Valooma 15

Kuvomba sino vikeela avange

Ʉsue twe vano tʉkangiile mʉ lwɨtɨko tulondua kʉkʉvatanga vano navakangiile. Tʉlekaghe kuvomba si sino tukeela ʉsue. 2 Ʉmuunhu ghweni pakate palyʉsue ilondua kuvomba inofu sino ikeela ʉnʼjaake, neke ʉnʼjaake ʉjuo akangale mʉ lwɨtɨko. 3 Nijova ʉluo, ʉlwakʉva najʉ Kɨlɨsite naalyavombile sino ikeela jʉjuo, looli alyavombile kulɨngʼhana na Malembe aMɨmɨke ghano ghiiti,

“Amaligho ghano vikʉkʉligha ʉve Ngʉlʉve,

ghanyaghile ʉne.”

4 Sooni sino silyalembilue ʉlʉtasi mʉ Malembe aMɨmɨke, silyalembilue kʉkʉtʉvʉlanɨsia ʉsue. Silyalembilue kʉkʉtʉkangasia na kʉkʉtʉvɨɨka kuuva nʉ lʉhʉvɨɨlo pano tughuula nʉ lugudo sino alyatʉlaghile ʉNgʉlʉve.

5 Lɨno, ʉNgʉlʉve jʉno ɨkʉtʉpeela ingʉfu isa kuguda na kukangala, avapelaghe ʉvʉmo mʉ kɨhwanɨkɨsio ɨkya Yesu Kɨlɨsite, 6 kuuti ʉmue mweni nʉ mwojo ghʉmo, mʉ masaaghe na mʉ njovele jiinu mʉmʉghiniaghe ʉNgʉlʉve ʉNhaata ghwa Mʉtwa ghwitu ʉYesu Kɨlɨsite.

ɄNgʉlʉve ɨkʉvʉpɨla aVayahudi na vano naVayahudi

7 Lɨno, nʉjʉnge amwʉpɨlaghe ʉmwɨtɨki ʉnʼjaake ndavʉle ʉKɨlɨsite vʉle avʉpiile ʉmue, neke ʉNgʉlʉve aghinwaghe. 8 Nɨkʉvavʉʉla kuuti, ʉKɨlɨsite alisile kuuva mʼbombi ghwa Vayahudi, neke avahʉfie kuuti ʉNgʉlʉve nnofu, ivomba sooni sino alyavalaghile avakʉʉlʉ viitu. 9 Kange, alisile kuuti avaanhu vano naVayahudi vamʉghinie ʉNgʉlʉve vwɨmɨla ʉlʉsʉngʉ lwake, ndavʉle lɨlembilue mʉ Malembe aMɨmɨke kuuti,

“Mʉ ʉluo nɨkʉkʉghiniagha

pamaaso gha vaanhu vano naVayahudi

nikwɨmbagha inyɨmbo isa kʉlɨghinia ɨlɨtavua lyako.”

10 Kange, lɨlembilue kuuti,

“Ʉmue mwe vaanhu va ɨɨsi sooni,

mwe vano namʉlɨ Vaisilaeli,

hovokaghi palɨkɨmo na vaanhu va Ngʉlʉve, aVaisilaeli.”

11 Kange, lɨlembilue kuuti,

“Ʉmue mwe vano namʉlɨ Vaisilaeli, mʉmpalaghe ʉMʉtwa,

mwe vaanhu mweni mʉmʉghiniaghe!”

12 Ghwope ʉmʼbɨli ʉYesaya iiti,

“Ilikwisa ʉmuunhu kuhʉma mʉ kɨsina kya Yese,

ilitema avaanhu vano naVayahudi,

avaanhu vano naVayahudi vikʉmhʉvɨlagha.”

13 Lɨno, nɨkʉvasʉmɨla kwa Ngʉlʉve jʉno ɨkʉvapelela kuuva nʉ lʉhʉvɨɨlo, avapelaghe ʉlʉkeelo nʉ lʉtengaano ʉlʉkwɨlanɨfu vwɨmɨla ʉlwɨtɨko lwinu. Apuo pepano ʉlʉhʉvɨɨlo lwinu lukwongelelagha vwɨmɨla ingʉfu isa Mhepo ʉMwɨmɨke.

Ʉvʉfumbue vwa Paulo kulemba imhola isi

14 Vanyalʉkolo vango, ʉne nɨkagwile kuuti, ʉmue mʉlɨ vaanhu vanofu, mʉkagwile sino mʉnoghiile kuvomba, kange ndepoonu mupavɨlanɨla. 15 Lɨno, imhola simonga mʉ kalata ɨjɨ nɨvalembiile kɨsila kʉfisa kuuti nɨvakʉmbʉsie imhola isio. Nɨvombile ʉluo, ʉlwakʉva ʉNgʉlʉve akasʉngʉkiile 16 kuuva mʼbombi ghwa Yesu Kɨlɨsite kʉ vaanhu vano naVayahudi. Ɨmbombo jango je ja kʉpʉlɨsia ɨMhola ɨNofu ɨja Ngʉlʉve. Nivomba ʉluo ndavʉle ʉntekesi, kuuti avaanhu vano naVayahudi vaave hwene lɨtekelo lɨno likwʉpɨlua nʉ Ngʉlʉve, ɨlɨtekelo lɨno lɨvalasivue nʉ Mhepo ʉMwɨmɨke.

