ɄKakolo nɨ kɨtabu
5
Pe nɨkakyagha ɨkɨtabu mʉ lovoko ʉlwa ndio ʉlwa muunhu ʉjuo jʉno ikalile pa kɨtengo ɨkya kɨtwa.
Ɨkɨtabu ɨkio kɨlembilue imbale sooni,
nkate na kʉnji,
kɨpinyilue ni fihʉdɨkoa lekelalʉbale.
2 Nɨkamwagha ʉnyamhola,
ʉnya ngʉfu ipʉlɨsia fiijo iiti,
“Ghwe veeni jʉno anoghiile kuhʉdʉla ifihʉdɨko ifio na kuvalʉla ɨkɨtabu ɨkio?”
3 Napwealyale nambe jʉmo kʉkyanya,
nambe mʉ ɨɨsi,
nambe paasi pa ɨɨsi jʉno akanoghiile kuhʉdʉla nambe kuvalʉla na kukwɨmba ɨkɨtabu ɨkio.
4 Nɨkalɨla fiijo,
ʉlwakʉva napwealyale nambe jʉmo jʉno anoghiile kuhʉdʉla nambe kuvalʉla na kukwɨmba ɨkɨtabu ɨkio.
5 Pe ʉmo mʉ vagojo vala akambʉʉla akati,
“Ʉleke pilɨla!
Lolagha,
ɨNyalʉpala ɨja kɨkolo kya Yuuda,b
ɨja kɨsina kya ntwa ʉDavɨdi jɨlefisie.
Ɨjeene jɨnoghiile kuhʉdʉla ifihʉdɨko fila lekelalʉbale na kuvalʉla ɨkɨtabu ɨkio.”
6 Nɨkamwagha ʉKakoloc ɨmile pakate pa kɨtengo ɨkya kɨtwa,
asyʉngʉtilue ni fipelua ifinya vwʉmi fine na vagojo vala.
ɄKakolo ʉjuo akava ivoneka hwene abudilue.
Akaale na mapembe lekelalʉbale na maaso lekelalʉbale.
Ifio se Mhepo sila lekelalʉbale isa Ngʉlʉve sino silyasungʼhilue mʉ ɨɨsi jooni.
7 ɄKakolo ʉjuo akalʉta,
akatoola ɨkɨtabu mʉ lʉvoko ʉlwa ndio ʉlwa jʉno alikalile pa kɨtengo kɨla ɨkya kɨtwa.
8 Ye atolile ɨkɨtabu ɨkio,
ifipelua fila fine ifinya vwʉmi palɨkɨmo na vagojo vala fijigho fivɨlɨ na vane vakafughama pamaaso gha Kakolo.
Nʉjʉnge alɨ nɨ lɨgombo ni fivʉghaana ifya sahabu,
fimemile ʉvʉfumba ifiinu ifinya lʉnuusi ʉlʉnono.
Ʉvʉfumba ʉvuo se nyifuunyo sa vɨmɨke.
9 Pe vakava vikʉmwɨmbɨla ʉlwɨmbo ʉlʉpia viiti,
“Ʉve ʉnoghiile kutoola ɨkɨtabu ɨkio
na kuhʉdʉla ifihʉdɨko fyake,
ʉlwakʉva ʉlyabudilue,
kange vwɨmɨla ɨdanda jaako,
ʉvavɨkile avaanhu kuhʉma mʉ fikolo fyoni,
na mʉ njovele sooni na mʉ ɨɨsi sooni
kuuva vaanhu va Ngʉlʉve.
10 Ʉvapeliile ʉvʉtwa nʉ vʉtekesi
kuuti vamʼbombelaghe ʉNgʉlʉve ghwitu,
kange vatemaghe mʉ ɨɨsi.”
11 Pambele nɨkalola,
nɨkapʉlɨka ɨlɨsio ɨlya vanyamhola vinga fiijo,
imbilima ni mbilima,
vasyʉtile ɨkɨtengo ɨkya kɨtwa ni fipelua fila fine ifinya vwʉmi na vagojo fijigho fivɨlɨ na vane,
12 vikwɨmba fiijo viiti,
“ɄKakolo jʉno abudilue,
anoghiile kukwoghopua,
kughinisivua na kulʉmbua,
ʉmwene ghwe nya ngʉfu,
mmofu kange nkagʉsi.”
13 Nɨkapʉlɨka ifipelua fyoni ifya kʉkyanya,
ni fya mʉ ɨɨsi,
na fino fili paasi pa ɨɨsi na fino fili mʉ nyanja,
fyoni fikwɨmba fiiti,
“Ʉmwene jʉno ikukala pa kɨtengo ɨkya kɨtwa na kwa Kakolo,
alʉmbwaghe,
oghopwaghe na kughinisivua,
ʉmwene ghwe nya ngʉfu ifighono fyoni!”
14 Ifipelua fila fine ifinya vwʉmi fikɨtɨkɨla fikati,
“Ameni!”
Voope avagojo vala vakafughama,
vakamwɨmɨka.