Ɨkalata kʉ kɨpʉgha ɨkya vɨtɨki ɨkya kʉ Efeso
2
“Ʉmʉlembele ʉnyamhola ʉghwa kɨpʉgha ɨkya vɨtɨki kɨno kɨlɨ mʉ lɨkaaja ɨlya Efeso ʉʉti,
‘Ɨmhola ɨjɨ jɨhʉmile kʉlyʉne ne jʉno nɨkolile inhondue lekelalʉbale mʉ lʉvoko lwango ʉlwa ndio,
ne jʉno nighenda pakate pa fyɨmɨlo ifya taala lekelalʉbale ifya sahabu.
2 Nɨkagwile amaghendele ghiinu,
ʉlʉpumuko lwinu nʉ lugudo lwinu.
Kange,
nɨkagwile kuuti namʉkʉvʉpɨla avaanhu avaviivi vano vikutambʉla vasungʼhua,
hɨmbe navasungʼhua.
Mʉvaghelile avaanhu avuo,
mʉkagwile kuuti vasungʼhua va vʉdesi.
3 Kange,
nɨkagwile kuuti mʉpumwike kyongo vwɨmɨla ɨlɨtavua lyango,
neke mugudile,
namʉdendevwike.
4 Neke lɨno,
nɨlɨ nɨ lɨsio numue.
Ʉmue mʉlʉlekile ʉlʉghano lʉno mʉlyale nalwo ʉlʉtasi!
5 Lɨno mʉkʉmbʉke vʉle mʉlyale ye mʉkyale kʉkʉlʉleka ʉlʉghano.
Mʉlaate na kuvomba sino mʉlyale muvomba ʉlʉtasi.
Neke nave namuvomba ʉluo,
nikwisa kʉlyʉmue na kuvʉsia ɨkyɨmɨlo kiinu ɨkya taala pano pwekɨlɨ.
6 Looli kwekɨlɨ ɨkɨɨnu kɨmo kɨno muvomba vʉnofu:
mukalalɨla imbombo sino vivomba aVanikolaia ndavʉle nɨkʉsikalalɨla ʉne.
7 Ʉnya kʉpʉlɨka,
apʉlɨkaghe ɨlɨsio ɨlɨ lɨno ʉMhepo ʉMwɨmɨke ɨkʉfivʉʉla ifipʉgha ifya vɨtɨki.
Jʉno ɨkʉsilema ingelo,
nɨkʉmwɨtɨkɨsia kulia ifipeke ifya mpiki ʉghwa vwʉmi kʉ Paladɨsi ja Ngʉlʉve.’b
Ɨkalata kʉ kɨpʉgha ɨkya vɨtɨki ɨkya kʉ Similina
8 “Ʉmʉlembele ʉnyamhola ʉghwa kɨpʉgha ɨkya vɨtɨki kɨno kɨlɨ mʉ lɨkaaja ɨlya Similina ʉʉti,
‘Ɨmhola ɨjɨ jɨhʉmile kʉlyʉne ne ghwa kwanda kange ghwa vʉsililo,
ne jʉno nɨlyafwile,
neke lɨno nɨlɨ mwʉmi.
9 Nɨkagwile imhumuko siinu nʉ vʉkotofu vwinu,
neke namʉlɨ vakotofu jeeje,
looli mʉlɨ vamofu!
Kange,
nɨkagwile vʉle mulighua kyongo na vaanhu vano vikutambʉla vaanhu va Ngʉlʉve,
hɨmbe navaanhu va Ngʉlʉve.
Avuo,
kɨpʉgha kya vaanhu vano vikʉmwɨmɨka ʉSetano.
10 Namʉngoghopaghe imhumuko sino silikʉvaagha.
Mʉkagʉlaghe kuuti vamonga mʉlyʉmue,
ʉSetano ilikʉvadindila mʉ ndinde kuuti avaghele,
mulipumuka ifighono kɨjigho.
Namʉngalʉlekaghe ʉlwɨtɨko lwinu nambe kʉʉve kwe kʉfua,
ʉne nilikʉkʉpeela ɨngeela ɨja vwʉmi.
11 Ʉnya kʉpʉlɨka,
apʉlɨkaghe ɨlɨsio ɨlɨ lɨno ʉMhepo ʉMwɨmɨke ɨkʉfivʉʉla ifipʉgha ifya vɨtɨki.
Jʉno ɨkʉsilema ingelo naalafua ʉlwa vʉvɨlɨ,
kwekʉti naalingila kʉ lʉpumuko lwa mwoto ghʉno naghusima lʉsiku.’
Ɨkalata kʉ kɨpʉgha ɨkya vɨtɨki ɨkya kʉ Peligamo
12 “Ʉmʉlembele ʉnyamhola ʉghwa kɨpʉgha ɨkya vɨtɨki kɨno kɨlɨ mʉ lɨkaaja ɨlya Peligamo ʉʉti,
‘Ɨmhola ɨjɨ jɨhʉmile kʉlyʉne ne jʉno nɨlɨ nɨ bamba ɨnhemi jɨno jitema imbale sooni.
13 Nɨkagwile kuuti mukukala mʉ lɨkaaja lɨno ʉSetano atemile.
Neke ʉmue mʉjiighe mʉkʉnyɨtɨka ʉne,
namʉkanile kʉkʉnyɨtɨka.