17 Lɨno, nikughinia mwa Yesu Kɨlɨsite vwɨmɨla ɨmbombo jɨno nɨkʉmʼbombela ʉNgʉlʉve. 18 Ʉne nanɨlɨ nɨ kɨngɨ ɨkya kʉjova, ʉlwene nijova kɨ kɨno ʉKɨlɨsite avombile kukilila ʉne, mʉlwa kʉvalongosia vano naVayahudi vankʉnde ʉNgʉlʉve. Alyavombile ʉluo kukilila amasio ghango ni mbombo sango, 19 na mʉ ngʉfu isa fivalɨlo ni fidegho fino nɨlyavombile mʉ ngʉfu isa Mhepo ghwa Ngʉlʉve. Nɨlyalʉtile imbale ni mbale kupʉlɨsia ɨMhola ɨNofu ɨja Kɨlɨsite, kutengʉlɨla mʉ lɨkaaja ɨlya Yelusalemu kuhanga kufika kʉ kɨghavo ɨkya Ililiko. 20 Ʉvʉfumbue vwango vwe vwa kʉpʉlɨsia ɨMhola ɨNofu ɨja Kɨlɨsite kʉno najɨpʉlɨsivue. Navombagha ʉluo kuuti nɨleke kutengʉla ɨmbombo ɨja kʉpʉlɨsia kʉno avange vapʉlisie. 21 Ndavʉle lɨlembilue mʉ Malembe aMɨmɨke kuuti,

“Avaanhu vano navapʉlɨsivue imhola saake, vilikʉsikagʉla,

vano navapʉliike, vilikʉsitangʼhania.”

Ʉvʉtavɨke ʉvwa Paulo kulʉta kʉ Looma

22 Ʉluo lwe lʉno kekinga lʉmheleliile kuuti nɨleke pikwisa kʉlyʉmue. 23 Neke ʉlwakʉva lɨno nɨmalile ɨmbombo jango imbale isi, kange amaaka minga nɨlondile fiijo kukwisa kʉlyʉmue, 24 nihʉvɨɨla kukwisa lɨno. Nihʉvɨɨla kʉkʉvaghendela niliiva nilʉta kʉ ɨɨsi ɨja Hisipania. Apuo nihʉvɨɨla kutangʼhana numue ʉnsiki nʼdebe, na kuhovoka palɨkɨmo numue, neke pambele mʉnhange nɨfike kʉ ɨɨsi ɨjio.

25 Neke lɨno nilʉta kʉ Yelusalemu, kʉkʉvatwalɨla ifya kʉvatanga avɨtɨki avakotofu. 26 Nijova ʉluo, ʉlwakʉva avaanhu ava kɨpʉgha ɨkya vɨtɨki ɨkya kʉ Makedonia nɨ kya kʉ Akaya valamwile kusangʉla ifya kʉvatanga avɨtɨki avuo vano valɨ kʉ Yelusalemu. 27 Avaanhu avuo valamwile mʉ vughane vwave kusangʉla. Palɨkɨmo nʉluo vanoghiile kʉkʉvatanga, ʉlwakʉva avaanhu vano naVayahudi vʉpiile inyifuunyo isa vʉpoki kukilila aVayahudi. Lɨno, vano naVayahudi vilondua kʉkʉvatanga aVayahudi ifiinu ifya mʼbɨlɨ. 28 Lɨno, nɨngamale ɨmbombo ɨjɨ ɨja kʉtwala ɨsangu, kwekʉti kʉkʉvapeela avɨmɨke fyoni fino avaanhu vasangwile, nikilila kʉlyʉmue pano nilʉta kʉ Hisipania. 29 Nɨkagwile kuuti kyande nisile kʉlyʉmue, kyamukwʉpɨla inyifuunyo nyinga kuhʉma kwa Kɨlɨsite.

30 Vanyalʉkolo vango, nɨkʉvasʉʉma mwa Mʉtwa ghwitu ʉYesu Kɨlɨsite na mʉ lʉghano lʉno ɨkʉtʉpeela ʉMhepo ʉMwɨmɨke, mʉghimbaghe palɨkɨmo nuune mʉ nyifuunyo kʉkʉsʉmɨla ʉne kwa Ngʉlʉve. 31 Mʉsʉmɨlaghe kuuti, ʉNgʉlʉve amhoke mʉ lʉtalamu lwa vaanhu vano navikʉmwɨtɨka ʉYesu Kɨlɨsite vano valɨ kʉ Yudea. Kange, mʉsʉmɨlaghe kuuti ʉlʉtango lʉno nɨkʉvatwalɨla avɨmɨke ava kʉ Yelusalemu lwʉpɨlue vʉnofu, 32 neke mʉ vughane vwa Ngʉlʉve nɨfike kʉlyʉmue nʉ lʉkeelo, nɨhovoke palɨkɨmo numue. 33 ɄNgʉlʉve jʉno ɨkʉtʉpeela ʉlʉtengaano avisaghe palɨkɨmo numue mweni. Ameni.