Avavɨli ava kyangʼhaani na va vʉdesi
4
Vaghanɨke vango,
avavɨli ava vʉdesi mwevale vinga mʉ ɨɨsi.
Lɨno,
namʉngakelaghe kʉkʉmwɨtɨka ʉmuunhu jʉno iiti alɨ nʉ Mhepo ghwa Ngʉlʉve,
ʉlwene mʉmʉghelaghe nave ilongosivua nʉ Mhepo ʉjuo.
2 Ɨsɨla ɨja kʉkagʉla kuuti ʉmuunhu ilongosivua nʉ Mhepo ghwa Ngʉlʉve je ɨjɨ:
Ʉmuunhu ghweni jʉno ikwɨtɨka kuuti ʉYesu ghwe Kɨlɨsite,
alisile mʉ ɨɨsi akava muunhu,
ʉjuo ilongosivua nʉ Mhepo ghwa Ngʉlʉve.
3 Neke ʉmuunhu ghweni jʉno naɨkʉmwɨtɨka ʉYesu,
nailongosivua nʉ Mhepo ghwa Ngʉlʉve.
Ʉmuunhu ʉjuo,
ilongosivua nʉ mhepo ghwa mʉlʉgʉ ghwa Kɨlɨsite.
Ʉmhepo ʉjuo ʉghwa mʉlʉgʉ jʉno mʉpʉliike kuuti ikwisa,
lɨno isile,
alɨ mʉ ɨɨsi.
4 Vanango,
ʉmue mʉlɨ vaanhu va Ngʉlʉve,
mʉvalemile avavɨli ava vʉdesi,
ʉlwakʉva ʉMhepo ghwa Ngʉlʉve alɨ nkate mʉlyʉmue.
Ʉmwene alɨ ni ngʉfu kukila ʉmhepo jʉno ɨkʉvalongosia avaanhu ava mʉ ɨɨsi.
5 Avavɨli avuo ava vʉdesi va mʉ ɨɨsi,
vijova isa mʉ ɨɨsi,
voope avaanhu ava mʉ ɨɨsi,
vikʉvapʉlɨkɨsia.
6 Neke ʉsue tʉlɨ vaanhu va Ngʉlʉve.
Ʉmuunhu jʉno ankagwile ʉNgʉlʉve,
ɨkʉtʉpʉlɨkɨsia;
looli ʉmuunhu jʉno naankagwile ʉNgʉlʉve,
naɨkʉtʉpʉlɨkɨsia.
Mʉ ʉluo,
pe tukagʉla avaanhu vano vilongosivua nʉ Mhepo ghwa kyangʼhaani na vano vilongosivua nʉ mhepo ghwa vʉdesi.
Ʉlʉghano lwa Ngʉlʉve
7 Vaghanɨke vango,
tʉghananaghe,
ʉlwakʉva ʉlʉghano luhʉma kwa Ngʉlʉve.
Ʉmuunhu ghweni jʉno ɨkʉvaghana avange,
mwana ghwa Ngʉlʉve,
kange ankagwile ʉNgʉlʉve.
8 Neke ʉmuunhu jʉno naɨkʉvaghana avange,
naankagwile ʉNgʉlʉve,
ʉlwakʉva ʉNgʉlʉve ghwe lʉghano.
9 ɄNgʉlʉve alyahʉfisie ʉlʉghano lwake kʉlyʉsue mʉlwa kʉnsuungʼha mʉ ɨɨsi ʉMwanaake jʉno alɨ jʉmo mwene,
kuuti vwɨmɨla ʉMwanaake ʉjuo tʉkave ʉvwʉmi.
10 Ʉlʉghano lwa kyangʼhaani lwe ʉlʉ:
Nakwekʉti ʉsue tʉkamʉghanile ʉNgʉlʉve,
looli ʉmwene ghwe jʉno alyatʉghanile taasi ʉsue,
akansuungʼha ʉMwanaake,
kuuti aave lɨtekelo lɨno lɨkʉtʉpelela kupyanɨlua ʉvʉhosi vwitu.
11 Vaghanɨke vango,
nave ʉNgʉlʉve alyatʉghanile ʉsue enendɨɨkɨ,
na jʉsue tʉnoghiile kughanana.
12 Nakwale ʉmuunhu jʉno aghelile pikʉmwagha ʉNgʉlʉve nambe lʉsiku.
Neke nave tughanana,
ʉNgʉlʉve iiva nkate mʉlyʉsue.
Kange,
nalʉ lʉghano lwake nkate mʉlyʉsue luuva lwa kyangʼhaani.
13 Tʉkagwile kuuti tʉlɨ mwa Ngʉlʉve,
kange ʉNgʉlʉve ikukala nkate mʉlyʉsue,
ʉlwakʉva atʉpeliile ʉMhepo ghwake.
14 Ʉsue tʉmwaghile na kʉkʉvoleka avange kuuti ʉNgʉlʉve ʉNhaata,
alyansungʼhile ʉMwanaake kuuti aave Mpoki ghwa vaanhu vooni.
15 Ʉmuunhu ghweni jʉno ikwɨtɨka kuuti,
ʉYesu Mwana ghwa Ngʉlʉve,
ʉNgʉlʉve iiva nkate mwa mwene,
ghwope ʉmuunhu ʉjuo iiva nkate mwa Ngʉlʉve.
16 Lɨno,
ʉsue tʉkagwile na kukwɨtɨka kuuti ʉNgʉlʉve atʉghanile.
ɄNgʉlʉve ghwe lʉghano.
Ʉmuunhu ghweni jʉno alɨ nʉ lʉghano,
alɨ mwa Ngʉlʉve,
ghwope ʉNgʉlʉve ikukala nkate mwa muunhu ʉjuo.
17 Mʉ ʉluo,
ʉlʉghano lwa kyangʼhaani lʉlɨ nkate mʉlyʉsue,
neke tʉʉve vasila vwoghofi ɨkɨghono ɨkya vʉhɨghi,
ʉlwakʉva ʉsue mʉ ɨɨsi tukukala ndavʉle ʉYesu vʉle alyale mʉ ɨɨsi muno.
18 Pano pwelʉle ʉlʉghano,
pasila lʉdwesi,
ʉlʉghano lwa kyangʼhaani luvʉsia ʉlʉdwesi lwoni.
Ʉlwakʉva ɨkɨghono kya vʉhɨghi kye kɨno kɨkʉvavɨɨka avaanhu vaave nʉ lʉdwesi.
Ʉmuunhu ghweni jʉno alɨ nʉ lʉdwesi,
ʉlʉghano ʉlwa kyangʼhaani namwelʉle nkate mwa mwene.
19 Ʉsue tʉlɨ nʉ lʉghano,
ʉlwakʉva ʉNgʉlʉve alyatʉghanile taasi.
20 Nave ʉmuunhu iiti amʉghanile ʉNgʉlʉve,
neke naamʉghanile ʉmwɨtɨki ʉnʼjaake,
ʉjuo nʼdesi.
Ʉlwakʉva ʉmuunhu jʉno naamʉghanile ʉmwɨtɨki ʉnʼjaake jʉno ɨkʉmwagha,
naangamʉghane ʉNgʉlʉve jʉno naivoneka na maaso.
21 ɄNgʉlʉve atʉpeliile ʉlʉlaghɨlo kuuti,
ʉmuunhu ghweni jʉno ɨkʉmʉghana ʉmwene,
amʉghanaghe najʉ mwɨtɨki ʉnʼjaake.a