Indaghɨlo kʉ vakami avɨtɨki
6
Avakami vooni avɨtɨki,
vijisyaghe kʉ vatwa vaave,
kuuti ɨlɨtavua lya Ngʉlʉve ni mbʉlanɨsio siitu nasingabenapʉlwaghe.
2 Avakami vano avatwa vaave vɨtɨki,
valekaghe pikʉvabenapʉla ʉlwakʉva va kɨpʉgha kɨmo.
Ʉlwene vanoghiile kʉkʉvavombela vʉnofu na kukila,
apuo viiva vikʉvatanga avajanave mʉ lwɨtɨko,
kange avuo vaghanɨke vaave.
Isio ʉvʉlanɨsyaghe na kupavɨla.
Imbʉlanɨsio isa vʉdesi nʉ vʉmofu ʉvwa kyangʼhaani
3 Kwevale avaanhu vano vivʉlanɨsia imbʉlanɨsio isa vʉdesi.
Sino vivʉlanɨsia nasikwɨtɨngʼhana na masio amanya vwʉmi agha Mʉtwa ghwitu ʉYesu Kɨlɨsite,
kange nasikwɨtɨngʼhana nʉ vwɨmɨke.
4 Avuo vamemile ʉlughinio,
kange navakagwile kɨmonga.
Avaanhu avuo vikwʉmɨlɨla mʉ lʉkaani ʉlʉsila lʉvʉmbʉlɨlo vwɨmɨla ʉtʉsio ʉtʉdebe.
Mʉ ʉluo jihʉmɨla ɨgiila,
amabaatu,
amaligho,
ingananio.
5 Kange,
jaatu ghinangania amapʉlɨngʼhano.
Avaanhu avuo vanangiike ʉlʉhala,
vasila vwakyangʼhaani.
Visaagha kuuti kuvomba ɨmbombo ɨja Ngʉlʉve je sɨla ɨja kʉkavɨla ɨkyʉma.
6 Kuuva nɨ kyʉma lʉvʉmbʉlɨlo,
neke ʉmuunhu iiva nʉ lʉvʉmbʉlɨlo ʉlʉkome,
pano ɨkʉmwɨtɨka ʉNgʉlʉve na kukwɨlana ni fiinu fino alɨ nafyo.
7 Ʉlwakʉva mʉ ɨɨsi muno natʉkisile na kɨmonga,
kange natʉngavʉʉke na kɨmonga.
8 Looli tʉngave nɨ kyakʉlia ni fya kʉfwala tʉkwɨlanaghe nifio.
9 Neke vano valɨ nʉ vʉnoghelua ʉvwa kyʉma vighwɨla mʉ ngelo,
na kughwɨlɨla mʉ nhegho na mʉ vʉnoghelua ʉvwa kɨjasu vʉno vʉkʉvanangania.
Ʉluo lʉkʉvapelela kupumuka kyongo.
10 Ʉlwakʉva kʉkʉsighana kyongo indalama vwe vʉtengʉlɨlo vwa vʉviivi vwinga.
Vamonga vanoghilue isio vasyangilue,
valʉlekile ʉlwɨtɨko,
pe valɨ mʉ vʉvafi ʉvʉkome hwene muunhu jʉno ikuhoma nʉ mmaghe.
Imhavɨlo kwa Timoti
11 Looli ʉve ghwe muunhu ghwa Ngʉlʉve,
ʉsikɨmbɨlaghe isio.
Ʉvɨngɨlɨlaghe ʉvwakyangʼhaani,
ʉvwɨmɨke,
ʉlwɨtɨko,
ʉlʉghano,
ʉlugudo nʉ vʉhʉʉgʉ.
12 Ghimbagha kʉkʉmʼbɨngɨlɨla ʉNgʉlʉve ndalʉve lʉtalamu ndaani,
ʉkolelelaghe ʉvwʉmi ʉvwa kʉvʉsila kʉsila,
vʉno ghwakemelilue pala pano ghwalyɨtiike pa volesi vinga.
13 Nɨkʉkʉlaghɨla pamaaso gha Ngʉlʉve jʉno ɨkʉfivɨɨka fyʉmi ifiinu fyoni,
na pamaaso gha Yesu Kɨlɨsite,
jʉno alyajovile ʉvwolesi ʉvwa kyangʼhaani pamaaso gha Pontio Pilato,a
14 niiti,
ʉgadɨlɨlaghe indaghɨlo isio mʉ vʉnofu vwoni,
kuhanga pano alaava ikwisa ʉMʉtwa ghwitu ʉYesu Kɨlɨsite.
15 Kukwisa kwa mwene ghʉlaava nsiki ghʉno ataviike ʉNgʉlʉve jʉno ighinisivua,
ʉNtemi jʉmo mwene,
ʉNtwa ghwa vatwa,
ʉMʼbaha ghwa vavaha.
16 Ʉjuo ghwe jʉno ʉvʉfue navʉkʉmʼbona,
ikalile pa lʉmuli lʉno ʉmuunhu naangalʉvelelele.
Kange,
nakwale ʉmuunhu jʉno amwaghile,
nambe jʉno ndepoonu ɨkʉmwagha.
Ʉvwoghopua ni ngʉfu alɨ nafyo ifighono fyoni.
Ameni.
17 Ʉvavʉʉle avamofu valeke kukughinia,
nambe kuhʉvɨɨla ʉvʉmofu vwave ʉvwa mʉ ɨɨsi ɨjɨ,
vʉno vwa nsiki nʼdebe.
Looli vamhʉvɨlaghe ʉNgʉlʉve jʉno ɨkʉtʉpeela ifiinu fyoni mʉ vʉkoola vwake,
kuuti tʉfivombelaghe nʉ lʉkeelo.
18 Kange,
ʉvavʉʉle vavombaghe inofu,
neke vavisaghe vamofu mʉ mbombo inofu ndavʉle avange vʉle vamofu mʉ fiinu.
Vavisaghe vapeesi na kuhangɨlanɨla na vange ɨkyʉma kyave.
19 Kuvomba imbombo inofu isio,
lʉlɨ ndavʉle kuvuta ifiinu ifya kʉkʉtanga ʉnsiki ghʉno ghukwisa,
ʉkuo kwe kukuvɨkɨla ʉlwalo ʉlʉkangafu ifighono fino fikwisa.
Apuo pepano valʉpɨla ʉvwʉmi ʉvwa kyangʼhaani.
20 Timoti,
gadɨlɨlagha vʉnofu ʉvwakyangʼhaani vʉno ʉpelilue.
Ʉlekaghe kukujingisia mʉ masio ghano nagha Mʉtwa amasila lʉvʉmbʉlɨlo na makanɨngʼhano agha kɨjasu,
ghano avange viiti vwe vʉkagʉsi.
21 Avaanhu avange vano vasikolile isio,
valʉlekile ʉlwɨtɨko lwave.
Ʉlʉsʉngʉ lwa Mʉtwa lʉvisaghe palɨkɨmo numue.