Ɨkalata kʉ kɨpʉgha ɨkya vɨtɨki ɨkya kʉ Salidi
3
“Ʉmʉlembele ʉnyamhola ʉghwa kɨpʉgha ɨkya vɨtɨki kɨno kɨlɨ mʉ lɨkaaja ɨlya Salidi ʉʉti,
‘Ɨmhola ɨjɨ jɨhʉmile kʉlyʉne ne jʉno nɨlɨ ni Mhepo sa Ngʉlʉve lekelalʉbale ni nhondue lekelalʉbale.
Nɨkagwile amaghendele ghiinu,
muvoneka mʉlɨ vʉʉmi hɨmbe mʉlɨ vafue.
2 Sisimuka mʉ vʉfue vwinu,
mʉnosie vʉnono sino sitapifua,
ʉlwakʉva amaghendele ghiinu naghanoghiile pamaaso gha Ngʉlʉve.
3 Lɨno,
mʉkʉmbʉke imbʉlanɨsio sino mʉlyapʉliike na kukwʉpɨla,
mʉvɨngɨlɨlaghe isio na kulaata inyɨvi siinu.
Nave namusisimuka,
nikwisa mʉ ngʼhenyemʉkɨla ndavʉle ʉmʉlyasi,
namʉngakagʉle ʉnsiki ghʉno nikwisa kʉlyʉmue.
4 Looli,
kwevale avavɨngɨlɨli vadebe kʉ Salidi ʉkuo,
vano navalamisie amenda ghaave.
Avuo ve vano vighendagha nuune kʉmo vafwalile amenda amavalafu,
ʉlwakʉva vanoghiile kuuva enendɨɨkɨ.
5 Jʉno ɨkʉsilema ingelo,
nɨkʉmfwasia amenda amavalafu enendɨɨkɨ,
kange nanɨlavʉsia lʉsiku ɨlɨtavua lyake mʉ kɨtabu ɨkya vwʉmi.a
Nɨlajova pamaaso gha Nhaata na pamaaso gha vanyamhola vaake kuuti,
ʉjʉ mʼbɨngɨlɨli ghwango.
6 Ʉnya kʉpʉlɨka,
apʉlɨkaghe ɨlɨsio ɨlɨ lɨno ʉMhepo ʉMwɨmɨke ɨkʉfivʉʉla ifipʉgha ifya vɨtɨki.’
Ɨkalata kʉ kɨpʉgha ɨkya vɨtɨki ɨkya kʉ Filadelifia
7 “Ʉmʉlembele ʉnyamhola ʉghwa kɨpʉgha ɨkya vɨtɨki kɨno kɨlɨ mʉ lɨkaaja ɨlya Filadelifia ʉʉti,
‘Ɨmhola ɨjɨ jɨhʉmile kʉlyʉne ne Mwɨmɨke,
ne Ghwa Kyangʼhaani,
ne jʉno nɨlɨ nɨ fungulilo ɨja ntwa ʉDavɨdi.b
Nɨngadindule,
nakwale jʉno idinda.
Nɨngadinde,
nakwale jʉno idindula.c
8 Nɨkagwile amaghendele ghiinu.
Nɨkagwile kuuti nambe mʉlɨ ni ngʉfu ndebe,
muvɨngɨlɨla ɨlɨsio lyango,
kange namʉngʼhanile ʉne.
Lɨno,
nɨvadinduliile ʉmʉlyango,
nakwale jʉno idinda.
9 Lolagha,
nɨkʉvapeela ɨkɨpʉgha kya vaanhu vano vikʉmwɨmɨka ʉSetano,
vano vikutambʉla vaanhu va Ngʉlʉve,
hɨmbe navaanhu va Ngʉlʉve.
Kyangʼhaani nɨkʉvapelela viise kufughama pamaaso ghiinu,
neke vakagʉle kuuti nɨvaghanile.
10 Lɨno,
ʉlwakʉva mugudile ndavʉle nɨkavalaghiile,
na jʉʉne nɨkʉvalolelela vʉnono ʉnsiki ʉghwa lʉpumuko lʉno lukwisa mʉ ɨɨsi kʉkʉvaghela avaanhu vooni.
11 Nikwisa ngʼhaningʼhaani!
Mʉgadɨlɨlaghe fiijo kɨno mʉlɨ nakyo,
kuuti ʉmuunhu ghweni aleke kukuunya ɨngeela jiinu.
