5
Ʉmuunhu ghweni jʉno ikwɨtɨka kuuti ʉYesu ghwe Kɨlɨsite,
ʉjuo mwana ghwa Ngʉlʉve.
Ʉmuunhu jʉno ɨkʉmʉghana ʉviise ghwa mwana,
ɨkʉmʉghana najʉ mwana.
2 Mʉ ʉluo tʉkagwile kuuti tʉvaghanile avaana va Ngʉlʉve,
pano tʉkʉmʉghana ʉNgʉlʉve na kuvɨngɨlɨla indaghɨlo saake.
3 Kʉkʉmʉghana ʉNgʉlʉve,
kwe kʉvɨngɨlɨla indaghɨlo saake.
Kange indaghɨlo saake,
nanhalamu kʉkʉsivɨngɨlɨla.
4 Ʉmuunhu ghweni jʉno mwana ghwa Ngʉlʉve,
ɨkʉsilema isa mʉ ɨɨsi.
Enendɨɨkɨ fye tʉkʉsilema isa mʉ ɨɨsi,
vwɨmɨla ʉlwɨtɨko lwitu kwa Yesu.
5 Asi,
ghwe veeni jʉno ndepoonu ɨkʉsilema isa mʉ ɨɨsi?
Ghwe jʉno ikwɨtɨka kuuti,
ʉYesu Mwana ghwa Ngʉlʉve.
Ʉvwolesi vwɨmɨla ʉYesu Kɨlɨsite
6 ɄYesu Kɨlɨsite ghwe jʉno alisile mʉ ɨɨsi,
akofughua na malenga,
pambele akafua na kukuungʼa ɨdanda pa kɨkovekano.
Nakwekʉti alisile kukwofughua kwene,
looli kukwofughua na kufua pa kɨkovekano.
Ghwope ʉMhepo ʉMwɨmɨke ikwoleka kuuti isio sa kyangʼhaani,
ʉlwakʉva ʉMhepo ʉMwɨmɨke ghwe kyangʼhaani.
7 Lɨno,
kwevale vatatu vano vikwoleka ʉvwakyangʼhaani vwɨmɨla ʉYesu.
8 Vatatu avuo ve ava:
ʉMhepo,
amalenga nɨ danda.
Ve vataatu avuo ʉvwolesi vwave vukwɨtɨngʼhana.a
9 Nave tukwɨtɨka ʉvwolesi vwa vaanhu,
ʉvwolesi vwa Ngʉlʉve vwe vʉvaha kukila ʉvuo,
ʉlwakʉva ʉvuo vwe vwolesi vʉno ʉNgʉlʉve ahʉfisie vwɨmɨla ʉMwanaake.
10 Ʉmuunhu jʉno ɨkʉmwɨtɨka ʉMwana ghwa Ngʉlʉve,
alɨ nʉ vwolesi ʉvuo nkate mwa mwene.
Looli ʉmuunhu jʉno naɨkʉmwɨtɨka ʉNgʉlʉve,
ɨkʉmʼbɨɨka ʉNgʉlʉve kuuti nʼdesi,
ʉlwakʉva naɨtiike ʉvwolesi vwa Ngʉlʉve vʉno ahʉfisie vwɨmɨla imhola isa Mwanaake.
11 Ʉvwolesi ʉvuo vwe ʉvʉ:
ɄNgʉlʉve atʉpeliile ʉvwʉmi ʉvwa kʉvʉsila kʉsila,
tukava ʉvwʉmi ʉvuo kuhʉma kwa Mwanaake.
12 Ʉmuunhu jʉno alɨ mwa Mwana ghwa Ngʉlʉve,
alɨ nʉ vwʉmi ʉvwa kʉvʉsila kʉsila.
Neke jʉno naalɨ mwa Mwana ghwa Ngʉlʉve,
nsila vwʉmi ʉvuo.
Amasio agha vʉsililo
13 Nɨvalembiile amasio agha,
ʉmue mwe vano mʉkʉmwɨtɨka ʉMwana ghwa Ngʉlʉve,
neke mʉkagʉle kuuti mʉlɨ nʉ vwʉmi ʉvwa kʉvʉsila kʉsila.
14 Tʉlɨ vasila nganighani pamaaso gha Ngʉlʉve,
ʉlwakʉva tʉkagwile kuuti nave tʉkʉnsʉʉma kɨmonga,
mʉ vughane vwake,
ɨkʉtʉpʉlɨka.
15 Lɨno,
nave tʉkagwile kuuti tʉngansʉʉme kɨmonga,
ɨkʉtʉpʉlɨka,
apuo tukagʉla kuuti ɨkʉtʉpeela fyoni fino tʉkʉnsʉʉma.
16 Nave ʉmuunhu jʉmonga mʉlyʉmue ɨkʉmwagha ʉmwɨtɨki ʉnʼjaake,
ivomba isa vʉhosi sino nasikʉmpelela kuuva patali nʉ Ngʉlʉve,b
ansʉmɨlaghe kwa Ngʉlʉve.
ɄNgʉlʉve ɨkʉmpeela ʉvwʉmi ʉmhosi ʉjuo.
Ʉluo luuva enendɨɨkɨ kʉ vano vivomba isa vʉhosi sino nasikʉvapelela kuuva patali nʉ Ngʉlʉve.
Neke kwevʉle ʉvʉhosi vʉno vʉkʉmpelela ʉmuunhu aave patali nʉ Ngʉlʉve.
Ʉne naniiti mʉnsʉmɨlaghe kwa Ngʉlʉve,
ʉmuunhu jʉno ivomba ʉvʉhosi ndavʉle ʉvuo.
17 Kuvomba sino nasinoghiile pamaaso gha Ngʉlʉve,
vʉhosi.
Neke kwevʉle ʉvʉhosi vʉno navʉkʉmpelela ʉmuunhu kuuva patali nʉ Ngʉlʉve.
18 Tʉkagwile kuuti,
ʉmuunhu ghweni jʉno mwana ghwa Ngʉlʉve,
naivomba isa vʉhosi,
ʉlwakʉva ʉNgʉlʉve ɨkʉvalolelela,
ʉMhosi ʉSetano naangavavombe kɨmonga.
19 Tʉkagwile kuuti,
ʉsue tʉlɨ vaana va Ngʉlʉve.
Avaanhu vooni vano navankagwile ʉNgʉlʉve valɨ mʉ vʉkamɨngʼhanɨlua vwa Mhosi ʉSetano.
20 Kange,
tʉkagwile kuuti ʉMwana ghwa Ngʉlʉve isile,
atʉpeliile ʉvʉkagʉsi kuuti tʉnkagʉle ʉNgʉlʉve ʉghwa kyangʼhaani.
Ʉsue tʉlɨ vʉmo nʉ Ngʉlʉve ʉghwa kyangʼhaani,
ʉlwakʉva tʉlɨ vʉmo nʉ Mwanaake,
ʉYesu Kɨlɨsite.
Ʉjʉ ghwe Ngʉlʉve ʉghwa kyangʼhaani,
ghwe vwʉmi ʉvwa kʉvʉsila kʉsila.
21 Vanango,
mʉvisaghe maaso namʉngɨmɨkaghe ifihwani ifya mangʉlʉve.