ɄNgʉlʉve na vasalʉlua vaake
9
Nijova isa kyangʼhaani pamaaso gha Yesu Kɨlɨsite,
nanidesa,
kange nkate mʉ mwojo ghwango ʉMhepo ʉMwɨmɨke ikangasia kuuti sa kyangʼhaani.
2 Ʉne nɨlɨ nʉ lʉsukunalo nʉ vʉvafi vʉno navusila mʉ mwojo ghwango,
3 vwɨmɨla avaanhu ava kɨsina kyango,
aVaisilaeli.
Nijova ʉluo,
ʉlwakʉva,
vwale vʉʉve vughane vwango,
nale nikwɨtɨka kughunua na kuvʉsɨvua pamaaso gha Yesu,
nave kuvomba ʉluo kwale kupelela avaanhu va kɨsina kyango vamwɨtɨke ʉYesu Kɨlɨsite.
4 Avuo ve Vaisilaeli,
vano ʉNgʉlʉve alyavasalwile vaave vaana vaake,
akavahʉfia ʉvʉvaha vwake na kuvɨɨka ʉlʉfingo na veene.
Kange,
akavapeela indaghɨlo saake,
akavavʉʉla vʉle vanoghiile kʉkʉmwɨmɨka ʉmwene,
na kʉkʉvalagha sino ilikʉvapeela.
5 AVaisilaeli avuo ve vanyeenya va Abulahamu,
nʉ Isaka nʉ Yakovo.
Ghwope ʉYesu Kɨlɨsite,
kɨmʼbɨlɨ alyahʉmile mʉ kɨsina ɨkio.
Ʉmwene mʼbaha ghwa fyoni,
kange ghwe Ngʉlʉve jʉno ighinisivua ifighono fyoni!
Ameni.
6 Pano nijova isio,
naniiti ʉNgʉlʉve akunilue kuvomba sino alyavalaghile aVaisilaeli.
Nijova ʉluo,
ʉlwakʉva nakwekʉti aVaisilaeli vooni vasalʉlua va Ngʉlʉve.
7 Kange,
nakwekʉti avaanhu vooni ava kɨsina kya Abulahamu,
vaana va Abulahamu kyangʼhaani,
ʉlwakʉva ʉNgʉlʉve alyamʉlaghile ʉAbulahamu kuuti,
“Ɨkɨsina kyako kihʉma mwa Isaka.”a
8 Mʉ ʉluo nakwekʉti avaana va Abulahamu vano vaholilue mʉ vughane vwa mʼbɨlɨ vaana va Ngʉlʉve,
looli vano vaholilue kulɨngʼhana na vʉle alyalaghile ʉNgʉlʉve.
9 Ʉlwakʉva ʉNgʉlʉve alyamʉlaghile ʉAbulahamu akati,
“Nigomoka kʉ mwakʉʉghʉ,
ʉnsiki ndavʉle ʉghʉ,
ʉSala iiva nʉ mwana ʉnʼdɨɨmi.”b
10 Kange nakwekʉti lʉluo lwene,
ghwope ʉLebeka ye atolilue kwa nkʉʉlʉ ghwitu ʉIsaka,
akapaapa amapasa,
avaana avadɨɨmi.
11-12 Neke ye vakyale kuholua,
nambe ye navavombile simonga inofu nambe imbiivi,
ʉNgʉlʉve akamʼbʉʉla ʉLebeka akati,
“Ʉmwana ʉmʼbaha ɨkʉmʼbombelagha ʉnnuuna.”c
Ʉlʉ luhʉfia kuuti,
ʉNgʉlʉve isalʉla ʉmuunhu kulɨngʼhana nʉ vʉfumbue vwake.
Ʉmuunhu naisalʉlua vwɨmɨla imbombo saake,
looli isalʉlua nʉ jʉno ɨkʉnkemeela.
13 Ndavʉle lɨlembilue mʉ Malembe aMɨmɨke kuuti,
“ɄYakovo nɨlyamʉghanile,
neke ʉEsau nɨlyankanile.”d
ɄNgʉlʉve ivomba mʉ vughane vwake
14 Lɨno tʉʉti kɨki?
Tʉʉti,
ʉNgʉlʉve naivomba mʉ vwakyangʼhaani?