Nambe ifighono ifya mwolesi ghwango ʉghwa kyangʼhaani ʉAntipa,
jʉno akabudilue pakate palyʉmue,
apuo pano atemile ʉSetano,
namʉkalʉlekile ʉlwɨtɨko.
14 Neke lɨno nɨlɨ na masio madebe numue:
vamonga mʉlyʉmue vivɨngɨlɨla imbʉlanɨsio isa Balamu.
ɄBalamu ʉjuo alyamhongile ʉBalaki kʉkʉvavʉʉla aVaisilaeli kuuti,
valie ifiinu fino fitekilue kʉ mangʉlʉve,
kange vavwafuke.c
15 Kange,
vamonga mʉlyʉmue vivɨngɨlɨla imbʉlanɨsio isa Vanikolai.
16 Lɨno mʉlaate,
nave namulaata,
nikwisa kʉlyʉmue ngʼhaningʼhaani.
Nikwisa nɨ bamba jɨno jihʉma mʉ mʉlomo ghwango kulua ɨlɨlʉgʉ na vaanhu avuo.
17 Ʉnya kʉpʉlɨka,
apʉlɨkaghe ɨlɨsio ɨlɨ lɨno ʉMhepo ʉMwɨmɨke ɨkʉfivʉʉla ifipʉgha ifya vɨtɨki.
Jʉno ɨkʉsilema ingelo nɨkʉmpeela ɨmanad jɨno jɨfisilue,
kange nɨkʉmpeela ɨlɨvue ɨlɨvalafu lɨno lɨlembilue ɨlɨtavua ɨlɨpia.
Ɨlɨtavua ɨlio nakwale nambe jʉmo jʉno alɨmanyile,
looli jʉ jʉno ipelua.’
Ɨkalata kʉ kɨpʉgha ɨkya vɨtɨki ɨkya kʉ Tuatila
18 “Ʉmʉlembele ʉnyamhola ʉghwa kɨpʉgha ɨkya vɨtɨki kɨno kɨlɨ mʉ lɨkaaja ɨlya Tuatila ʉʉti,
Ɨmhola ɨjɨ jɨhʉmile kʉlyʉne ne Mwana ghwa Ngʉlʉve,e
ne jʉno amaaso ghango ghivalatɨka hwene ndape sa mwoto,
amaghʉlʉ ghango ghilengadɨka hwene shaba jɨno jɨvalasivue fiijo.
19 Nɨkagwile amaghendele ghiinu,
nʉ lʉghano lwinu,
nʉ lwɨtɨko lwinu,
nʉ vʉvombi vwinu nʉ lugudo lwinu.
Kange,
nɨkagwile kuuti lɨno amaghendele ghiinu manofu kukila ʉlʉtasi.
20 Neke lɨno nɨlɨ nɨ lɨsio numue:
Mʉkʉmʉleka ʉmʉkɨjʉʉva jʉla,
ʉYesebeli jʉno ikuvɨɨka mʼbɨli,
ivʉlanɨsia avavombi vango na kʉkʉvasyanga kuuti,
vavombe ʉvʉvwafu na kulia ifyakʉlia fino fitekilue kʉ mangʉlʉve.
21 Ʉne nɨmpeliile ʉnsiki kuuti alaate,
neke nailonda pikʉvʉleka ʉvʉvwafu vwake.
22 Lɨno,
nɨkʉmpeela ɨnhamu jɨno jɨkʉmpelela akunue kusisimuka.
Voope vano vavwafukagha nʉ mwene,
nave navilaata ʉvʉhosi vwave ʉvuo nɨkʉvapeela ʉlʉpumuko ʉlʉkome.
23 Kange,
nɨkʉvabuda avavɨngɨlɨli vaake,
neke avaanhu ava fipʉgha fyoni ifya vɨtɨki vakagʉle kuuti,
ʉne nɨkagwile amoojo gha vaanhu na masaaghe ghaave.
Kange,
nilonda vakagʉle kuuti nʉjʉnge nilikʉmhomba kulɨngʼhana ni mbombo saake.
24 Neke ʉmue mwe vange,
mwe vano mʉlɨ mʉ lɨkaaja ɨlya Tuatila,
mwe vano namuvɨngɨlɨla imbʉlanɨsio isa Yesebeli,
kange namwɨtiike kumanyɨla sino avange viiti,
‘Isa vʉsyefu vwa Setano,’
nanɨkʉvatwɨka ʉnsigho ʉghʉnge.
25 Looli mʉgadɨlɨlaghe sino mʉlɨ naso,
kuhanga pano niliiva nikwisa.
26 Jʉno ɨkʉsilema ingelo na kuvomba isa vughane vwango kuhanga kufika kʉvʉsililo,
Nɨkʉmpeela ʉvʉtavʉlɨlua ʉvwa kʉtema ɨɨsi sooni:
27 ‘Ɨkʉvatemagha avaanhu ni ngʉfu,
ɨkʉvabojolania hwene fivɨgha.’f
Ipelua ʉvʉtavʉlɨlua ndavʉle ʉne vʉle nɨpelilue nʉ Nhaata.
28 Kange,
nɨkʉmpeela ʉvʉvaha vwango vʉno vuvalatɨka ndavʉle ɨnhondue ɨja palwakɨlo.g
29 Ʉnya kʉpʉlɨka,
apʉlɨkaghe ɨlɨsio ɨlɨ lɨno ʉMhepo ʉMwɨmɨke ɨkʉfivʉʉla ifipʉgha ifya vɨtɨki.