Ɨkalata ɨja kwanda ɨja Paulo kwa
Timoti
Ʉlʉhʉngɨlo
1
Ɨkalata ɨjɨ jɨhʉmile kʉlyʉne ne Paulo,
ne jʉno nɨkemelilue kuuva nsungʼhua ghwa Yesu Kɨlɨsite mʉ lʉlaghɨlo lwa Ngʉlʉve ʉMpoki ghwitu,
nʉ Yesu Kɨlɨsite jʉno lʉhʉvɨɨlo lwitu.
2 Nɨkʉkʉlembela ʉve Timoti ghwe mwanango ghwa kyangʼhaani mʉ vʉhangɨlanɨsi vwa lwɨtɨko.
Ʉlʉsʉngʉ nɨ lɨpyana nʉ lʉtengaano,
kuhʉma kwa Ngʉlʉve ʉNhaata na kwa Yesu Kɨlɨsite ʉMʉtwa ghwitu,
fivisaghe nuuve.
Ʉlʉpavɨlo kʉ vano vivʉlanɨsia isa vʉdesi
3 Ghukalaghe kʉ lɨkaaja ɨlya Efeso,
ndavʉle nɨkakʉsʉmile ye nivʉʉka kulʉta kʉ kɨghavoa ɨkya Makedonia,
kuuti ʉvakanaghe avaanhu vano vivʉlanɨsia imbʉlanɨsio isa vʉdesi.
4 Valeke kugadɨlɨla ifipango ifisila lʉvʉmbʉlɨlo,
na matavua gha fisina fya vakʉʉlʉ amasila vʉsililo.
Ifio fye fino fipela kukanɨngʼhana,
nafikʉvatanga avaanhu kʉkʉmwɨtɨka ʉNgʉlʉve,
ndavʉle vʉlɨvuo ʉvʉtavɨke vwake ʉvwa kʉvavanga avaanhu.
5 Ʉvʉfumbue vwa lʉlaghɨlo ʉlʉ vwe ʉvʉ:
avɨtɨki vaghananaghe mʉ vwakyangʼhaani,
vavisaghe nʉ mwojo ʉmʼbalafu,
nʉ lwɨtɨko ʉlʉsila vʉkedʉsi.
6 Neke vamonga vasilekile isio,
vagalwike vingiile mujova amasio amasila lʉvʉmbʉlɨlo.
7 Vilonda kuuva vavʉlanɨsi va ndaghɨlo sa Moose,b
neke sino vijova na kusimilisia,
navasitangʼhinie.
8 Tʉkagwile kuuti indaghɨlo sa Moose nofu,
nave ʉmuunhu ɨkʉsivɨngɨlɨla mʉ vughane vwa Ngʉlʉve.
9 Kange,
tʉnoghiile kukagʉla kuuti indaghɨlo nasivɨkilue kʉ vagholofu,
looli kʉ vagalʉsi na vano navakʉndi,
kʉ vahosi na vano navikufuunya kwa Ngʉlʉve,
kʉ valamafu na vano navɨmɨke,
kʉ vano vibuda ava viise na va ngʼina,
nambe vano vibuda avaanhu avange.
10 Kange,
sivɨkilue kʉ vavwafu na vano vivwafuka avaghoosi na vaghoosi vanine,
vano vikwʉvɨla avaanhu na kʉkʉvaghʉsia kʉ vʉkami,
avadesi,
na vano vijɨɨgha isa vʉdesi,
palɨkɨmo ni singi sooni sino nasikwɨtɨngʼhana ni mbʉlanɨsio isa kyangʼhaani.
11 Imbʉlanɨsio isa kyangʼhaani isio sili mʉ Mhola ɨNofu,
jɨno jihʉfia ʉvʉvaha vwa Ngʉlʉve,
jʉno ighinisivua.
Ɨjio je jɨno nɨpelilue nʉ Ngʉlʉve nɨpʉlɨsyaghe.
Ʉlʉsʉngʉ lwa Yesu Kɨlɨsite kwa Paulo
12 Nɨkʉmhongesia ʉYesu Kɨlɨsite ʉMʉtwa ghwitu jʉno amheliile ingʉfu,
ʉlwakʉva alyangʼhagwile kuuva mʼbomba nnofu.
Akambɨɨka mʉ mbombo jaake,
13 napano ʉlʉtasi nɨlyamʉlighile kyongo na kʉkʉmpumusia na kʉkʉvalemasia avaanhu vaake.
Akasʉngʉkɨla,
ʉlwakʉva nɨkavombagha isio mʉ vʉjasu na mʉvʉsila lwɨtɨko.
14 Kange,
ʉMʉtwa ghwitu alyasʉngʉkiile fiijo,
akamheela nʉ lwɨtɨko nʉ lʉghano lʉno lʉlɨ mwa Yesu Kɨlɨsite.
15 Ɨlɨ lye lɨsio lya kyangʼhaani,
lɨno avaanhu vanoghiile kʉkʉlyʉpɨla kuuti,
“ɄYesu Kɨlɨsite alisile mʉ ɨɨsi avapoke avahosi.”
Mʉ vahosi avuo,
ʉne neene mhoka makole kukila vooni.
16 Mʉ ʉluo,
ʉYesu Kɨlɨsite akasʉngʉkɨla ʉne ne mhoka makole kukila vooni kuuti,
vwɨmɨla ʉne ahʉfie ʉlugudo lwake lwoni.
Pe nɨɨve kɨhwani kʉ vano vilikʉmwɨtɨka na kukwʉpɨla ʉvwʉmi ʉvwa kʉvʉsila kʉsila.
17 Lɨno,
ʉvwoghopua nʉ vʉvaha vʉlɨ nʉ mwene ifighono fyoni,
ʉNtwa ʉnsila kʉsila,
jʉno ʉvʉfue navʉkʉmwagha,
kange naivoneka,
ʉNgʉlʉve ghwe jʉjuo mwene.
Ameni.
ɄPaulo ɨkʉmʉlaghɨla ʉTimoti kugadɨlɨla indaghɨlo
18 Mwanango Timoti,
ʉlʉlaghɨlo ʉluo lʉno nɨkʉkʉpeela,
lʉlɨngʼhiine na masio amalongosi agha vʉvɨli ghano ghalyajovilue vwɨmɨla ʉve.
Amasio aghuo ghakʉtangaghe kuvomba ɨmbombo ja Ngʉlʉve nambe lʉʉve lʉtalamu ndaani,
ndavʉle ʉmʉlua lɨlʉgʉ ʉnnono vʉle itenga ɨlɨlʉgʉ nambe lɨɨve lɨtalamu ndaani.
19 Ʉgadɨlɨlaghe ʉlwɨtɨko na kuuva nʉ mwojo ʉmʼbalafu.
Avaanhu avange navivɨkɨla mwojo kuvomba sino vasitangʼhinie kuuti sa kyangʼhaani,
ʉluo lʉkʉvapelela kuvʉhɨɨla kʉkʉmwɨtɨka ʉNgʉlʉve.
20 Mʉ vaanhu avuo mwale ʉHimenaayo,c
nʉ Alekisanda.
Avuo nɨmʉlekiile ʉSetano kuuti vamanyɨle,
valeke kʉkʉmʼbenapʉla ʉNgʉlʉve.