Avavʉlanɨsi ava vʉdesi
4
Neke ʉMhepo ijova kɨsila kʉfisa kuuti,
ifighono ifya vʉsililo vamonga vivʉhɨlagha kuvɨngɨlɨla ʉvwakyangʼhaani vwa lwɨtɨko,
neke vivɨngɨlɨlagha imhepo isa vʉsyangi,
ni mbʉlanɨsio isa Setano.
2 Avaanhu vano vivʉlanɨsia isio ve vakedʉsi,
kange vadesi vano ʉvʉhɨghi vwave ʉvwa mʉ moojo vʉfwile.
3 Avuo vikʉvasigha avange kuuti valeke kutolana,
nambe kulia ifyakʉlia fimonga,
fino ʉNgʉlʉve alyafipelile kuuti,
avɨtɨki vafyʉpɨlaghe nʉ lʉhongesio,
ʉlwakʉva vavʉtangʼhinie ʉvwakyangʼhaani.
4 Ifipelua fyoni ifya Ngʉlʉve finofu,
jeeje kukaana kɨmonga,
looli fyʉpɨlwaghe nʉ mwojo ʉghwa lʉhongesio.
5 Ʉlwakʉva sino ʉNgʉlʉve ijova mʉ lɨsio lyake,
ni nyifuunyo siitu isa lʉhongesio,
fihʉfia kuuti ifio fyɨtɨkɨsivue.
Ʉmʼbombi ʉnnofu ʉghwa Yesu Kɨlɨsite
6 Ʉngavapeele avɨtɨki imbʉlanɨsio isi,
apuo pe ghuuva mʼbombi nnofu ghwa Yesu Kɨlɨsite,
kange ghuuva ʉkʉliile vʉnofu mʉ vwakyangʼhaani vwa lwɨtɨko lwitu na mʉ mbʉlanɨsio inofu sino ʉve ʉsivɨngɨliile.
7 Ʉve ʉfileke lwoni ifipango ifya vakʉʉlʉ ifisila lʉvʉmbʉlɨlo,
neke jaatu ʉghimbaghe kukukala mʉ vughane vwa Ngʉlʉve.
8 “Kʉkʉghʉhonga ʉmʼbɨlɨ kuuva ni ngʉfu,
kwelʉle ʉlʉvʉmbʉlɨlo lʉdebe,
kwe kʉkangasia ʉmʼbɨlɨ ghwene.
Looli,
kughimba kukufuunya na kʉkʉmʼbɨngɨlɨla ʉNgʉlʉve,
lʉvʉmbʉlɨlo kukila fyoni.
Ʉlwakʉva mʉ ʉluo ʉNgʉlʉve alaghile kʉkʉtʉpeela ʉvwʉmi ʉvwa lɨno na vʉno vukwisa.”
9 Ɨlɨsio ɨlio lya kyangʼhaani,
lɨno avaanhu vanoghiile kʉkʉlyʉpɨla.
10 Mʉ ʉluo tughimba na kuvomba ɨmbombo,
ʉlwakʉva tʉkʉmhʉvɨɨla ʉNgʉlʉve jʉno mwʉmi,
ʉMpoki ghwa vaanhu vooni vano vikwɨtɨka.a
11 Isio se sino ʉnoghiile kʉkʉvavʉlanɨsia na kʉkʉvalaghɨla avɨtɨki kuuti vasivɨngɨlɨlaghe.
12 Nambe avaanhu vikʉkʉvona ʉlɨ nʼdebe,
ʉlekaghe kukulekelesia vakʉbenapʉle,
ʉlwene ʉghimbaghe neke ʉvisaghe kɨhwani kʉ vɨtɨki mʉ njovele,
na mʉ maghendele,
na mʉ lʉghano,
na mʉ lwɨtɨko na mʉ vʉgholofu.
13 Ʉghimbaghe kʉkʉvɨmbɨla avaanhu aMalembe aMɨmɨke,
kange ʉpʉlɨsyaghe na kuvʉlanɨsia kuhanga pano niliiva nisile.
14 Ʉlekaghe kuvʉhɨɨla kʉkʉkɨvombela ɨkɨpelua kɨno ʉNgʉlʉve akʉpeliile vwɨmɨla amasio agha vavɨli,
na pano ghwalyɨmikue na valoleleli va kɨpʉgha kya vɨtɨki.
15 Ʉghimbaghe kuvomba isio nʉ mwojo ghwako ghwoni,
kuuti mʉ vwʉmi vwako avaanhu vooni vajaghaghe ɨmbombo jaako.
16 Ghulolelelaghe amaghendele ni mbʉlanɨsio saako.
Nʉngilamwaghe,
ʉlwakʉva pano ghuvomba isio ghukulusia ʉvwʉmi vwako nʉ vwa vano vikʉkʉpʉlɨkɨsia.