Ʉlʉhʉngɨlo lwa Paulo
16
Nɨkʉnsuungʼha kʉlyʉmue ʉmwɨtɨki ʉnʼjiitu ʉFibe,
ʉmʼbombi ghwa kɨpʉgha ɨkya vɨtɨki ɨkya kʉ lɨkaaja ɨlya Kenkilea.
2 Nɨkʉvasʉʉma mʉmwambɨlɨlaghe mwa Mʉtwa ʉYesu,
na kʉkʉmwʉpɨla ndavʉle lʉnoghiile kʉ vɨmɨke.
Mʉntangaghe fyoni fino ilonda,
ʉlwakʉva ghwope ʉmwene avatangile avaanhu vinga,
anhangile na jʉʉne.
3 Mʉvahʉngɨlaghe ʉPilisika nʉ Akila avavombi avajango mʉ mbombo ja Yesu Kɨlɨsite.
4 Avuo valyale mʉ lʉtalamu ʉlwa kʉfua vwɨmɨla kupoka ʉvwʉmi vwango.
Nɨkʉvahongesia,
nakwekʉti jʉʉne ne mwene,
looli nafi fipʉgha fyoni ifya vɨtɨki fino fili imbale sa vaanhu vano naVayahudi.
5 Mʉvahʉngɨlaghe avaanhu va kɨpʉgha ɨkya vɨtɨki kɨno kikongʼhaana mʉ nyumba jaave.
Mʉmhʉngɨlaghe ʉmʉghanɨke ghwango ʉEpeneto,
ʉmuunhu ghwa kwanda kʉkʉmwɨtɨka ʉKɨlɨsite mʉ kɨghavo kya Asia.
6 Mʉmhʉngɨlaghe ʉMaliya,
jʉno alyavombile ɨmbombo nʉ mwojo ghwoni vwɨmɨla ʉmue.
7 Mʉvahʉngɨlaghe aVayahudi avajango ʉAnduloniko nʉ Yunia vano valyadindilue mʉ ndinde palɨkɨmo nuune.
AVayahudi avuo vakagʉliike fiijo pakate pa vasungʼhua,a
aveene valyale vatasi kʉlyʉne kʉkʉmwɨtɨka ʉKɨlɨsite.
8 Mʉmhʉngɨlaghe ʉAmpuliato,
ʉmʉghanɨke ghwango mwa Mʉtwa.
9 Mʉmhʉngɨlaghe ʉUlibano ʉmʼbombi nʼjiitu mʉ mbombo ja Kɨlɨsite,
mʉmhʉngɨlaghe najʉ Sitaki ʉmʉghanɨke ghwango.
10 Mʉmhʉngɨlaghe ʉApele,
jʉno akiliile mʉ ngelo nyinga na kuhʉfia kuuti,
ʉlwɨtɨko lwake mwa Kɨlɨsite lwa kyangʼhaani.
Mʉvahʉngɨlaghe avaanhu vano vikukala mʉ nyumba ɨja Alisitobulo.
11 Mʉmhʉngɨlaghe ʉHelodioni,
ʉMʉyahudi ʉnʼjango.
Mʉvahʉngɨlaghe avaanhu vano vikukala mʉ nyumba ja Nalikiso,
vano vikʉmwɨtɨka ʉMʉtwa ʉYesu.
12 Mʉmhʉngɨlaghe ʉTilifena nʉ Tilifosa,
vano vivomba ɨmbombo ja Mʉtwa nʉ mwojo ghwoni.
Mʉmhʉngɨlaghe najʉ Pelisisi ʉmʉghanɨke ghwango jʉno amʼbombiile ʉMʉtwa ʉYesu nʉ mwojo ghwoni.
13 Mʉmhʉngɨlaghe ʉLufo,
ʉnsalʉlua ghwa Mʉtwa,
nʉ ngʼina jʉno akanhangile fiijo.
Kʉlyʉne ahwene ghwe mama ghwango.
14 Mʉmhʉngɨlaghe ʉAsinkilito,
nʉ Fulegoni,
nʉ Helime,
nʉ Patuloba,
nʉ Helima na vɨtɨki avange vano valɨ palɨkɨmo na veene.
