa ngano,
kʉ lʉhombo ʉlwa mbombo ɨja kɨghono kɨmo;
ikiilo itatu isa vʉtine ʉvwa ngongilue,
kʉ lʉhombo ʉlwa mbombo ɨja kɨghono kɨmo.
Neke nʉngananganiaghe amafuta nambe ʉlʉhʉʉje.”
7 ɄKakolo akahʉdʉla ɨkɨhʉdɨko ɨkya vʉne.
Nɨkapʉlɨka ɨkɨpelua ɨkya vʉne ɨkɨnya vwʉmi kiiti,
“Ghwise!”
8 Nɨkalola nɨkajaagha ɨfalaasi ɨfumbila,
ʉmuunhu jʉno angaliile itambʉlua ghwe Vʉfue,
ghwope Kʉvʉlʉngʉ akava ɨkʉmʼbɨngɨlɨla mʉmbele.
Avuo vakapelua ʉvʉtavʉlɨlua ʉvwa kʉbuda avaanhu ɨkɨghavo kɨmo mʉ fighavo fine mʉ ɨɨsi.
Vakapelua vabudaghe nɨ bamba,
nɨ njala,
nɨ nhamu,
ni fikanu ifikali.
9 ɄKakolo akahʉdʉla ɨkɨhʉdɨko ɨkya vʉhaano.
Nɨkaghaagha paasi pa kɨtekelelo amoojo gha vaanhu vano vabudilue vwɨmɨla kupʉlɨsia ɨlɨsio lya Ngʉlʉve nʉ vwolesi vwɨmɨla ʉlwɨtɨko lwave.
10 Ghakalɨla fiijo ghakati,
“Ghwe Mʉtwa ghwe Mwɨmɨke,
ghwe ghwa kyangʼhaani,
kɨki ghudɨɨla kʉkʉvahɨgha avaanhu mʉ ɨɨsi mʉlwa kʉtʉtanga kuvangɨla vwɨmɨla kʉkʉtʉbuda ʉsue?”
11 Pe vakapelua nʉjʉnge ɨsopeka ɨmhala ɨnhali,
vakavʉlua kuuti,
vaghuule ʉnsiki nʼdebe kuhanga pano ɨmbalɨlo ɨja vavombi avajanave na vanyalʉkolo vaave vano vibudua ndavʉle aveene,
jɨkwɨlane.
12 Nɨkamwagha ʉKakolo ihʉdʉla ɨkɨhʉdɨko ɨkya ntanda.
Nakalɨngi kʉkava nɨ kɨsenyeena ɨkɨvaha mʉ ɨɨsi.
Ɨlɨjʉva lɨkahambʉka lɨkava lɨtiitu hwene nkala.
Ʉmwesi ghʉkava mʉlangali hwene danda.
13 Inhondue kʉkyanya sikasangʉka pa ɨɨsi ndavʉle amagʉhʉ vʉle ghisangʉka pano ɨmhepo ɨmbaha jigugula.
14 Ʉvʉlanga vʉkavʉsɨvua hwene kɨteefu vʉle kiniengua.
Ifidunda fyoni ni ɨɨsi sooni sino silyale pakate pa nyanja sikahamɨsɨvua pano pwesilyale.
15 Avatwa va ɨɨsi,
na vavaha vooni,
na vavaha va vasikali,
na vamofu,
na vatambʉlɨke,
na vakami na vavʉke vakafisama mʉ mhanga na mʉ mavue kʉ fidunda.
16 Vakafivʉʉla ifidunda na mavue vakati,
“Tʉghwɨle,
mʉtʉfise aleke kʉkʉtwagha jʉno ikalile pa kɨtengo ɨkya kɨtwa.
Kange,
jɨleke kʉkʉtwagha ɨngʼhalaasi ja Kakolo,
17 ʉlwakʉva ɨkɨghono ɨkɨvaha ɨkya kʉtipula,
kɨfikile.
Ghwe veeni jʉno ndepoonu ikiva?”