ɄKɨlɨsite ɨkʉtʉsʉmɨla kwa Ngʉlʉve
2
Vanango,
nɨkʉvalembela imhola isi,
kuuti mʉvʉlekaghe ʉvʉhosi.
Neke nave ʉmuunhu ghweni ahokile,
tʉlɨ naghwo jʉno ɨkʉtʉsʉmɨla kwa Nhaata ʉNgʉlʉve.
Ʉjuo ghwe Yesu Kɨlɨsite,
ʉMʉgholofu.
2 ɄKɨlɨsite ʉjuo,
ghwe lɨtekelo lɨno lɨkʉtʉpelela kupyanɨlua ʉvʉhosi vwitu nʉ Ngʉlʉve.
Nakwekʉti vʉ vʉhosi vwitu vwene,
looli nʉ vʉhosi vwa vaanhu vooni.
3 Nave tuvɨngɨlɨla indaghɨlo sa Ngʉlʉve,
apuo kyangʼhaani tuuva tʉnkagwile ʉmwene.
4 Ʉmuunhu jʉno iiti ankagwile ʉNgʉlʉve,
neke naivɨngɨlɨla indaghɨlo saake,
ʉjuo nʼdesi,
navʉ vwakyangʼhaani namwevʉle nkate mwa mwene.
5 Looli,
ʉmuunhu ghweni jʉno ivɨngɨlɨla ɨlɨsio lya Ngʉlʉve,
ʉjuo ghwe jʉno amʉghanile ʉNgʉlʉve kyangʼhaani.
Ɨkɨɨnu kɨno kɨkʉtʉpelela kukagʉla kuuti tʉlɨ mwa Ngʉlʉve kye ɨkɨ:
6 Ʉmuunhu jʉno iiti alɨ mwa Ngʉlʉve,
avisaghe nʉ lʉveelo ʉlʉnono ndavʉle ʉYesu vʉle alɨvuo.
Ʉlʉlaghɨlo ʉlwa kʉghanana
7 Vaghanɨke vango,
nanɨkʉvalembela ʉlʉlaghɨlo ʉlʉpia,
looli lwe lʉla lʉla,
ʉlʉkʉʉlʉ lʉno mʉlyale nalwo kuhʉma ye mukwɨtɨka.
Ʉlʉlaghɨlo ʉluo,
je mhola jɨla jɨno mʉlyapʉliike.a
8 Neke ʉlʉbale ʉlʉnge,
ʉlʉlaghɨlo ʉlʉ lʉno nɨkʉvalembela lʉpia,
lʉno ʉvwakyangʼhaani vwake vuvoneka mwa Yesu na mʉnkate mʉlyʉmue,
ʉlwakʉva ɨngʼhiisi jivʉʉka,
ʉlʉmuli lwa kyangʼhaani lumulika.
9 Ʉmuunhu jʉno iiti alɨ mʉ lʉmuli,
neke naamʉghanile ʉmwɨtɨki ʉnʼjaake,
ʉjuo ajiighe mʉ ngʼhiisi.
10 Neke ʉmuunhu jʉno ɨkʉmʉghana ʉmwɨtɨki ʉnʼjaake,
ʉjuo alɨ mʉ lʉmuli.
Nkate mwa mwene,
namwekɨlɨ nambe kɨmonga ɨkya kʉmpelela kuhoka.
11 Looli,
ʉmuunhu jʉno naamʉghanile ʉmwɨtɨki ʉnʼjaake,
alɨ mʉ ngʼhiisi,
ighenda mʉ ngʼhiisi kɨsila kʉkagʉla kʉno ilʉta,
ʉlwakʉva ɨngʼhiisi jɨnkupikiile.
12 Nɨkʉvalembela ʉmue mwe vaana,
ʉlwakʉva mʉpyanilue ʉvʉhosi vwinu
mʉ lɨtavua lya Yesu Kɨlɨsite.
13 Nɨkʉvalembela ʉmue mwe vakɨnhaata,
ʉlwakʉva mʉnkagwile ʉYesu Kɨlɨsite,
jʉno kwealyale kuhʉma kʉvʉtengʉlɨlo.
Nɨkʉvalembela ʉmue mwe vasoleka,
ʉlwakʉva mʉmʉlemile ʉMhosi ʉSetano.
14 Nɨkʉvalembela ʉmue mwe vaana,
ʉlwakʉva mʉnkagwile ʉNgʉlʉve ʉNhaata.
Nɨkʉvalembela ʉmue mwe vakɨnhaata,
ʉlwakʉva mʉnkagwile ʉYesu Kɨlɨsite,
jʉno kwealyale kuhʉma kʉvʉtengʉlɨlo.
Nɨkʉvalembela ʉmue mwe vasoleka,
ʉlwakʉva mʉlɨ ni ngʉfu,
mʉgadɨliile ɨlɨsio lya Ngʉlʉve,
kange mʉmʉlemile ʉMhosi ʉSetano.
15 Lɨno,
mʉlekaghe kʉkʉjɨghana ɨɨsi,
nambe kʉkʉsighana isa mʉ ɨɨsi.
