Nʉngamhɨghaghe ʉmʼbɨngɨlɨli ʉnʼjaako
14
Ʉmuunhu jʉno naakangiile mʉ lwɨtɨko,
mʉmwʉpɨlaghe kɨsila kʉkanɨngʼhana nʉ mwene vwɨmɨla amasaaghe ghaake.
2 Jʉmonga vwɨmɨla ʉlwɨtɨko lwake ivona mwavʉke kulia ifiinu fyoni,
neke ʉjʉnge jʉno ʉlwɨtɨko lwake nalʉkangiile,
ivona anoghiile kulia jɨ nyafu ɨnya matʉndʉ.
3 Jʉno ilia ifiinu fyoni naangamʼbenapʉlaghe jʉno nailia fyoni,
ghwope jʉno nailia fyoni naangamhɨghaghe jʉno ilia fyoni,
ʉlwakʉva ʉNgʉlʉve amwʉpiile nʉjʉnge vʉle alɨvuo.
4 Lɨno,
veeve veeni ghwe jʉno ghʉkʉmhɨgha ʉmʼbombi ghwa jʉnge?
Ʉntwa ghwake ghwe jʉno akagwile kuuti,
ʉmʼbombi ghwake avombile vʉnofu nambe kuuti avombile fivi.
Ʉmʼbombi ʉjuo ivombagha sino sinoghiile,
ʉlwakʉva ʉMʉtwa ghwake alɨ ni ngʉfu isa kʉmpelela avombe vʉnofu.
5 Vamonga vivona kuuti,
ɨkɨghono kɨmonga kyɨmɨke kukila ifighono ifingi,
avange vivona ifighono fyoni filɨngʼhiine.
Mʉ ʉluo nʉjʉnge avisaghe mʉ vwakyangʼhaani vwɨmɨla sino ikwɨtɨka.
6 Ʉmuunhu jʉno ivona ɨkɨghono kɨmonga kyɨmɨke,
ivomba ʉluo vwɨmɨla kʉkʉmʉghinia ʉMʉtwa.
Ghwope jʉno ilia fyoni,
ivomba ʉluo kʉkʉmʉghinia ʉMʉtwa,
ʉlwakʉva ɨkʉmhongesia ʉNgʉlʉve.
Ghwope jʉno nailia ifyakʉlia fimonga,
ivomba lʉlʉluo,
ɨkʉmʉghinia ʉMʉtwa na kʉkʉmhongesia ʉNgʉlʉve.
7 Nakwale ʉmuunhu pakate palyʉsue jʉno ikukala mʉlwa kuvʉmbʉlɨla jʉjuo,
nambe kufua mʉlwa kuvʉmbʉlɨla jʉjuo.
8 Nave tʉlɨ vʉʉmi,
tʉlɨ vʉʉmi mʉlwa kʉmʉghinia ʉMʉtwa;
nambe nave tufua,
tufua mʉlwa kʉghinisivua ʉMʉtwa.
Lɨno,
tʉʉve vʉʉmi nambe tʉfue,
ʉsue tʉlɨ va Mʉtwa.
9 Mʉ ʉluo ʉKɨlɨsite alyafwile na kusyʉka,
kuuti aave Mʉtwa ghwa vafue na vʉʉmi.
10 Lɨno,
lwandaani ʉve ghʉkʉmhɨgha ʉmwɨtɨki ʉnʼjaako?
Kɨki ghʉkʉmʼbenapʉla?
Ʉsue tweni tulikwɨma kuhɨghua pamaaso gha Ngʉlʉve.
11 Ndavʉle lɨlembilue mʉ Malembe aMɨmɨke kuuti,
“ɄMʉtwa ʉNgʉlʉve iiti,
‘Kyangʼhaani,
ʉlwakʉva nɨlɨ mwʉmi,
ʉmuunhu ghweni ilifughama pamaaso ghango,
na kukwɨtɨka kuuti ʉne neene Ngʉlʉve.’ ”a
12 Mʉ ʉluo nʉjʉnge ilikujoleka jʉjuo pamaaso gha Ngʉlʉve.
Ʉlʉpavɨlo vwɨmɨla kukʉvasia avange
13 Lɨno,
tʉleke pihɨghana,
looli tʉlamʉle kuvʉhɨɨla kuvomba lʉno lʉkʉnkʉvasia ʉnʼjiitu nambe kʉkʉmpelela kuvomba inyɨvi.
14 Ʉlwakʉva nɨlɨ mwa Yesu Kɨlɨsite nɨkagwile ʉvwakyangʼhaani kuuti,
nakwekɨlɨ kɨno kɨpelilue kuuva kɨlamafu.
Neke nave ʉmuunhu ivona kuuti kɨlamafu,
kwa mwene ɨkɨɨnu ɨkio kiiva kɨlamafu.
15 Nave ghʉkʉmpelela ʉmwɨtɨki ʉnʼjaako kusukunala vwɨmɨla ɨkyakʉlia kɨno ghulia,
naghuuva ghulongosivua nʉ lʉghano.
Vwɨmɨla ɨkyakʉlia,
nʉngansofyaghe ʉmwɨtɨki ʉnʼjaako jʉno ʉKɨlɨsite alyafwile vwɨmɨla ʉmwene.
16 Lɨno,
ɨkɨɨnu kɨno mʉkʉkɨvona kuuti kɨnofu,
mʉlekaghe kʉkʉkɨpelela kuuti kɨbenapʉlue.
17 Nijova ʉluo,
ʉlwakʉva kuuva mwɨtɨki mʉ Vʉtwa vwa Ngʉlʉve nakwekʉlia nambe kunyua kɨmonga,
looli kuvomba isa vʉgholofu,
kuuva nʉ lʉtengaano pakate palyʉmue,
na kuuva nʉ lʉkeelo lʉno luhʉma kwa Mhepo ʉMwɨmɨke.
18 Ʉmuunhu ghweni jʉno ɨkʉmʼbombela isio ʉKɨlɨsite,
ɨkʉmhovosia ʉNgʉlʉve,
kange avaanhu vikʉnkeela.
19 Lɨno,
tʉghimbaghe kuvomba sino sileeta ʉlʉtengaano na kukangasania mʉ lwɨtɨko.
20 Nʉngananganiaghe ɨmbombo ja Ngʉlʉve vwɨmɨla ifyakʉlia.
Ifyakʉlia fyoni fyɨtɨkɨsivue kulɨvua,
neke nalʉnofu kʉkʉnkʉvasia ʉjʉnge vwɨmɨla ɨkyakʉlia kɨno ghulia.
21 Lʉnofu kuvʉhɨɨla kulia ɨnyama nambe kunyua ʉlʉhʉʉje ʉlwa sabibub nambe kuvomba kɨmonga kɨno kɨkʉnkʉvasia ʉmwɨtɨki ʉnʼjaako.
22 Lɨno,
ʉlwɨtɨko lʉno ʉlɨ nalwo vwɨmɨla ifyakʉlia ni fya kʉnyua,
lʉvisaghe lwako nʉ Ngʉlʉve ghwako.
Afunyilue ʉmuunhu ʉnsila nganighani mʉ mwojo ghwake vwɨmɨla kuvomba kɨno alamwile.
23 Neke jʉno alɨ ni nganighani vwɨmɨla ɨkyakʉlia kɨno ilia,
ʉNgʉlʉve ɨkʉmhɨgha,
ʉlwakʉva naaliile vwɨmɨla ʉlwɨtɨko lwake.
Nijova ʉluo ʉlwakʉva sooni sino sivombua kɨsila lwɨtɨko,
vʉhosi.