Ʉntekesi ʉMelekisedeki
7
ɄMelekisedeki ʉjuo alyale ntwa ghwa lɨkaaja lɨno lɨkatambʉlwagha Salemu,
kange alyale ntekesi ghwa Ngʉlʉve ʉMʼbaha ghwa fyoni.
ɄAbulahamu ye igomoka kuhʉma kʉno alyale ilua ɨlɨlʉgʉ,
kʉno akavalema avatwa vane,
akatangʼhana nʉ Melekisedeki.
ɄMelekisedeki akamfuunya ʉAbulahamu.
2 Pe ʉAbulahamu akampeela ʉMelekisedeki ifiinu ɨkɨlʉndo kɨmo mʉ filʉndo kɨjigho mʉ fyoni fino alyaghomile kʉ lɨlʉgʉ.
Ʉmʉlʉvo ghwa lɨtavua ɨlɨ Melekisedeki kwekʉti,
“Ʉntwa ʉmʉgholofu.”
Kange,
itambʉlua ntwa ghwa Salemu,
kwekʉti,
“Ʉntwa ghwa lʉtengaano.”a
3 Nakwejɨlɨ ɨmhola jɨno jikwoleka ʉviise nambe ʉngʼina ghwa Melekisedeki,
nambe ɨkɨkolo kyake.
Nakʉlɨ mhola jɨno jikwoleka vwɨmɨla kuholua nambe kufua kwa mwene.
Ʉmwene ntekesi ghwa masiki ghooni,
ndavʉle ʉMwana ghwa Ngʉlʉve.
4 Lɨno,
lolagha ʉMelekisedeki vʉle alyale mʼbaha,
najʉ Abulahamu,
ʉnkʉʉlʉ ghwitu,
alyampeliile ifiinu ɨkɨlʉndo kɨmo mʉ filʉndo kɨjigho mʉ fyoni fino alyaghomile kʉ lɨlʉgʉ.
5 Indaghɨlo isa Moose siiti,
avaanhu vooni ava kɨkolo kya Leevi,b
vano vatekesi vapelwaghe ifiinu ɨkɨlʉndo kɨmo mʉ filʉndo kɨjigho mʉ fyoni fino valɨ nafyo avajanave aVaisilaeli.
Vakavombagha ʉluo napano vooni valyale kɨsina kɨmo kɨno kɨlyahʉmile kwa Abulahamu.
6 Neke ʉMelekisedeki naalyale ghwa kɨkolo kya Leevi,
alyʉpiile ifiinu ɨkɨlʉndo kɨmo mʉ filʉndo kɨjigho kuhʉma kwa Abulahamu.
Kange,
akamfuunya ʉAbulahamu jʉno ʉNgʉlʉve alyamʉlaghile kuuti ilikʉmfuunya.
7 Tweni tʉkagwile kuuti,
ʉmuunhu ʉnʼdebe ifunyua nʉ mʼbaha.
8 Avatekesi avuo ava kɨkolo kya Leevi vano vikwʉpɨla ifiinu ɨkɨlʉndo kɨmo mʉ filʉndo kɨjigho,
vifua.
Neke ʉMelekisedeki jʉno alyʉpiile ifiinu ɨkɨlʉndo kɨmo mʉ filʉndo kɨjigho kuhʉma kwa Abulahamu,
mwʉmi ifighono fyoni.
9 Mʉ ʉluo ndepoonu twiti,
najʉ Leevi jʉno ɨkɨkolo kyake kikwʉpɨla ifiinu ɨkɨlʉndo kɨmo mʉ filʉndo kɨjigho,
alyahʉmisie kwa Melekisedeki ifiinu ɨkɨlʉndo kɨmo mʉ filʉndo kɨjigho kukilila kwa Abulahamu.
10 Lʉlɨ enendɨɨkɨ,
ʉlwakʉva ʉAbulahamu ye itangʼhana nʉ Melekisedeki,
ʉLeevi alyale mʉ mʼbɨlɨ ghwa Abulahamu,
kwekʉti alyakyale kuholua nʉ Abulahamu.
Ʉvʉtekesi vwa Yesu nʉ vwa kɨkolo ɨkya Leevi
11 Vwɨmɨla ʉvʉtekesi ʉvwa kɨkolo ɨkya Leevi,
aVaisilaeli valyapelilue indaghɨlo sa Moose.
Lɨno,
ɨmbombo ɨja vʉtekesi ɨja kɨkolo kya Leevi jaale jɨkwɨlanaghe,
nakwale kuuva nʉ vʉfumbue kange ʉvwa kwisa ʉvʉtekesi ʉvʉnge ndavʉle ʉvwa Melekisedeki,
vʉno navʉlɨ ndavʉle ʉvwa Aloni.c
12 Kange,
ʉvʉtekesi vʉngandʉke,
nasi ndaghɨlo sinoghiile kukwandʉka.