Nave ʉmuunhu ɨkʉjɨghana ɨɨsi,
kʉkʉmʉghana ʉNgʉlʉve ʉNhaata,
nakwekʉle mʉ mwojo ghwake.
16 Ʉlwakʉva isa mʉ ɨɨsi se isi:
ʉvʉnoghelua vwa mʼbɨlɨ,
ʉvʉnoghelua vwa kuuva nafyo fyoni fino ʉkʉfyagha nʉ lughinio vwɨmɨla ɨkyʉma.
Sooni isio nasihʉma kwa Ngʉlʉve ʉNhaata,
looli sihʉma mʉ ɨɨsi muno.
17 Ɨɨsi palɨkɨmo nʉ vʉnoghelua vwake fikila,
looli ʉmuunhu jʉno ivomba sino ikeela ʉNgʉlʉve,
ʉjuo alɨ nʉ vwʉmi ʉvwa kʉvʉsila kʉsila.
Ʉlʉpavɨlo vwɨmɨla avalʉgʉ va Kɨlɨsite
18 Vanango,
ifighono ifya vʉsililo fifikile!
Mʉkapʉliike kuuti ʉmʉlʉgʉ ghwa Kɨlɨsiteb ikwisa,
nambe lɨno avalʉgʉ vinga va Kɨlɨsite pwevale.
Mʉ ʉluo,
tukagʉla kuuti ifighono ifya vʉsililo fifikile.
19 Avalʉgʉ avuo vahʉmile mʉ fipʉgha fiitu ifya vɨtɨki,
neke navakaale nʉ vʉmo ʉvwa kyangʼhaani nusue.
Ʉlwakʉva vale vaave nʉ vʉmo ʉvwa kyangʼhaani nusue,
ngale vajiighe palɨkɨmo nusue.
Neke vwɨmɨla kuvʉʉka avaanhu avuo,
lʉvoniike pa vʉvalafu kuuti navakaale vʉmo nusue.
20 Neke ʉmue ʉNgʉlʉve avapeliile ʉMhepo ʉMwɨmɨke,c
lɨno mʉkagwile ʉvwakyangʼhaani.
21 Pano nɨkʉvalembela ɨkalata ɨjɨ,
nakwekʉti namʉkagwile ʉvwakyangʼhaani,
looli ʉlwakʉva mʉvʉkagwile.
Kange,
mʉkagwile kuuti nakwevʉle ʉvʉdesi vʉno vuhʉma mʉ vwakyangʼhaani.
22 Ʉmuunhu ʉnʼdesi ghwe veeni?
Ʉmuunhu ʉnʼdesi ghwe jʉno iiti ʉYesu naghwe Kɨlɨsite.d
Ʉjuo,
ghwe mʉlʉgʉ ghwa Kɨlɨsite,
ɨkʉnkaana ʉNgʉlʉve ʉNhaata nʉ Mwanaake.
23 Ʉmuunhu ghweni jʉno ɨkʉnkaana ʉMwana ghwa Ngʉlʉve ʉNhaata,
iiva ɨkʉnkaana najʉ Ngʉlʉve ʉNhaata.
Looli,
ʉmuunhu jʉno ɨkʉmwɨtɨka ʉMwana ghwa Ngʉlʉve,
iiva ɨkʉmwɨtɨka najʉ Ngʉlʉve ʉNhaata.
24 Lɨno,
amasio ghano mʉkapʉliike kuhʉma ʉlʉtasi,
mʉgadɨlɨlaghe.
Nave mugadɨlɨla amasio aghuo,
apuo pe muuva vʉmo nʉ Mwana ghwa Ngʉlʉve,
palɨkɨmo nʉ Ngʉlʉve ʉNhaata.
25 Mʉ ʉluo tuuva nʉ vwʉmi ʉvwa kʉvʉsila kʉsila vʉno ʉKɨlɨsite alyatʉlaghile kʉkʉtʉpeela.
26 Nɨkʉvalembela imhola isi vwɨmɨla avaanhu vano vilonda kʉkʉvasofia.
27 Ʉmue,
ʉNgʉlʉve avapeliile ʉMhepo ʉMwɨmɨke.
ɄMhepo ʉjuo ikukala nkate mʉlyʉmue,
ghwe jʉno ɨkʉvavʉlanɨsia sooni,
ʉlwakʉva imbʉlanɨsio saake nasa vʉdesi,
looli sa kyangʼhaani.
Lɨno,
namulondua kuvʉlanɨsɨvua nʉ jʉnge.e
Ʉlwene,
mʉvɨngɨlɨlaghe imbʉlanɨsio sa Mhepo ʉMwɨmɨke,
mʉjighaghe mwa Kɨlɨsite.
Avaana va Ngʉlʉve
28 Lɨno vanango,
mʉjighaghe vʉmo nʉ Kɨlɨsite,
kuuti ʉnsiki ghʉno alaava igomoka,
tʉlekaghe kukwoghopa nambe kuvona soni pamaaso ghaake.
29 Nave mʉkagwile kuuti ʉKɨlɨsite mʉgholofu,
mʉkagʉlaghe kuuti,
ʉmuunhu ghweni jʉno ivomba isa vʉgholofu,
ʉjuo mwana ghwa Ngʉlʉve.