Yuuda 1

Ɨkalata ɨja

Yuuda

Ʉlʉhʉngɨlo

Ʉne ne Yuuda, ne mʼbombi ghwa Yesu Kɨlɨsite, ne nnuuna ghwa Yakovo, nɨkʉvalembela ʉmue mwe vano ʉNgʉlʉve ʉNhaata avakemelile kʉkʉmwɨtɨka ʉmwene, ʉmue mwe vano avaghanile, kange mulolelelua nʉ Yesu Kɨlɨsite. 2 ɄNgʉlʉve avapyanɨlaghe, avapelaghe ʉlʉtengaano nʉ lʉghano ifighono fyoni.

Avavʉlanɨsi va vʉdesi

3 Vaghanɨke vango, nalondagha kyongo kʉkʉvalembela ɨmhola ɨja vʉpoki vʉno tʉlɨ navwo ʉsue tweni. Neke lɨno nɨvwene lʉnoghiile kʉkʉvalembela na kʉkʉvasʉʉma kuuti, mʉghimbaghe kugadɨlɨla ʉlwɨtɨko lʉno ʉNgʉlʉve avapeliile kamo keene avɨtɨki vaake. 4 Nɨkʉvalembela ɨkalata ɨjɨ, ʉlwakʉva kwevale avaanhu vano navikʉmwoghopa ʉNgʉlʉve, vijingisie kɨsyefu mʉ kɨpʉgha kiinu. Avaanhu avuo viiti ʉlʉsʉngʉ lwa Ngʉlʉve ghwitu lʉlɨ nusue, nambe tʉvombaghe isa vʉvwafu. Mʉ ʉluo vikʉnkaana ʉYesu Kɨlɨsite ʉMʉlongosi ghwitu ʉMʼbaha, ʉMʉtwa ghwitu. Neke kuhʉma mʼbʉkʉʉlʉ lɨlembilue kuuti, avaanhu avuo valahɨghua.

5 Lɨno, nambe mʉkagwile isi sooni, nilonda nɨvakʉmbʉsie kuuti, ʉMʉtwa ʉNgʉlʉve alyavapokile aVaisilaeli kuhʉma mʉ ɨɨsi ɨja Misili, pambele akavatipula avaanhu vano valyavʉhɨlile kʉkʉmwɨtɨka. 6 Mʉkʉmbʉkaghe avanyamhola vano valyavʉhɨlile kuvomba ɨmbombo jɨno ʉNgʉlʉve alyavapeliile, vakavʉleka ʉvukalo vwave vʉno alyavapeliile. ɄNgʉlʉve avapinyile mʉ ngʼhiisi ɨmbaha ni nyololo sino nasidumuka lʉsiku, vighuula ɨkɨghono kɨla ɨkɨvaha ɨkya vʉhɨghi. 7 Kange, mʉkʉmbʉke avaanhu ava lɨkaaja ɨlya Sodoma nɨ lya Gomola, na vaanhu ava makaaja ghano ghaale piipi na makaaja aghuo. Avaanhu avuo vahwaniine na vanyamhola vala. Vakava vivwafuka avaghoosi na vaghoosi vanine. ɄNgʉlʉve akavatipula nʉ mwoto ghʉno naghusima lʉsiku, kʉkʉvapavɨla avaanhu vooni.

8 Fye lʉlɨvuo kʉ vaanhu avuo, injosi saave sikʉvalongosia kulamia amavɨlɨ ghaave mʉlwa kʉvwafuka na kukaana kulongosivua nʉ Ngʉlʉve. Kange, vikʉfiligha kyongo ifipelua ifyɨmɨke ifya kʉkyanya. 9 Nambe ʉnyamhola ʉmʼbaha ʉMikaeli naalyavombile ʉluo ye ikanɨngʼhana nʉ Setano vwɨmɨla ʉmʼbɨlɨ ghwa Moose, naakaghela kʉkʉmhɨgha ʉSetano mʉlwa kʉmʉligha, looli alyajovile kuuti, “ɄMʉtwa ʉNgʉlʉve jʉjuo akʉdalɨkɨle!” 10 Neke avaanhu ava, vibenapʉla imhola sino navasitangʼhinie. Nambe imhola sino vasitangʼhinie, vasitangʼhinie hwene fikanu, ʉlwakʉva ifikanu nafisaagha isa kʉvomba. Isio se sino sikʉvanangania.

