Indaghɨlo mʉ fipʉgha ifya vɨtɨki
5
1-2 Ʉlekaghe pikʉnʼdalɨkɨla ʉmuunhu ʉnʼgoyo,
looli ʉmʼbʉlaghe hwene mpaafi ghwako.
Avadɨɨmi ʉjovaghe navo hwene vanino.
Nava vahɨnja,
ʉvavombelaghe mʉ vʉnofu vwoni hwene valʉmbʉlio.
3 Ʉvavʉlaghe avɨtɨki kuuti,
vavatangaghe avakɨjʉʉva avafwɨle avasila lʉtango.
4 Neke ʉmfwɨle ghweni jʉno alɨ na vaana nambe avisukulu,
avuo vamanyɨlaghe taasi kuvomba sino sinoghiile mʉ nyumba saave.
Vavavombelaghe avapaafi vaave,
ʉkuo kwe kʉgomosia sino voope vavombilue.
Kuvomba ʉluo kwe kʉno ʉNgʉlʉve ikeela.
5 Ʉmʉkɨjʉʉva ʉmfwɨle jʉno naalɨ nʉ muunhu ʉghwa kʉntanga,
ʉjuo ɨkʉmhʉvɨɨla ʉNgʉlʉve,
ikufuunya na kusʉʉma ʉlʉtango kwa Ngʉlʉve pakɨlo na pamwisi.
6 Looli ʉmʉkɨjʉʉva ʉmfwɨle jʉno ikeela ʉvʉnoghelua vwa ɨɨsi,
ʉjuo mfue napano ivoneka mwʉmi.
7 Soope indaghɨlo isio ʉvavʉʉle avɨtɨki neke valeke kupɨkua.
8 Neke ʉmuunhu jʉno naɨkʉvatanga avaanhu vaake,
kyongo ava mʉ nyumba jaake,
ʉjuo iiva alʉlekile ʉlwɨtɨko,
kange iiva mʼbiivi kukila ʉmuunhu jʉno namwɨtɨki.
9 Ʉmfwɨle anoghiile kuuva mʉ vʉtavɨke vwa vafwɨle,
nave alɨ na maaka kutengʉlɨla ifijigho ntanda,
kange namʼbwafu.a
10 Olekwaghe vʉnofu,
ndavʉle:
avisaghe asʉngile avaana vaake vʉnofu,
atengeliile avahesia na vɨtɨki,
avatangile vano vipumusivua,
kange avombile imbombo sooni inofu.
11 Looli avafwɨle avajeleela,
nʉngavʉpɨlaghe mʉ vʉtavɨke,
ʉlwakʉva ʉvʉnoghelua vwa mʼbɨlɨ vʉngavaghaghɨle kukila kukutavʉla kwa Kɨlɨsite,
vilondagha kutolua.
12 Mʉ ʉluo viiva vikwingila mʉ vʉhɨghi,
ʉlwakʉva valʉlekile ʉlʉfingo lwave kwa Kɨlɨsite,
ʉlwa kʉjigha kɨsila kʉtolua kange.
13 Palɨkɨmo nʉluo,
vimanyɨla ʉvwolo pano vighendaghenda mʉ nyumba isa vaanhu.
Nakwekʉti vʉvwolo vwene,
kange viiva vaheehi na kuhanga mʉ mbombo isa vange,
nʉ vʉholiholi na kujova sino nasinoghiile.
14 Lɨno,
ʉne nikeela avafwɨle avajeleela,
vatolwaghe,
vapapaghe avaana na kulolelela inyumba saave,
neke avalʉgʉ valeke kʉkʉtʉjova fivi.
15 Ʉlwakʉva avafwɨle vamonga vasovile,
vikʉmʼbɨngɨlɨla ʉSetano.
16 Nave ʉmʉkɨjʉʉva ʉmwɨtɨki alɨ na vafwɨle mʉ nyumba jaake,
avatangaghe kuuti ɨkɨpʉgha kya vɨtɨki kɨleke kukwaghɨlua.
Neke ɨkɨpʉgha kya vɨtɨki kiiva nʉ vweleefu ʉvwa kʉvatanga avafwɨle avange avasila lʉtango.
17 Avaloleleli va fipʉgha fya vɨtɨki,
vano vivomba ɨmbombo vʉnofu,
voghopwaghe na kuhombua vʉnofu,b
kyongo vano vikutavʉla kupʉlɨsia na kuvʉlanɨsia.
18 Ʉlwakʉva lɨlembilue mʉ Malembe aMɨmɨke kuuti,
“Ʉlekaghe kʉkʉjɨbunga ɨngʼombe ʉmʉlomo,
pano jisyonda ɨngano pa lʉvʉgha.”c
Kange lɨlembilue,
“Ʉmʼbomba mbombo anoghiile kuhombua ʉlʉhombo lwake.”d
19 Ʉlekaghe kukwɨtɨka inongua sino sijovua vwɨmɨla ʉmʉloleleli ghwa kɨpʉgha ɨkya vɨtɨki,
kɨsila vwolesi vwa vaanhu vavɨlɨ nambe vatatu.
20 Looli avaloleleli vano vifihoka amakole,
ʉvadalɨkɨlaghe pa vinga,
kuuti avange voghopaghe.
Imhavɨlo kwa Timoti
21 Nɨkʉkʉlaghɨla pamaaso gha Ngʉlʉve,
na pamaaso gha Yesu Kɨlɨsite na vanyamhola avasalʉlua kuuti,
ʉgadɨlɨlaghe isio,
ʉlekaghe kuhɨgha ngʼhaningʼhaani kɨsila kʉlʉtangʼhania nambe kutangɨla lʉbale.
22 Nʉngamwɨtɨkɨsyaghe ngʼhaningʼhaani ʉmuunhu pikʉmwɨmɨka pa mbombo ja Mʉtwa,
ʉlwakʉva ʉngamʼbɨɨke ʉmhosi pa mbombo,
na jʉʉve ghuuva ʉhangile amakole ghaake.
Ʉve ghulolelelaghe ʉvwʉmi vwako,
ʉvisaghe mʉgholofu.
23 Kuhʉma lɨno,
nʉnganywisaghe amalenga gheene,
looli ʉnywisaghe nʉ lʉhʉʉjee lʉdebe vwɨmɨla ɨnhamu jaako ɨja lɨleme ni nhamu isingi sino sasikʉkʉgasia.
24 Nʉngavɨtɨkɨsyaghe ngʼhaningʼhaani avaanhu pa mbombo ja Mʉtwa,
ʉlwakʉva avaanhu avange,
amakole ghaave ghalɨ pa vʉvalafu,
ghikʉvalongolela kʉ vʉhɨghi.
Neke avange,
amakole ghaave ghafisiime,
ghivoneka pambele.
25 Enendɨɨkɨ,
imbombo inofu sivoneka pa vʉvalafu,
soope sino sifisiime sihanga sivoneka.