13 Lɨno,
ʉMʉtwa ghwitu ʉYesu jʉno ɨmhola jooni jijova vwɨmɨla ʉmwene,
naihʉma mʉ kɨkolo ɨkya Leevi.
Kange,
nakwale ʉmuunhu ʉjʉnge mʉ kɨkolo kyake jʉno alyavombile ɨmbombo ɨja vʉtekesi.
14 Lʉkagʉliike kuuti,
ʉMʉtwa ghwitu ʉYesu alyahʉmile mʉ kɨkolo ɨkya Yuuda.
ɄMoose ye ijova ʉvʉtekesi,
naalyajovile kɨmonga ɨkya vʉtekesi kuhʉma mʉ kɨkolo ɨkio.
15 Isi sino nijova lɨno sili pa vwelu,
ʉntekesi ʉjʉnge jʉno alɨ ndavʉle ʉMelekisedeki isile.
16 Ʉmwene nantekesi kuhʉma mʉ kɨkolo kya Leevi,
ndavʉle indaghɨlo vʉle silʉngɨka,
looli ntekesi vwɨmɨla ingʉfu isa vwʉmi vwake ʉvʉsila vʉsililo.
17 Tʉkagwile isi,
ʉlwakʉva aMalembe aMɨmɨke ghiiti,
“Ʉve ʉlɨ ntekesi ghwa masiki ghooni,
ndavʉle alyale ʉMelekisedeki.”d
18 Lɨno,
indaghɨlo ingʼhʉʉlʉ,
ʉNgʉlʉve avʉsisie,
ʉlwakʉva sisila ngʉfu,
kange nasitanga kɨmonga.
19 Indaghɨlo isio silyakunilue kʉkʉvavɨɨka avaanhu kuuva vakwɨlanɨfu.
Neke lɨno ʉNgʉlʉve atʉpeliile ʉlʉhʉvɨɨlo ʉlʉnono lʉno lʉkʉtʉvɨɨka kuuva piipi nʉ Mwene.
20 Ʉvʉtekesi vwa Kɨlɨsite vʉlɨ nʉ lʉjɨɨgho lwa Ngʉlʉve,
neke ʉvʉtekesi ʉvwa kɨkolo kya Leevi vʉlyale vʉsila lʉjɨɨgho.
21 ɄKɨlɨsite avɨkilue kuuva ntekesi nʉ lʉjɨɨgho,
ndavʉle lɨlembilue mʉ Malembe aMɨmɨke kuuti,
“ɄMʉtwa ʉNgʉlʉve ajɨghile,
naangandʉle ʉvʉfumbue vwake.
‘Ʉve ʉlɨ ntekesi ghwa masiki ghooni.’ ”e
22 Lɨno,
vwɨmɨla ʉlʉjɨɨgho ʉluo,
ʉYesu ghwe jʉno ivonia kuuti ʉlʉfingo ʉlʉpiaf lʉnofu kukila ʉlʉkʉʉlʉ.
23 Mʉ Lʉfingo ʉLʉkʉʉlʉg avatekesi valyale vinga,
ʉmuunhu jʉmo naakavisagha ntekesi ifighono fyoni,
ʉlwakʉva vakafwisagha.
24 Looli ʉYesu,
ntekesi ghwa masiki ghooni,
ʉlwakʉva mwʉmi amasiki ghooni.
25 Mʉ ʉluo alɨ ni ngʉfu amasiki ghooni kupoka avaanhu vano vikwisa kwa Ngʉlʉve kukilila ʉmwene,
ʉlwakʉva ʉmwene mwʉmi amasiki ghooni kʉkʉvasʉmɨla kwa Ngʉlʉve.
26 Lɨno,
ʉNgʉlʉve alyavwene lʉnono ʉsue tʉʉve nʉ ntekesi ʉmʼbaha enendɨɨkɨ,
ʉmʉgholofu,
ʉnsila vʉhosi nambe ʉvʉviivi vʉmonga,
abaghulue kuhʉma mʉ vahosi,
atosivue kʉkyanya.
27 Ʉntekesi ʉmʼbaha ʉjuo nailondua kuhʉmia ɨlɨtekelo jaatu,
ndavʉle avatekesi ava kwanda vano valyale vihʉmia ɨlɨtekelo jaatu vwɨmɨla inyɨvi saave ni nyɨvi isa vange.
Looli ʉmwene alitavwile jʉjuo kamo keene kuuva lɨtekelo vwɨmɨla inyɨvi sa vaanhu.
28 Indaghɨlo sa Moose sikavɨkagha avatekesi avavaha.
Avatekesi avuo navalyale vakwɨlanɨfu.
Looli ʉlʉjɨɨgho lwa Ngʉlʉve lʉno lʉlisile mʉmbele mʉ ndaghɨlo,
lʉlyamʼbɨkile ʉMwana aave ntekesi mʼbaha,
nkwɨlanɨfu amasiki ghooni.