Imbʉlanɨsio mʉ fipʉgha ifya vɨtɨki
2
Neke ʉve,
ʉvʉlanɨsyaghe avaanhu kuuva na maghendele amanofu ndavʉle silivuo imbʉlanɨsio isa kyangʼhaani.
2 Ʉvavʉʉle avakɨnhaata avagoyo vighelaghe,
kange vavisaghe vanya lujisio,
vano vikulolelela,
avanya lwɨtɨko ʉlwa kyangʼhaani,
avanya lʉghano nʉ lugudo.
3 Enendɨɨkɨ,
nava vakɨjʉʉva avagoyo vavisaghe na maghendele ghano ghikʉmwɨmɨka ʉNgʉlʉve,
valeke kuuva vadesi,
valeke kuuva vaghaasi,
looli vanoghiile kuvʉlanɨsia inofu.
4 Mʉ ʉluo,
viiva vikʉvavʉnga avakɨjʉʉva avajeleela kʉkʉvaghana avaghoosi vaave na vaana vaave.
5 Kange,
avakɨjʉʉva avajeleela,
vavisaghe vanya kulolelela,
vagholofu,
vavombaghe vʉnofu imbombo mʉ nyumba saave,
vavisaghe vakoola,
avanya kʉvoghopa avaghoosi vaave,
kuuti ɨlɨsio lya Ngʉlʉve nalɨngabenapʉlwaghe.
6 Enendɨɨkɨ,
nava vasoleka ʉvapavɨle vavisaghe vanya kulolelela.
7 Na jʉʉve,
ʉvisaghe kɨhwani mʉ mbombo sooni inofu,
ʉhʉfyaghe ʉvwakyangʼhaani nʉ vʉnywilifu mʉ mbʉlanɨsio saako.
8 Sino ghujova sivisaghe sa kyangʼhaani,
kuuti ʉnya kʉsigha ajejevʉsivwaghe,
ʉlwakʉva naiiva nɨ lɨsio ɨlya kʉtʉjova fivi.
9 Voope avakami,
ʉvavʉʉle kuuti vavoghopaghe avatwa vaave,
vavahovosyaghe mʉ sooni,
valekaghe kukanɨngʼhana navo.
10 Kange navangahɨjaghe,
looli vavisaghe vahʉvɨlua lwoni kʉ vano vikʉvavombela,
kuuti amavombele ghaave ghooni ghasighiniaghe imbʉlanɨsio isa Ngʉlʉve ʉMpoki ghwitu.
11 Ʉvʉlanɨsyaghe isio,
ʉlwakʉva ʉNgʉlʉve ahʉfisie ʉlʉsʉngʉ lwake,
lʉno lʉkʉvapoka avaanhu vooni.
12 Ʉlʉsʉngʉ ʉlʉ,
lʉkʉtʉvʉlanɨsia kukaana ʉvʉviivi nʉ vʉnoghelua vwa ɨɨsi.
Neke pano tʉlɨ mʉ ɨɨsi ɨjɨ,
tʉvisaghe vanya kulolelela,
va kyangʼhaani,
kange vagholofu.
13 Tukalaghe enendɨɨkɨ,
pano tuhʉvɨɨla ɨkɨghono kɨla ɨkɨnofu,
ɨkya kʉgomoka nʉ vʉvaha ʉYesu Kɨlɨsite ʉNgʉlʉve ʉMʼbaha,
kange Mpoki ghwitu.
14 Ʉjuo alitavwile kufua kuuti,
atʉvange mʉ vʉhosi vwoni,
na kʉkʉtʉvalasia tʉʉve vaanhu vaake va kyangʼhaani,
vano vitavwile kuvomba inofu.
15 Ʉvavʉlanɨsyaghe isio sooni,
ʉvakangasyaghe na kʉkʉvapavɨla,
mʉ vʉtavʉlɨlua vwoni,
ʉmuunhu ghweni naangakʉbenapʉlaghe.