Imbʉlanɨsio vwɨmɨla ʉlufuunyo
2
Ɨkya kwanda mʉ sooni,
nisʉʉma mʉsʉmɨlanɨlaghe kwa Ngʉlʉve.
Mʉnsʉmaghe ʉNgʉlʉve kuuti,
avatange na kʉkʉvafuunya avaanhu vooni.
Kange,
mʉmhongesyaghe ʉNgʉlʉve vwɨmɨla avaanhu vooni.
2 Lʉnoghiile kʉkʉvasʉmɨla avatwa na vange vooni avanya vʉtavʉlɨlua,
neke tukalaghe nʉ lʉtengaano,
pano tʉkʉmwɨmɨka ʉNgʉlʉve na kuuva na maghendele amanofu.
3 Ʉlʉ lwe lʉnono lʉno ʉNgʉlʉve ʉMpoki ghwitu ikeela.
4 ɄNgʉlʉve ilonda avaanhu vooni vapokue na kukagʉla ʉvwakyangʼhaani.
5 Nijova ʉluo,
ʉlwakʉva ʉNgʉlʉve alɨ jʉmo,
kange ʉnya kʉvasambania avaanhu nʉ Ngʉlʉve alɨ jʉmo,
ʉjuo ghwe muunhu ʉYesu Kɨlɨsite,
6 jʉno alitavwile kufua kuuti avavange avaanhu vooni.
Ʉvʉ vwe vwolesi vʉno ʉNgʉlʉve alyatʉpeliile mʉ nsiki ghʉno alyataviike.
7 Neke mʉ ʉluo,
nɨlyavɨkilue kupʉlɨsia na kuuva nsungʼhua.
Nijova isa kyangʼhaani,
nanidesa.
Kange,
nɨlyavɨkilue kuuva mʼbʉlanɨsi ghwa vano naVayahudi,
kuuti nɨpʉlɨsyaghe ɨmhola ja lwɨtɨko nʉ vwakyangʼhaani.
8 Lɨno,
pooni pano mʉkongʼhanile,
nilonda avakɨnhaata pano vikwinula amavoko kʉkyanya kukufuunya,
vavisaghe vivalisie,
vifunyaghe kɨsila ngʼhalaasi nambe kukanɨngʼhana.
9 Nava vakɨjʉʉva vafwalaghe vʉnono amenda ghaave,
vavisaghe nʉ lʉveelo ʉlʉnono,
kange valolaghe vʉnofu,
navangakelaghe ʉlʉtogo ʉlwa kʉtiva ɨlɨnyele,
nambe ʉlwa kʉfwala ifiinu ifya kyʉma na fino filengadɨka,
nambe amenda agha ndalama nyinga.a
10 Looli vavisaghe na maghendele amanofu,
ndavʉle lʉnoghiile kʉ vakɨjʉʉva vano vɨtiike kukufuunya kwa Ngʉlʉve.
11 Avakɨjʉʉva vavisaghe vapʉlɨki,
kange vakʉndi pano vimanyɨla.
12 Nanɨkʉmpeela ʉmʉkɨjʉʉva ʉvʉtavʉlɨlua ʉvwa kʉvʉlanɨsia nambe kʉkʉntema ʉmʉkɨnhaata.
Looli avisaghe mpʉlɨki,
13 ʉlwakʉva ʉNgʉlʉve alyampelile taasi ʉAdamu,
pambele ʉEefa.
14 Kange,
ʉAdamu naalyasyangilue,
looli ʉmʉkɨjʉʉva ghwe jʉno alyasyangilue,
akadeenya ʉlʉlaghɨlo lwa Ngʉlʉve.b
15 Neke ʉmʉkɨjʉʉva ilikwʉpɨla ʉvʉpoki vwɨmɨla ʉvʉpaafic vwake nave ikukala mʉ lwɨtɨko,
mʉ lʉghano,
mʉ vwɨmɨke na kukulolelela.