Lʉhʉfio lwa Yohani
Amasio amalongosi
1
Ʉlʉ lwe lʉhʉfio lwa Yesu Kɨlɨsite,
lʉno ʉNgʉlʉve alyampeliile kuuti avahʉfie avavombi vaake,
imhola sino ndalʉve ndaani sivombeka ʉnsiki nʼdebe ghʉno ghukwisa.
ɄYesu ʉjuo alyansungʼhile ʉnyamhola ghwake kʉkʉmʼbʉʉla ʉmʼbombi ghwake ʉYohani imhola isio.
2 ɄYohani ghwope oliike sooni sino alyasivwene.
Isio lye lɨsio lya Ngʉlʉve nʉ vwolesi vwa Yesu Kɨlɨsite.
3 Afunyilue ʉmuunhu jʉno ɨkʉvɨmbɨla avange amasio agha vʉvɨli ghano ghalembilue muno,
kange vafunyilue vano vipʉlɨka na kugadɨlɨla,
ʉlwakʉva ʉnsiki ʉghwa kʉvombeka isi ghʉlɨ piipi.
Ʉlʉhʉngɨlo
4 Ʉne ne Yohani,
nɨkʉvalembela ɨkalata ɨjɨ mwe fipʉgha lekelalʉbale ifya vɨtɨki,
mwe vano mukukala mʉ kɨghavoa ɨkya Asia.
Ʉlʉsʉngʉ nʉ lʉtengaano kuhʉma kwa Ngʉlʉve jʉno kwealyale,
jʉno kwale,
jʉno ilikwisa na kuhʉma kʉ Mhepo lekelalʉbaleb sino sili pa kɨtengo kyake ɨkya kɨtwa,
5 na kuhʉma kwa Yesu Kɨlɨsite,
fivisaghe numue.
ɄYesu ʉjuo ghwe mwolesi ghwa kyangʼhaani,
alyale ghwa kwanda kusyʉka kuhʉma kʉ vafue,
ghwe mʼbaha ghwa vatwa vooni mʉ ɨɨsi.
Ghwe jʉno atʉghanile,
atʉpokile mʉ nyɨvi siitu nɨ danda jaake.
6 Atʉvɨkile mʉ Vʉtwa vwa Ngʉlʉve na kʉkʉtʉvɨɨka kuuva vatekesi,
kuuti tʉmʼbombelaghe ʉNgʉlʉve ʉNhaata ghwake.
Ʉvʉvaha ni ngʉfu fili nʉ Yesu Kɨlɨsite ifighono fyoni!
Ameni!
7 Lolagha,
ilikwisa mʉ mafunde!
Avaanhu vooni vilikʉmwagha,
voope vano valyamhomile nɨ mhalala,
vilikʉmwagha.
Avaanhu vooni mʉ ɨɨsi vililɨlagha,
ʉlwakʉva ikwisa.
Kyangʼhaani fye luliiva.
Ameni!
8 ɄMʉtwa ʉNgʉlʉve ʉNyangʉfu Sooni iiti,
“Ʉne neene Alufa kange neene Omega,
kwekʉti neene vʉtengʉlɨlo kange neene vʉsililo.
Ʉne neene kwealyale,
jʉno kwale,
jʉno ilikwisa.”
ɄYesu ikuhʉfia kwa Yohani
9 Ʉne ne Yohani ne mwɨtɨki nʼjiinu,
nɨlɨ palɨkɨmo numue mʉ mhumuko na mʉ lugudo mʉ Vʉtwa vwa Yesu Kɨlɨsite.
Ʉne nɨlyadindilue mʉ ɨɨsi ɨja Patimo jɨno jɨlɨ pakate pa nyanja.
Nɨlyadindilue ʉlwakʉva nɨkapʉlɨsyagha ɨlɨsio lya Ngʉlʉve na kukwoleka vwɨmɨla ʉYesu Kɨlɨsite.
10 Ɨkɨghono kɨmonga ɨkya kufuunya,
ʉMhepo ghwa Ngʉlʉve akanyisila,
nɨkapʉlɨka ɨlɨsio hwene lʉkelemo kʉnsana kʉlyʉne.
11 Ɨlɨsio ɨlio lɨkati,
“Isi sino ghʉkʉsaagha ʉlembe mʉ kɨtabu,
neke ʉtwale ɨkɨtabu ɨkio kʉ fipʉgha lekelalʉbale ifya vɨtɨki:
ɨkɨpʉgha ɨkya kʉ Efeso,
ɨkya kʉ Similina,
ɨkya kʉ Peligamo,
ɨkya kʉ Tuatila,
ɨkya kʉ Salidi,
ɨkya kʉ Filadelifia,
nɨ kya kʉ Laodikia.”
12 Pe nɨkasyetʉka nɨlole ghwe veeni jʉno aveele ijova nuune.
Ye nɨsyetwike,
nɨkafyagha ifyɨmɨlo ifya taala lekelalʉbale ifya sahabu.
13 Pakate pa fyɨmɨlo fila nɨkamwagha jʉmonga hwene ghwe Mwana ghwa Muunhu,c
afwalile ɨsopeka ɨnhali,
ipinyile pa kɨfuva ʉlʉkova lwa sahabu.
14 Ɨlɨnyele lyake lɨkaale lɨvalafu hwene hamba,
kange lɨvalafu hwene ngʼhaala.
Amaaso ghaake ghivalatɨka hwene ndape sa mwoto.
15 Amaghʉlʉ ghaake ghakaale ghilengadɨka hwene shaba jɨno jɨvalasivue vʉnono nʉ mwoto.
Ɨlɨsio lyake likuuta hwene malenga minga ghano ghikwika pa lɨsalala.
16 Akakolile inhondue lekelalʉbale mʉ lʉvoko lwake ʉlwa ndio,
mʉ mʉlomo jɨkava jihʉma ɨbamba ɨnhemi jɨno jitema imbale sooni.
Kʉ maaso ivalatɨka hwene lɨjʉva pano livala fiijo.
17 Ye nɨmwaghile,
nɨkaghua pa maghʉlʉ ghaake hwene nɨfwile.
Akavɨɨka ʉlʉvoko lwake ʉlwa ndio palyʉne akati,
“Nʉngoghopaghe!
Ʉne nɨlɨ ghwa kwanda kange ghwa vʉsililo.
18 Ʉne nɨlɨ mwʉmi!
Nɨkafwile,
neke lɨno nɨlɨ mwʉmi ifighono fyoni.
Ʉne nɨlɨ ni fungulilo isa vʉfue na kʉvʉlʉngʉ.d
19 “Lɨno,
lemba sino ʉsivwene,
ʉlembe sino sivombeka lɨno na sino silivombeka pambele.
20 Inhondue lekelalʉbale sino ʉsivwene mʉ lʉvoko lwango ʉlwa ndio,
ni fyɨmɨlo fila lekelalʉbale ifya taala fino fitendilue ni sahabu,
ʉmʉlʉvo ghwake ghwe ʉghʉ:
Inhondue lekelalʉbale,
ve vanyamhola va fipʉgha fila lekelalʉbale ifya vɨtɨki;
ifyɨmɨlo lekelalʉbale,
fye fipʉgha fila lekelalʉbale ifya vɨtɨki.