ɄNgʉlʉve naavakanile aVaisilaeli vooni
11
Lɨno niposia,
asi,
ʉNgʉlʉve avakanile avaanhu vaake?
Jeeje naavakanile,
ʉlwakʉva ʉne nɨlɨ ʉmo mʉ Vaisilaeli,
nɨlɨ ghwa kɨsina kya Abulahamu,
ɨkɨkolo kya Benyamini.
2 ɄNgʉlʉve naavakanile avaanhu vaake vano alyavasalwile kuhʉma ɨɨsi ye jɨkyale kupelua.
Mʉkʉmbʉkaghe aMalembe aMɨmɨke ghano ghijova vwɨmɨla ʉEliya,
vʉle alyangʼulile pamaaso gha Ngʉlʉve vwɨmɨla aVaisilaeli kuuti,
3 “Mʉtwa,
vavabudile avavɨli vaako na kumemʉla ifitekelelo fyako.
Nɨjiighe ne mwene,
na jʉʉne vilonda pikʉmbuda!”a
4 ɄNgʉlʉve akamwamʉla akati kɨki?
Akati,
“Nivɨkiile avaanhu imbilima lekelalʉbale vano navikʉmwɨmɨka ʉBaali.”b
5 Fye enendɨɨkɨ nagha masiki agha,
vasighiile vadebe vano ʉNgʉlʉve avasalwile mʉ lʉsʉngʉ lwake.
6 Avaanhu avuo vasalulue mʉ lʉsʉngʉ lwa Ngʉlʉve,
nakwekʉti vwɨmɨla imbombo saave.
Vale vasalʉlue vwɨmɨla imbombo saave,
nalwale luuva lʉsʉngʉ.
7 Lɨno,
aVaisilaeli vakalondagha kuuva vagholofu,
vakakunua.
Looli vano valyasalulue nʉ Ngʉlʉve ve vano vakapelua ʉvʉgholofu.
Avange vooni vakavɨkua kuuva vasiiti kukwɨtɨka.
8 Ndavʉle lɨlembilue mʉ Malembe aMɨmɨke kuuti,
“ɄNgʉlʉve avavɨkile kuuva vasiiti kukwɨtɨka,
kuhanga kufika ʉmʉsyʉghʉ.
Avadindile amaaso valeke kulola,
avadindile imbulughutu valeke kupʉlɨka.”c
9 Ghwope ʉntwa ʉDavɨdi alyajovile alyatiile,
“Ifikulukulu fyave ʉNgʉlʉve ahambʉsie
fiive lʉtegho ʉlwa kʉvakola,
fiive fya kʉvaghwɨsia,
lʉʉve lwe lʉhombo lwave.
10 Amaaso ghaave ghavɨkue ɨngʼhiisi,
vakunue kulola,
amasana ghaave ghagungundalaghe ifighono fyoni.”d
Ʉvʉpoki vwa vaanhu vano naVaisilaeli
11 Niposia kange niiti,
aVaisilaeli vakʉviile,
vaghwile lwoni?
Jeeje!
Looli vwɨmɨla aveene kʉkʉnkaana ʉMpoki,
avaanhu vano naVaisilaeli vapelilue ʉvʉpoki,
kuuti aVaisilaeli valemale mʉ moojo ghaave.
12 Lɨno,
nave avaanhu vano naVaisilaeli vapelilue inyifuunyo vwɨmɨla aVaisilaeli kʉkʉnkaana ʉMpoki,
nakʉlɨ lʉvʉmbʉlɨlo ʉlʉkome aVaisilaeli vangamwɨtɨke ʉMpoki?
13 Lɨno,
nijova numue mwe vano namʉlɨ Vaisilaeli.
Ʉlwakʉva ʉNgʉlʉve asalwile ʉne kuuva nsungʼhua ghwinu,
nikughinia vwɨmɨla ɨmbombo jɨno ʉNgʉlʉve ivomba kʉlyʉmue kukilila ʉne.
14 Nihʉvɨɨla kuuti,
pamo aVaisilaeli avajango viiva nɨ kɨvini,
vilemala mʉ moojo ghaave vwɨmɨla ʉmue,
neke nɨvapoke vamonga mʉ veene.
15 Nijova ʉluo,
ʉlwakʉva nave aVaisilaeli kukanua kwave nʉ Ngʉlʉve kʉkapelela ʉNgʉlʉve asambane na vano naVaisilaeli,
lɨno kukwʉpɨlua kwave nʉ Ngʉlʉve na kuuva ndavʉle kusyʉka avafue?
16 Nave ʉtavwile ʉvʉtine vwa ngano ʉvʉtasi kuuva lɨtekelo,
nagha makate ghooni ghiiva mɨmɨke.
Nambe amalela ghangave manono nagha mataafi ghaake ghiiva vʉle vʉle.
17 Ʉmue mwe vano namʉlɨ Vaisilaeli mʉlɨ ndavʉle amataafi agha nseituni ʉghwa mʉ lɨsoli.
AVaisilaeli valɨ ndavʉle amataafi agha nseituni ʉmʼbyalano.
Ʉmue mʉlʉngilue mʉ nseituni ʉmʼbyalano muno amataafi ghamonga ghadumulue.
Mʉ ʉluo muhanga inyifuunyo sino sihʉma mʉ nseituni ʉmʼbyalano.
18 Lɨno,
namʉngighiniaghe kʉ mataafi aghuo ghano ghadumulue.
Nambe mʉlɨ nɨ kya kughinia,
mʉkʉmbʉkaghe kuuti amalela naghihʉvɨɨla ʉmue looli ʉmue muhʉvɨɨla amalela.
