Ɨkalata ɨja Paulo kwa
Tiito
Ʉlʉhʉngɨlo
1
Ɨkalata ɨjɨ jɨhʉmile kʉlyʉne ne Paulo,
ne mʼbombi ghwa Ngʉlʉve,
kange ne nsungʼhua ghwa Yesu Kɨlɨsite.
Ʉne nɨsungʼhilue kʉkʉvalʉngɨka avasalʉlua va Ngʉlʉve mʉ lwɨtɨko,
na mʉ vʉkagʉsi ʉvwa kyangʼhaani vʉno vʉkʉvalongosia mʉ maghendele amɨmɨke.
2 Mʉ ʉluo,
viiva nʉ lʉhʉvɨɨlo ʉlwa vwʉmi ʉvwa kʉvʉsila kʉsila,
ʉlwakʉva ʉNgʉlʉve alyatʉlaghile ʉvwʉmi ʉvuo kuhʉma ɨɨsi ye jɨkyale kupelua,
ʉNgʉlʉve naijova ʉvʉdesi.
3 Lɨno,
ʉnsiki ghwa Ngʉlʉve ghʉfikile,
avonisie ɨlɨsio lyake mʉ mhola jɨno alyamheliile nɨpʉlɨsyaghe,
ndavʉle lʉlɨvuo ʉlʉlaghɨlo lwa Ngʉlʉve ʉMpoki ghwitu.
4 Nɨkʉkʉlembela ʉve Tiito,
ghwe mwanango ghwa kyangʼhaani mʉ vʉhangɨlanɨsi vwa lwɨtɨko.
Ʉlʉsʉngʉ nʉ lʉtengaano kuhʉma kwa Ngʉlʉve ʉNhaata na kwa Yesu Kɨlɨsite ʉMpoki ghwitu,
fivisaghe nuuve.
Ɨmbombo ja Tiito kʉ Kilete
5 Nɨkakʉlekile kʉ Kilete,
kuuti ʉnosie sino sipeleliile mʉ kɨpʉgha ɨkya vɨtɨki,
na kusalʉla avaloleleli mʉ makaaja ghooni ndavʉle nɨkakʉlaghiile.
6 Ʉmʉloleleli ghwa kɨpʉgha kya vɨtɨki,
anoghiile kuuva muunhu jʉno naijovua mʉ lʉmonga.
Alekaghe piiva mʼbwafu,a
avaana vaake vavisaghe vɨtɨki,b
valeke kuuva vapakasi nambe kuuva vasiiti.
7 Ʉlwakʉva ʉmʉloleleli ʉghwa kɨpʉgha ɨkya vɨtɨki,
mʉloleleli ghwa mbombo ja Ngʉlʉve,
naanoghiile kupɨkua mʉ lʉmonga.
Alekaghe kukughinia,
nsila ngʼhalaasi,
namʉghaasi,
nsila mabaatu,
kange alekaghe kuuva mhojofu ghwa ndalama.
8 Looli avisaghe ntengeleli,
jʉno ikeela inofu,
nya kulolelela,
mʉgholofu,
mwɨmɨke,
nya kughela.
9 Agadɨlɨlaghe vʉnofu ɨMhola ɨNofu ɨja Yesu Kɨlɨsite ndavʉle avʉlanɨsivue.
Apuo anoghiile kʉkʉvakangasia avaanhu ni mbʉlanɨsio isa kyangʼhaani,
na kʉkʉvalema vano visigha ɨlɨsio lya Mʉtwa.
10 Nijova ʉluo,
ʉlwakʉva kwevale avaanhu vinga vano navakʉndi,
vijova amasio amasila lʉvʉmbʉlɨlo,
kange vasyangi,
kyongo aVayahudi avɨtɨki vano visimilisia ɨkɨvʉngo kyave ɨkya kʉdumula ɨngola ɨja kɨdɨɨmi.
11 Avaanhu avuo vakanue kuvʉlanɨsia,
ʉlwakʉva vikʉvasofia avaanhu mʉ nyumba nyinga,
pano vivʉlanɨsia sino nasinoghiile.
Vivomba ʉluo kuuti vakave indalama.
12 Kange,
ʉmʼbɨli jʉmonga nkate mʉ vavɨli ava mʉ ɨɨsi ɨja Kilete,
alyatiile,
“AVakilete vadesi ifighono fyoni,
vahwene fikanu,
vanyamwojo,
kange voolo.”
13 Ʉvwolesi ʉvuo vwa kyangʼhaani.
Mʉ ʉluo,
avɨtɨki ʉvadalɨkɨlaghe fiijo,
kuuti vavɨngɨlɨlaghe imbʉlanɨsio isa kyangʼhaani.
14 Valeke kupʉlɨkɨsia ifipango ifya Kɨyahudi ni ndaghɨlo sa vaanhu vano vavʉlekile ʉvwakyangʼhaani.
15 Avuo vivʉlanɨsia kuuti,
kwefili ifiinu fino filamafu.
Neke kʉ vano vagholofu pamaaso gha Ngʉlʉve ifiinu fyoni fivalasivue.
Looli,
kʉ vano valamafu kange navɨtɨki,
ifiinu fyoni filamafu,
ʉlwakʉva ʉlʉhala na masaaghe ghaave,
ghamemile ʉvʉlamafu.
16 Vikujova veene kuuti vammanyile ʉNgʉlʉve,
neke mʉ maghendele ghaave vikʉnkaana.
Avuo ve vano vikʉnkalasia ʉNgʉlʉve,
vagalʉsi,
vano navanoghiile nambe mʉ mbombo jɨmo ɨnofu.