3
Lolagha,
ʉNgʉlʉve ʉNhaata vʉle atʉghanile fiijo,
kuhanga tutambʉlua vanaake!
Kyangʼhaani fye tʉlɨvuo.
Neke avaanhu vano navikʉmwɨtɨka ʉNgʉlʉve navakagwile kuuti tʉlɨ vaana vaake,
ʉlwakʉva navankagwile ʉmwene.
2 Vaghanɨke vango,
lɨno tʉlɨ vaana va Ngʉlʉve,
neke nalʉkagʉliike vʉnono vʉle tuliiva.
Looli tʉkagwile kuuti,
ʉnsiki ghʉno ʉKɨlɨsite alaava igomoka,
tulihwanana nʉ mwene,
ʉlwakʉva tulikʉmwagha vʉle alɨvuo.
3 Ʉmuunhu ghweni jʉno ihʉvɨɨla ʉluo,
ivalasyaghe neke aave mʉgholofu ndavʉle ʉKɨlɨsite vʉle alɨvuo.
4 Ʉmuunhu ghweni jʉno ivomba isa vʉhosi,
iiva ideenya indaghɨlo sa Ngʉlʉve,
ʉlwakʉva ʉvʉhosi,
kwe kʉdeenya indaghɨlo sa Ngʉlʉve.
5 Ʉmue mʉkagwile kuuti ʉKɨlɨsite alisile kuvʉsia ʉvʉhosi vwitu,
neke ʉmwene nsila nkole nambe ghʉmo.
6 Lɨno,
ʉmuunhu ghweni jʉno alɨ mwa Kɨlɨsite,
naivomba isa vʉhosi.
Neke ʉmuunhu jʉno ivomba isa vʉhosi,
naalʉtangʼhinie kuuti ʉKɨlɨsite ghwe veeni,
kange naankagwile.
7 Vanango,
lɨno ʉmuunhu ghweni naangavasyangaghe.
Ʉmuunhu jʉno ivomba isa vʉgholofu,
ʉjuo mʉgholofu ndavʉle ʉKɨlɨsite vʉle alɨvuo.
8 Looli ʉmuunhu jʉno ivomba isa vʉhosi,
ʉjuo muunhu ghwa Setano,
ʉlwakʉva ʉSetano ivomba isa vʉhosi kuhʉma mʼbʉkʉʉlʉ.
Fye nambe ʉMwana ghwa Ngʉlʉve alisile mʉ ɨɨsi,
kuuti asinanganie imbombo sa Setano.
9 Ʉmuunhu ghweni jʉno mwana ghwa Ngʉlʉve,
naivomba isa vʉhosi,
ʉlwakʉva ingʉfu sa Ngʉlʉve sili mwa mwene.
Kange,
naangavombe isa vʉhosi,
ʉlwakʉva mwana ghwa Ngʉlʉve.
10 Neke ʉmuunhu jʉno naivomba inofu,
nambe jʉno naamʉghanile ʉmwɨtɨki ʉnʼjaake,
ʉjuo namwana ghwa Ngʉlʉve.
Ʉluo lwe lʉno luhʉfia avaana va Ngʉlʉve,
na vaana va Setano.
Tʉghananaghe
11 Ɨmhola jɨno mʉkapʉliike kuhʉma ye mukwɨtɨka je ɨjɨ:
Tʉghananaghe!
12 Tʉlekaghe kuuva ndavʉle ʉKaini,
jʉno alyale ghwa Mhosi ʉSetano,
akamʼbuda ʉnnuuna.a
ɄKaini alyamʼbudile ʉnnuuna,
ʉlwakʉva imbombo saake silyale mbiivi,
looli imbombo isa nnuuna silyale sa vʉgholofu.
13 Lɨno mwe vɨtɨki vajango,
namʉngadeghaghe pano avaanhu ava mʉ ɨɨsi muno vikʉvakalalɨla.
14 Ʉsue tʉkagwile kuuti tʉhʉmile mʉ vʉfue,
twingiile mʉ vwʉmi ʉvwa kʉvʉsila kʉsila.
Tʉkagwile ʉluo,
ʉlwakʉva tʉvaghanile avɨtɨki avajiitu.
Neke ʉmuunhu jʉno naɨkʉvaghana avɨtɨki avajaake ajiighe mʉ ngʉfu sa vʉfue.b
15 Ʉmuunhu jʉno ɨkʉnkalalɨla ʉmwɨtɨki ʉnʼjaake,
mʼbudi.
Na jʉmue mʉkagwile kuuti,
ʉmuunhu ʉmʼbudi,
ʉvwʉmi ʉvwa kʉvʉsila kʉsila namwevʉle nkate mwa mwene.
16 Ʉsue tʉlʉkagwile ʉlʉghano,
ʉlwakʉva ʉKɨlɨsite alyafwile vwɨmɨla ʉsue.
Na jʉsue tʉnoghiile kʉkʉvatanga avajiitu,
nambe kʉʉve kwe kʉfua.
17 Nave ʉmuunhu alɨ ni fiinu finga,
ɨkʉmwagha ʉnʼjaake aghilue,
neke naɨkʉnsʉngʉkɨla kʉkʉntanga,
asi,
ʉmuunhu ʉjuo alɨ nʉ lʉghano lwa Ngʉlʉve?
18 Vanango,
tʉlekaghe kujova ghʉ mʉlomo kuuti tʉvaghanile avajiitu,
looli tʉvaghanaghe avajiitu kyangʼhaani mʉlwa kʉvatanga fino vaghilue.
19 Tʉngaghananaghe enendɨɨkɨ,
apuo lweli tuuva tuvɨngɨlɨla ʉvwakyangʼhaani,
kange amoojo ghiitu ghitengaana pamaaso gha Ngʉlʉve.
20 Nambe tuhɨghua mʉ moojo ghiitu,
tʉkagwile kuuti ʉNgʉlʉve mʼbaha kukila vʉle tuhɨghua mʉ moojo ghiitu,
kange ʉmwene asikagwile sooni.
21 Vaghanɨke vango,
nave natukupʉlɨka kuhɨghua mʉ moojo ghiitu,
pe tuuva vasila vwoghofi pamaaso gha Ngʉlʉve.
22 Kange,
sooni sino tʉkʉnsʉʉma tukwʉpɨla kuhʉma kwa mwene,
ʉlwakʉva tugadɨlɨla indaghɨlo saake na kuvomba sino ikeela ʉmwene.
23 Lɨno,
ʉlʉlaghɨlo lwake lwe ʉlʉ:
Tʉmwɨtɨkaghe ʉMwanaake ʉYesu Kɨlɨsite na kughanana ndavʉle alyalaghiile.
24 Ʉmuunhu jʉno igadɨlɨla indaghɨlo sa Ngʉlʉve,
iiva mwa mwene,
ghwope ʉNgʉlʉve ikukala nkate mwa mwene ʉmuunhu ʉjuo.
Tʉkagwile kuuti,
ʉNgʉlʉve ikukala nkate mʉlyʉsue vwɨmɨla ʉMhepo ʉMwɨmɨke jʉno atʉpeliile.