Valooma 10

Vanyalʉkolo vango, mʉ mwojo ghwango ni nyifuunyo sango kwa Ngʉlʉve, nilonda aVaisilaeli avajango vapokue. 2 Nɨkʉvavʉʉla kuuti, avaanhu avuo vighimba kʉkʉmʼbɨngɨlɨla ʉNgʉlʉve, neke navakagwile ɨsɨla jɨno jɨnoghiile kʉkʉmʼbɨngɨlɨla. 3 Nijova ʉluo, ʉlwakʉva navakagwile vʉle ʉNgʉlʉve ɨkʉvavalɨla avaanhu kuuva vagholofu, aveene valondile ɨsɨla jaave ɨja kuvɨɨka kuuva vagholofu. Vakanile kuvɨngɨlɨla ɨsɨla ɨja Ngʉlʉve ɨja kʉvavalɨla avaanhu kuuva vagholofu. 4 Nijova ʉluo, ʉlwakʉva kukwisa kwa Yesu Kɨlɨsite vʉkava vwe vʉdugho vwa ndaghɨlo, kuuti ʉmuunhu ghweni jʉno ɨkʉmwɨtɨka ʉmwene, avalɨlue kuuva mʉgholofu.

Ʉvʉpoki vwisile vwɨmɨla avaanhu vooni

5 Ɨmhola ɨja kuuva mʉgholofu vwɨmɨla kuvɨngɨlɨla indaghɨlo, ʉMoose alyalembile kuuti, “Ʉmuunhu jʉno igadɨlɨla indaghɨlo ikukalagha vwɨmɨla indaghɨlo isio.” 6 Neke kuuva mʉgholofu vwɨmɨla ʉlwɨtɨko, alyalembile kuuti, “Nʉngiposyaghe mʉ mwojo ghwako kuuti, ‘Ghwe veeni jʉno kyaitogha kʉkyanya?’ ” Kujova enendɨɨkɨ, kwekʉti kʉkʉmʉleeta ʉKɨlɨsite mʉ ɨɨsi. 7 “Nambe kuuti, ‘Ghwe veeni jʉno kyaikwika kʉvʉlʉngʉ?’ ” Kwekʉti kʉkʉmʉleeta ʉKɨlɨsite kuhʉma kʉ vafue. 8 Neke aMalembe aMɨmɨke ghiiti, “Ɨlɨsio lya Ngʉlʉve lɨlɨ piipi nuuve, lɨlɨ mʉ mʉlomo ghwako na mʉ mwojo ghwako.” Ɨlɨsio ɨlio je mhola ɨja lwɨtɨko jɨno tupʉlɨsia, 9 kuuti ʉngajove pa vʉvalafu kuhʉma mʉ nhumbula kuuti, “ɄYesu ghwe Mʉtwa,” kange ʉngɨtɨke mʉ mwojo ghwako kuuti ʉNgʉlʉve alyansyʉsisie kuhʉma kʉ vafue, ghukava ʉvʉpoki. 10 Nijova ʉluo, ʉlwakʉva ʉmuunhu pano ikwɨtɨka mʉ mwojo ghwake ivalɨlua kuuva mʉgholofu, kange angɨtɨke ʉlwɨtɨko lwake pa vʉvalafu ikava ʉvʉpoki. 11 AMalembe aMɨmɨke ghiiti, “Ʉmuunhu ghweni jʉno ɨkʉmwɨtɨka naangasʉʉke.” 12 Ɨmhola ɨjɨ jijova vwɨmɨla avaanhu vooni, aave Mʉyahudi nambe jʉno naMʉyahudi, ʉlwakʉva vooni ʉMʉtwa ghwave ghwe jʉmo. Ʉmwene nkoola kʉ vooni vano vikʉnsʉʉma. 13 Ndavʉle lɨlembilue mʉ Malembe aMɨmɨke kuuti, “Ʉmuunhu ghweni jʉno ɨkʉnsʉʉma na kʉkʉmhʉvɨɨla ʉMʉtwa, ipokua.”

14 Lɨno, avaanhu ndepoonu vikʉnsʉʉma ndaani jʉno navikʉmwɨtɨka? Ndepoonu vikʉmwɨtɨka ndaani nave navapʉliike imhola saake? Ndepoonu vipʉlɨka ndaani nave nakwale ʉnya kʉpʉlɨsia? 15 Kange, ndepoonu vipʉlɨsia ndaani nave navisungʼhua kupʉlɨsia? Kusungʼhua avanya kʉpʉlɨsia kuuva ndavʉle aMalembe aMɨmɨke vʉle ghiiti, “Kʉlɨ lʉkeelo ʉlʉkome kukwisa avaanhu vano vileeta ɨMhola ɨNofu.” 16 Neke nakwekʉti aVaisilaeli vooni valyʉpiile ɨMhola ɨNofu, ʉlwakʉva ʉmʼbɨli ʉYesaya iiti, “Ghwe Mʉtwa, ghwe veeni jʉno ɨtiike imhola sino tʉpʉlisie?” 17 Lɨno, avaanhu viiva nʉ lwɨtɨko vangapʉlɨke imhola sa Kɨlɨsite, voope vipʉlɨka imhola isio nave sipʉlɨsɨvua.

18 Lɨno niposia, aVaisilaeli navaghelile kupʉlɨka ɨmhola ɨjio? Kyangʼhaani valyapʉliike, ʉlwakʉva aMalembe aMɨmɨke ghiiti,

“Imhola saave sipʉlɨkiike mʉ ɨɨsi jooni,

na masio ghaave ghafikile imbale sooni isa ɨɨsi.”

19 Niposia kange niiti, aVaisilaeli ye vapʉliike navalyasitangʼhinie? Kyangʼhaani valyasitangʼhinie, ʉlwakʉva ʉNgʉlʉve alyajovile kukilila ʉMoose akati,

“Nɨkʉvavɨɨka kuuva nɨ kɨvini,

mʉlemalaghe mʉ moojo ghiinu

vwɨmɨla avaanhu vano navaanhu vango,

nɨkʉvapelelagha kuuva nɨ ngʼhalaasi

kukilila avaanhu avasila vʉkagʉsi.”

20 Ghwope ʉmʼbɨli ʉYesaya ijova amasio gha Ngʉlʉve kɨsila vwoghofi kuuti,

“Avaanhu vano navalyale vikʉndonda, ve vano vakanyaghile.

Nihʉfisie kʉ vaanhu

vano navalyale viposia imhola sango.”

21 Neke vwɨmɨla aVaisilaeli, ʉNgʉlʉve iiti,

“Ɨmwisi jooni nɨvakemelile mʉgomoke kʉlyʉne

ʉmue mwe vagalʉsi,

mwe vano namʉlɨ vakʉndi.”