11 Ɨga, avaanhu avuo! Ʉlwakʉva vivɨngɨlɨla amaghendele gha Kaini. Ʉvʉhosi ʉvwa vʉhojofu vwa ndalama, vivomba ndavʉle ʉBalamu. Valatipulua, ʉlwakʉva vagalwike ndavʉle alyagalwike ʉKola. 12 Avaanhu avuo vivoneka hwene vanono, neke vinangania ʉvʉhangɨlanɨsi ʉvwa fyɨmɨke ifya lʉghano, visaagha lʉ lwave. Vivomba ʉluo kɨsila soni. Avaanhu avuo valɨ ndavʉle amafunde ghano ghivevelʉka, amasila fula. Valɨ ndavʉle amapiki ghano naghikoma ifipeke, ghʉmile lwoni, ghakumulilue. 13 Kange, avaanhu avuo vikeela kʉvomba hwene mavɨngo ghano ghikeela kʉsyʉta, neke imbombo saave sikosia isoni. Avaanhu avuo valɨ ndavʉle inhondue sino sikeela kʉsyʉta, neke nasilʉngɨka kɨmonga. Lɨno, ʉNgʉlʉve avalɨngʼhanɨkisie ʉlʉpumuko ʉlwa kʉvʉsila kʉsila, kʉ ngʼhiisi ɨmbaha.

14 ɄEnoki, alyale kɨsina kya lekelalʉbale kuhʉma kwa Adamu. Ʉmwene alyavɨlile vwɨmɨla avaanhu avuo, alyatiile, “Pʉlɨkɨsia, ʉMʉtwa ilikwisa na vanyamhola vaake avɨmɨke imbilima ni mbilima, 15 kuhɨgha na kutipula avaanhu vooni vano navikʉmwoghopa ʉNgʉlʉve vwɨmɨla imbombo saave imbiivi, palɨkɨmo na maligho ghooni ghano vijova avahosi avuo vwɨmɨla ʉNgʉlʉve.” 16 Avaanhu avuo vingʼuula na kupɨɨka avange, vivɨngɨlɨla ʉvʉnoghelua vwave ʉvʉviivi. Kange, vikughinia na kʉkʉvapaala kyongo avaanhu avange kuuti vapelue fino vilonda kʉ veene.

Imhavɨlo ni similisio

17 Neke ʉmue mwe vaghanɨke vango, mʉkʉmbʉkaghe amasio ghano valyajovile avasungʼhua va Mʉtwa ghwitu ʉYesu Kɨlɨsite 18 kuuti, “Ifighono ifya vʉsililo vilikwisa avaanhu avanya mbedo, avanya kʉvɨngɨlɨla ʉvʉnoghelua vwave ʉvʉviivi.” 19 Avaanhu avuo ve vano vipela ʉvʉsʉlani, visaagha si sa mʉ ɨɨsi, kange vasila Mhepo ghwa Ngʉlʉve.

20 Neke ʉmue vaghanɨke vango, mʉkangalaghe mʉ lwɨtɨko lwinu ʉlwɨmɨke, mufunyaghe mʉ ngʉfu isa Mhepo ʉMwɨmɨke. 21 Mulolelelaghe mʉ lʉghano lwa Ngʉlʉve, kʉmo mʉkʉmʉghuula ʉMʉtwa ghwitu ʉYesu Kɨlɨsite jʉno mʉ lʉsʉngʉ lwake ilikʉvapeela ʉvwʉmi ʉvwa kʉvʉsila kʉsila. 22 Mʉvavonelaghe ɨkɨsa vano valɨ ni nganighani, 23 avange mʉvapokaghe hwene mʉkʉvapoka mʉ mwoto. Avange mʉvasʉngʉkɨlaghe, neke mulolelelaghe na kuuva patali nʉ vʉviivi vwave.

Inyifuunyo isa kʉpaala

24 ɄNgʉlʉve ghwe nya ngʉfu isa kʉvalolelela kuuti mʉleke kusova, na kʉkʉvavɨɨka mʉ vʉvaha vwake nʉ lʉkeelo ʉlʉkome, kɨsila vʉviivi. 25 Ʉjuo ghwe Ngʉlʉve mwene, ʉMpoki ghwitu mwa Yesu Kɨlɨsite ʉMʉtwa ghwitu. Ʉvʉvaha, ingʉfu nʉ vʉtavʉlɨlua fili nʉ mwene kuhʉma mʼbʉkʉʉlʉ, amasiki agha, na kʉvʉsila kʉsila. Ameni!