Ɨkɨtengo ɨkya kɨtwa kʉkyanya
4
Ye sikilile isio,
nɨkavona ʉmʉlyango ghʉdindwike kʉkyanya,
ɨlɨsio lɨla lɨno nɨkapʉliike ʉlʉtasi likuuta hwene lʉkelemo,
lɨkati,
“Ʉtoghe kʉno nɨkʉhʉfie sino ndalʉve ndaani sivombeka ye sikilile isi.”
2 Nakalɨngi ʉMhepo ghwa Ngʉlʉve akandongosia,
nɨkavona kʉkyanya pwekɨlɨ ɨkɨtengo ɨkya kɨtwa,
ʉmuunhu jʉmonga ikaliile.
3 Ʉmuunhu ʉjuo alyale ivalatɨka hwene mavue agha ndalama nyinga ghano ghilengadɨka.
Ɨkɨtengo ɨkio kɨno akikaliile,
kɨkasyʉngʉtilue nʉ lʉnʼgangalyosi lʉno lʉkava lulengadɨka hwene mavue agha ndalama nyinga.
4 Kange,
ɨkɨtengo ɨkio kɨkasyʉngʉtilue ni fitengo fijigho fivɨlɨ na fine.
Ifitengo ifio vakikaliile avagojo fijigho fivɨlɨ na vane,
vafwalile amenda amavalafu,
ni ngeela isa sahabu kʉ matu ghaave.
5 Mʉ kɨtengo ɨkio ɨkya kɨtwa lʉkahʉmagha ʉlʉmuli,
ʉlwʉjɨɨlo nʉ lʉgulumo lwa fula.
Pavʉlongolo pa kɨtengo ɨkio pwesikaale itaala lekelalʉbale sino siviika.
Itaala isio se Mhepo lekelalʉbale isa Ngʉlʉve.
6 Pavʉlongolo pa kɨtengo ɨkio pwekɨkaale ɨkɨɨnu hwene nyanja,
jilangaasa hwene kɨlolelo,
jilengadɨka hwene lɨvue.
Pakate pa kɨtengo ɨkya kɨtwa ni fitengo fijigho fivɨlɨ na fine,
kwekʉti kusyʉta ɨkɨtengo ɨkya kɨtwa,
pwefikaale ifipelua ifyʉmi fine,
fili na maaso minga ʉmʼbɨlɨ ghwoni,
kʉvʉlongolo na kʉnsana.
7 Ɨkɨpelua ɨkya kwanda kɨkahwaniine nɨ nyalʉpala,
ɨkya vʉvɨlɨ kɨkahwaniine nɨ ngwada,
ɨkya vʉtatu kʉ maaso kɨkaale hwene muunhu,
ɨkya vʉne kɨkahwaniine nɨ lɨtumbusi vʉle lipululuka.
8 Ifipelua ifio fine,
nɨkɨngɨ kɨkaale na mapɨga ntanda.
Fikaale na maaso ʉmʼbɨlɨ ghwoni,
ghamonga ghalyale mʉ mbafu muno ghikupika amapɨga.
Fikava fikwɨmba ʉnsiki ghwoni,
pakɨlo na pamwisi fiiti,
“Mwɨmɨke,
Mwɨmɨke,
Mwɨmɨke,
ghwe Mʉtwa Ngʉlʉve ghwe Nyangʉfu Sooni,
jʉno kwealyale,
jʉno kwale,
jʉno ilikwisa.”
9 Ʉnsiki ghwoni ifipelua ifio fikamʉghiniagha nʉ vwoghopua na kʉkʉmhongesia ʉmwene jʉno ikalile pa kɨtengo ɨkya kɨtwa,
jʉno mwʉmi ifighono fyoni.
10 Pano fyamʉghiniagha,
avagojo vala fijigho fivɨlɨ na vane,
vakafughamagha pamaaso ghaake na kʉkʉmwɨmɨka ʉmwene jʉno mwʉmi ifighono fyoni.
Vakava vivɨɨka ingeela saave pavʉlongolo pa kɨtengo ɨkio ɨkya kɨtwa kʉmo viiti,
11 “Mʉtwa ghwitu,
Ngʉlʉve ghwitu,
ʉnoghiile kughinisivua na kukwoghopua,
ʉve veeve nya ngʉfu.
Ʉlwakʉva veeve ʉpelile ifiinu fyoni.
Ifiinu ifio fipelilue
kange kwefili vwɨmɨla ʉvughane vwako.”