Lʉhʉfio lwa Yohani
Ɨmhola ɨndongosi
Ɨkɨtabu ɨkɨ alyalembile ʉYohani, ʉmʼbʉlanɨsɨvua ghwa Yesu Kɨlɨsite. Alyalembile kʉkʉvatanga avɨtɨki mʉ fipʉgha ifya vɨtɨki lekelalʉbale fino alyale ilolelela. Ʉvwandʉlɨlo ʉvwa 2-3 alyafilembiile ifipʉgha fyoni ifya vɨtɨki. Ɨkʉvapavɨla kuuti vasileke inyɨvi saave. Kange, ɨkʉvakangasia avavombi va Ngʉlʉve kuuti, vavisaghe mʉ vʉgholofu nambe valɨ mʉ mhumuko. Kutengʉlɨla ʉvwandʉlɨlo ʉvwa 4 kuhanga kufika kʉvʉsililo ʉvwa kɨtabu ɨkɨ, ʉYohani ikwoleka inyivonelo sino silyamwisiile vwɨmɨla ʉNgʉlʉve nʉ vʉvaha vwake. Mʉ nyivonelo isio ʉNgʉlʉve ihʉfia ɨngʼhalaasi jaake kʉ vaanhu vooni avaviivi. Ihʉfia vʉle ʉKɨlɨsite ilikwisa kulefia ʉvʉviivi, kange ilikwisa kʉkʉvahɨgha avaanhu vooni vano vikʉvʉkaana ʉvwakyangʼhaani. ɄNgʉlʉve ilikwisa kutipula ɨɨsi ɨjɨ na kupela ɨɨsi ɨmhia. Mʉ ɨɨsi ɨmhia ɨjio avaanhu vooni vano vikʉmwɨtɨka ʉNgʉlʉve vilikukala palɨkɨmo nʉ mwene ifighono fyoni.
ɄYohani alyasivwene na maaso inyivonelo isi. Imhola nyinga mʉ kɨtabu ɨkɨ sikwolekua mʉ fihwani, ndavʉle 1:12, ʉYohani ɨkʉfyagha ifikongʼholo lekelalʉbale ifya sahabu ifya kʉvɨkɨla ɨtaala. Pambele tuvona ʉmʉlʉvo ʉghwa fikongʼholo ifi fye fipʉgha fya vɨtɨki. Mʉ fihwani ifio ifya kʉvʉtengʉlɨlo, fikʉtʉtanga kukagʉla vʉnofu sino sikwolekua pambele mʉ kɨtabu ɨkɨ.