Amaghendele agha vɨtɨki
3
Ʉvakʉmbʉsyaghe avaanhu kuuva vapʉlɨki kʉ valongosi na kʉ vanya vʉtavʉlɨlua,
na kuuva vakʉndi.
Kange,
vavisaghe vanya kʉvomba imbombo sooni inofu.
2 Ʉvavʉlaghe navangamʉlighaghe muunhu,
navangavisaghe na mabaatu,
vavisaghe vahʉʉgʉ.
Vavisaghe vanya lujisio kʉ vaanhu vooni.
3 Na jʉsue ndavʉle avange,
tʉlyale vajasu,
vagalʉsi,
kange tʉlyasyangilue.
Tʉlyale vakami va vʉnoghelua ʉvʉviivi vʉno vʉlɨ papinga.
Ʉvwʉmi vwitu vwale vwa makole nɨ kɨvini,
avaanhu vakatʉkalalɨlagha,
na jʉsue tʉkavakalalɨlagha.
4 “Neke ʉNgʉlʉve ʉMpoki ghwitu atʉhʉfisie ʉvʉkoola nʉ lʉghano lwake,
5 kʉkʉtʉpoka.
Nakwekʉti alyavombile ʉluo vwɨmɨla imbombo siitu inofu sino tʉvombile,
looli alyavombile vwɨmɨla ɨlɨpyana lyake.
Akatʉvalasia ʉvʉhosi vwitu,
ʉkuo kwe kʉholua vʉpia,
kange atʉpeliile ʉvwʉmi ʉvʉpia mwa Mhepo ʉMwɨmɨke.
6 Akatʉpeela ʉMhepo ʉMwɨmɨke kɨsila kɨghelelo mwa Yesu Kɨlɨsite ʉMpoki ghwitu,
7 kuuti tʉvalɨlue kuuva vagholofu mʉ lʉsʉngʉ lwake,
neke tʉʉve nʉ vwʉmi ʉvwa kʉvʉsila kʉsila vʉno tuhʉvɨɨla.”
8 Amasio aghuo gha kyangʼhaani.
Nilonda ʉsimilisie amasio agha,
kuuti vano vikʉmwɨtɨka ʉNgʉlʉve,
jaatu vasaghaghe na kughimba kuvomba ɨmbombo ɨnofu.
Aghuo masio manofu,
kange manya lʉvʉmbʉlɨlo kʉ vaanhu vooni.
9 Palɨkɨmo nisio,
ʉlekaghe pikwingila mʉ lʉkaani ʉlwa kɨjasu,
ni fipango fya matavua gha fisina ifya vakʉʉlʉ,
amabaatu na makanɨngʼhano gha ndaghɨlo sa Moose.
Isio sooni sila lʉvʉmbʉlɨlo.
10 Ʉmuunhu ʉmhomengʼhani,
ʉmpavɨlaghe ʉlwa kwanda nʉ lwa vʉvɨlɨ,
nave naipʉlɨka,
mʉleke piiva vʉhangɨlanɨsi nʉ mwene.
11 Ʉkagwile kuuti,
ʉmuunhu ndavʉle ʉjuo avʉlekile ʉvwakyangʼhaani,
kange mhosi,
ʉjuo ihɨghile mwene.
Amasio gha vʉsililo
12 Nilonda pilʉta kukukala kʉ Nikopoli amasiki gha mhepo.
Neke nɨkʉnsuungʼha ʉAlitema nambe ʉTikiko kʉlyʉve.
Angafike ʉkuo,
ghwangʉpaghe kulʉta kʉ Nikopoli tʉtangʼhane.
13 ɄSeena ʉnkagʉla ndaghɨlo nʉ Apolo,
ʉvapeele fyoni ifya kʉvatanga mʉ sɨla,
valeke kukwaghɨlua kɨmonga.
14 Avaanhu viitu voope,
vamanyɨlaghe kuvomba inofu jaatu,
kuuti vavatange avanya vʉfumbue ʉvwa kyangʼhaani,
neke mʉ vwʉmi vwave vakomaghe ifipeke.
15 Avaanhu vooni vano tʉlɨ lʉmo,
vikʉkʉhʉngɨla.
Na jʉʉve ʉvahʉngɨlaghe vooni vano vatʉghanile mʉ vʉhangɨlanɨsi vwa lwɨtɨko.
Ʉlʉsʉngʉ lwa Ngʉlʉve lʉvisaghe palɨkɨmo numue mweni.