19 Pamo ndepoonu ghwiti,
“Amataafi ghala ghalyadumulue kuuti ʉne nɨlʉngue pa vʉdumule ʉvwa mataafi aghuo.”
20 Ʉjovile se seene.
Amataafi aghuo ghalyadumulue ʉlwakʉva ghalyakanile kukwɨtɨka,
neke ʉve ʉlɨ enendɨɨkɨ vwɨmɨla ʉlwɨtɨko lwako.
Lɨno,
ʉlekaghe kukughinia,
looli ghujangalɨlaghe.
21 Nijova ʉluo,
ʉlwakʉva nave ʉNgʉlʉve naalyavavoniile ɨkɨsa aVaisilaeli vano ghe mataafi gha nseituni ʉmʼbyalano,
ndepoonu ɨkʉkʉvonela ɨkɨsa ʉve?
22 Lolagha,
ʉNgʉlʉve vʉle nkoola kange nkali.
Ʉmwene nkali kʉ vano navikʉnkʉnda,
neke kʉlyʉve nkoola nave ghʉkʉnkʉnda.
Nave naghuvomba ʉluo,
na jʉʉve ghudumulua.
23 Voope aVaisilaeli vangagomoke kʉkʉmwɨtɨka ʉNgʉlʉve,
vilʉngua kange mʉ nseituni,
ʉlwakʉva ʉNgʉlʉve alɨ ni ngʉfu isa kʉvalʉnga kange.
24 Nijova ʉluo,
ʉlwakʉva ʉve ghwe jʉno ʉlɨ lɨtaafi lya nseituni ʉghwa mʉ lɨsoli,
ʉdumulue na kulʉngua pa vʉdumule mʉ nseituni ʉmʼbyalano pano nakɨvʉmbʉko kyako.
Lɨno,
nakiiva kɨhʉʉgʉ fiijo ɨlɨtaafi ɨlya nseituni ʉmʼbyalano,
kulʉngua kange mʉ nseituni ʉghuo muno mwe lɨvʉmbʉkiile?
ɄNgʉlʉve alɨ nɨ kɨsa kʉ vaanhu vooni
25 Vanyalʉkolo vango,
nilonda mʉkagʉle ʉvʉtavɨke vwa Ngʉlʉve vʉno navʉkagʉliike,
neke mʉleke kukuvona kuuti mʉlɨ vakagʉsi.
AVaisilaeli kusiita kukwɨtɨka,
na kwa masiki ghooni,
looli kulisila pano ɨmbalɨlo ɨja vaanhu ava ɨɨsi isingi vano vamwɨtiike ʉNgʉlʉve jɨkwɨliine.
26 Apuo pepano aVaisilaeli vooni vilipokua.
Ndavʉle lɨlembilue mʉ Malembe aMɨmɨke kuuti,
“ɄMpoki ilihʉma kʉ lɨkaaja ɨlya Syoni,
ilivɨɨka ɨkɨsina kya Yakovo
kɨleke kuuva kɨsiiti kʉkʉmwɨtɨka ʉNgʉlʉve.
27 Ʉlʉ lwe lʉfingo lwango na veene,
niliiva nɨkʉvapyanɨla inyɨvi saave.”e
28 AVaisilaeli valʉgʉ va Ngʉlʉve,
ʉlwakʉva vakanile ɨMhola ɨNofu.
Ʉluo lʉpeleliile ɨMhola ɨNofu jiise kʉlyʉmue mwe vano namʉlɨ Vaisilaeli.
Neke ʉNgʉlʉve ajiighe avaghanile aVaisilaeli,
ʉlwakʉva alyavasalwile na kufinga na vakʉʉlʉ vaave.
29 Nijova ʉluo,
ʉlwakʉva ʉNgʉlʉve angavasalʉle avaanhu na kʉkʉvafuunya,
naangandʉle ʉvʉlamʉsi vwake.
30 Mʼbʉkʉʉlʉ ʉmue namʉlyale vakʉndi kwa Ngʉlʉve,
neke lɨno ʉNgʉlʉve avapyaniile ʉlwakʉva aVaisilaeli valekile kʉkʉnkʉnda ʉmwene.
31 Voope aVaisilaeli navakʉndi kwa Ngʉlʉve lɨno.
Ndavʉle ʉNgʉlʉve vʉle avapyaniile ʉmue,
fye enendɨɨkɨ ilikʉvapyanɨla voope.
32 Nijova ʉluo,
ʉlwakʉva avaanhu vooni visiita kʉkʉnkʉnda ʉNgʉlʉve.
Mʉ ʉluo avalekile vajighaghe visiita kʉkʉnkʉnda,
neke avapyanɨle vooni.
ɄNgʉlʉve aghinwaghe
33 Lolagha,
ʉvʉmofu vwa Ngʉlʉve vʉle vʉkome!
Lolagha,
ʉlʉhala nʉ vʉkagʉsi vwake vʉle vʉvaha fiijo!
Nakwale nambe jʉmo jʉno ndepoonu ikagʉla amasaaghe gha Ngʉlʉve nambe kʉkʉvʉtangʼhania ʉvʉtavɨke vwake.
Mʉ Malembe aMɨmɨke lɨlembilue kuuti,
34 “Ghwe veeni jʉno akagwile amasaaghe gha Mʉtwa?
Ghwe veeni jʉno ɨkʉntanga ʉMʉtwa amasaaghe?”
35 “Ghwe veeni jʉno ankopiile ʉNgʉlʉve kɨmonga,
neke ʉNgʉlʉve anʼgomokesie?”f
36 Ʉlwakʉva ifiinu fyoni fihʉma kwa mwene,
fivɨkilue mʉ ngʉfu saake,
kange vwɨmɨla ʉmwene.
ɄNgʉlʉve aghinwaghe ifighono fyoni!
Ameni.