15 Mʉmhʉngɨlaghe ʉFilologo,
nʉ Yulia,
ʉNeleya nʉ lʉmbʉ,
nʉ Olumpa,
na vɨmɨke vooni vano valɨ palɨkɨmo na veene.
16 Mʉhʉngɨlanaghe nɨ saavo ɨnya lʉghano mwa Yesu Kɨlɨsite.
Ifipʉgha fyoni ifya vɨtɨki ifya Kɨlɨsite fikʉvahʉngɨla.
Imhavɨlo nʉ lʉhʉngɨlo ʉlwa vʉsililo
17 Lɨno vanyalʉkolo vango,
nɨkʉvasʉʉma mʉvisaghe maaso na vano vihomengʼhania avange na kʉkʉvasofia mʉlwa kʉkaana imbʉlanɨsio sino mʉlyʉpiile.
Mʉvisaghe patali na vaanhu avuo.
18 Nijova ʉluo,
ʉlwakʉva avaanhu ndavʉle avuo navikʉmʼbombela ʉMʉtwa ghwitu ʉYesu Kɨlɨsite,
ʉlwene vivomba vwɨmɨla amaleme ghaave.
Vijova amasio amanono na masio agha kʉkofelesia,
kʉkʉvasofia avaanhu vano navakagwile lʉmonga.
19 Imhola siinu,
avaanhu vooni vapʉliike kuuti mʉlɨ vakʉndi kwa Mʉtwa ʉYesu.
Ʉluo lʉkʉmhelela nɨhovoke vwɨmɨla ʉmue.
Lɨno,
nilonda mʉvisaghe nʉ vʉkagʉsi ʉvwa kʉvomba inofu na kuuva patali nʉ vʉhosi.
20 ɄNgʉlʉve jʉno ɨkʉtʉpeela ʉlʉtengaano naidɨɨla kunangania ingʉfu sa Setano na kʉkʉvapeela ʉmue ingʉfu isa kʉntola.
Ʉlʉsʉngʉ lwa Mʉtwa ghwitu ʉYesu Kɨlɨsite lʉvisaghe numue.
21 ɄTimoti ʉmʼbombi ʉnʼjango,
ɨkʉvahʉngɨla.
Voope aVayahudi avajango ʉLukio,
nʉ Yasoni,
nʉ Sosipateli,
vikʉvahʉngɨla.
22 Ʉne ne Telitio,
ne jʉno nɨlembile ɨkalata ɨjɨ ɨja Paulo,
nɨkʉvahʉngɨla mʉ lɨtavua lya Mʉtwa ʉYesu.
23 ɄGayo jʉno nikukala kwa mwene,
kange nakɨ kɨpʉgha kyoni ɨkya vɨtɨki kikongʼhaana mwa mwene,
ɨkʉvahʉngɨla.
ɄElasito jʉno ikola indalama isa lɨkaaja ɨlɨb nʉ Kwalito ʉmwɨtɨki ʉnʼjiitu,
vikʉvahʉngɨla.
24 Ʉlʉsʉngʉ lwa Mʉtwa ghwitu ʉYesu Kɨlɨsite lʉvisaghe numue mweni.
Ameni.c
ɄPaulo ɨkʉmʉghinia ʉNgʉlʉve
25 Lɨno,
aghinwaghe ʉNgʉlʉve,
jʉno alɨ ni ngʉfu isa kʉvakangasia mʉ lwɨtɨko kukilila ɨMhola ɨNofu ɨja Yesu Kɨlɨsite jɨno napʉlɨsyagha kʉlyʉmue.
ƗMhola ɨjio jɨpʉlɨsivue kulɨngʼhana na vʉle ʉNgʉlʉve ahʉfisie ʉvwakyangʼhaani vʉno navʉlyakagʉliike kuhʉma ɨɨsi ye jɨkyale kupelua.
26 Neke lɨno ʉvwakyangʼhaani ʉvuo,
ʉNgʉlʉve ʉghwa masiki ghooni ahʉfisie kukilila aMalembe aMɨmɨke agha vavɨli,
alyalaghiile kuuti vʉkagʉlɨke kʉ vaanhu ava fisina fyoni,
neke vamwɨtɨkaghe na kʉkʉnkʉnda.
27 ɄNgʉlʉve mwene ʉnya vʉkagʉsi,
aghinwaghe ifighono fyoni kukilila ʉYesu Kɨlɨsite!
Ameni.