12 Jʉno ɨkʉsilema ingelo,
nɨkʉmʼbɨɨka kuuva sɨmbɨlɨ mʉ nyumba ɨnyɨmɨke ɨja Ngʉlʉved ghwango,
ikukalagha ʉmuo,
naalahʉma lʉsiku.
Ʉmuunhu ʉjuo nilemba pa mwene ɨlɨtavua lya Ngʉlʉve ghwango nɨ lya lɨkaaja lya Ngʉlʉve ghwango,
kwekʉti ɨYelusalemu ɨmhia,
ɨlɨkaaja lɨno likwika kuhʉma kʉkyanya kwa Ngʉlʉve ghwango.
Kange,
nilemba pa mwene ɨlɨtavua lyango ɨlɨpia.
13 Ʉnya kʉpʉlɨka,
apʉlɨkaghe ɨlɨsio ɨlɨ lɨno ʉMhepo ʉMwɨmɨke ɨkʉfivʉʉla ifipʉgha ifya vɨtɨki.’
Ɨkalata kʉ kɨpʉgha ɨkya vɨtɨki ɨkya kʉ Laodikia
14 “Ʉmʉlembele ʉnyamhola ʉghwa kɨpʉgha ɨkya vɨtɨki kɨno kɨlɨ mʉ lɨkaaja ɨlya Laodikia ʉʉti,
‘Ɨmhola ɨjɨ jɨhʉmile kʉlyʉne ne jʉno nitambʉlua Ameni,
ne mwolesi nnofu,
kange ghwa kyangʼhaani,
ne kɨvʉmbʉko kya fipelua fyoni fino alyapelile ʉNgʉlʉve.
15 Nɨkagwile amaghendele ghiinu kuuti,
ʉmue namʉlɨ vasuvusu kange namʉlɨ vapio.
Kʉba mwale mʉʉve vasuvusu nambe mʉʉve vapio.
16 Neke lɨno ʉlwakʉva mʉlɨ vafukefu,
namʉlɨ vasuvusu nambe vapio,
nɨkʉvasyetʉla mʉhʉme mʉ mʉlomo ghwango.
17 Ʉmue mwiti,
“Ʉsue tʉlɨ vamofu,
tʉlɨ ni fiinu finga,
tʉlɨ vasila vʉfumbue vwa kɨmonga!”
Neke namʉkagwile kuuti ʉmue mʉlɨ vasila ngʉfu,
mʉlɨ nʉ lʉpumuko,
mʉlɨ vakotofu,
mʉlɨ vabofu amaaso kange mʉlɨ vʉfuula.
18 Lɨno,
nɨvatange amasaaghe:
Mʉghʉle kʉlyʉne ɨsahabu ɨnofu jɨno jɨvalasivue nʉ mwoto,
neke mʉʉve vamofu.
Mʉghʉle kʉlyʉne amenda amavalafu mʉfwale,
mʉvʉsie isoni.
Kange,
mʉghʉle kʉlyʉne ʉnkota mʉpake mʉ maaso kuuti mʉlolaghe.
19 Vooni vano nɨvaghanile,
nɨkʉvapavɨla na kʉkʉvakopa kʉkʉvavʉnga.
Lɨno,
mutavʉle na moojo ghiinu ghooni na kulaata inyɨvi siinu.
20 Lolagha,
nɨmile pa mʉlyango nihodesia.
Ʉmuunhu angapʉlɨke ɨlɨsio lyango na kʉkʉndindulila ʉmʉlyango,
nikwingila kwa mwene na kuhanga ɨkyakʉlia nʉ mwene.
21 Ʉmuunhu jʉno ɨkʉsilema ingelo nɨkʉmpeela kukukala nuune pa kɨtengo kyango ɨkya kɨtwa,
ndavʉle ʉne vʉle nɨlefisie nikukala palɨkɨmo nʉ Nhaata pa kɨtengo kyake ɨkya kɨtwa.
22 Ʉnya kʉpʉlɨka,
apʉlɨkaghe ɨlɨsio ɨlɨ lɨno ʉMhepo ʉMwɨmɨke ɨkʉfivʉʉla ifipʉgha ifya vɨtɨki.’ ”