Jeeje,
15 ʉlwakʉva alyamʼbʉlile ʉMoose kuuti,
“Ʉne nɨkʉmpyanɨla ʉmuunhu ghweni
jʉno nighanile kʉkʉmpyanɨla,
kange nɨkʉmʼbonela ɨkɨsa ʉmuunhu ghweni
jʉno nighanile kʉkʉmʼbonela ɨkɨsa.”e
16 Isio sooni nasivombeka vwɨmɨla ʉlʉghimbo nambe ʉvughane vwa muunhu,
looli vwɨmɨla ʉlʉsʉngʉ lwa Ngʉlʉve.
17 Nijova ʉluo,
ʉlwakʉva mʉ Malembe aMɨmɨke,
ʉNgʉlʉve alyamʼbʉlile ʉntwa ʉFalao kuuti,
“Nɨlyakʉvɨkile kuuva ntwa,
neke kukilila ʉve,
nɨhʉfie ingʉfu sango,
nalɨ lɨtavua lyango lɨpʉlɨsɨvue mʉ ɨɨsi jooni.”f
18 Lɨno kwekʉti,
ʉNgʉlʉve ɨkʉnsʉngʉkɨla ʉmuunhu ghweni jʉno ighanile kʉkʉnsʉngʉkɨla,
kange ɨkʉmʼbɨɨka ʉmuunhu ghweni kuuva nsiiti kukʉnda ndavʉle ighanile ʉmwene.
19 Jʉmonga ndepoonu iposia iiti,
“Nave lʉlɨ enendɨɨkɨ,
lwandaani ʉNgʉlʉve ihɨgha avaanhu?
Asi,
ghwe veeni jʉno ndepoonu ɨkʉnsigha ʉNgʉlʉve kuvomba sino ighanile ʉmwene?”
20 Ʉve ghwe muunhu veeve veeni ʉkanɨngʼhane nʉ Ngʉlʉve?
Asi,
ɨkɨɨnu kɨno kɨvʉmbilue ndepoonu kɨkʉmposia jʉno akɨvʉmbile kuuti,
“Kɨki ʉmbʉmbile enendɨɨkɨ?”
21 Ʉmʼbʉmba fivɨgha alɨ nʉ vʉlamʉsi vwɨmɨla ɨnhapo.
Ndepoonu itoola ɨnhapo jɨmonga ivʉmba ɨkɨvɨgha ɨkya mbombo ɨmbaha,
ɨkɨngɨ kɨɨve kya mbombo ɨndebe.
22 Fye enendɨɨkɨ ghwope ʉNgʉlʉve.
Ʉmwene alyale ilonda kuhʉfia ɨngʼhalaasi ni ngʉfu saake,
neke aligudile vwɨmɨla avaanhu vano valyankalisie,
avaanhu vano valyale va kʉtipulua.
23 Kange,
alyale ilonda kuhʉfia ʉvʉvaha vwake ʉvwa kʉdegha kʉ vaanhu vano ilonda kʉkʉvapyanɨla,
avaanhu vano alyavasalwile kuhʉma mʼbʉkʉʉlʉ kuuti vʉpɨle ʉvʉvaha vwake.
24 Avaanhu avuo twesue twe vano tʉkemelilue nʉ mwene,
nakwekʉti tʉkemelilue kuhʉma kʉ Vayahudi veene,
looli na kʉ vano naVayahudi.
25 Ndavʉle alyajovile kukilila ʉmʼbɨli ʉHosea kuuti,
“Avaanhu vano navalyale vaanhu vango,
nɨkʉvatambʉlagha ‘vaanhu vango.’
Avaanhu vano nanɨlyavaghanile,
nɨkʉvatambʉlagha ‘vaghanɨke vango.’ ”
26 Kange,
“Kʉno valyavʉlilue kuuti,
‘Ʉmue namʉlɨ vaanhu vango,’
ʉkuo vitambʉlwagha,
‘Vaana va Ngʉlʉve ʉmwʉmi.’ ”
27 Ghwope ʉmʼbɨli ʉYesaya alyajovile vwɨmɨla aVaisilaeli kuuti,
“Nambe aVaisilaeli vinga hwene lɨhanga ɨlya kʉ nyanja,
vano vilipokua vadebe,
28 ʉlwakʉva ʉMʉtwa ʉNgʉlʉve ilikʉvatipula lwoni
avaanhu mʉ ɨɨsi muno,
kɨsila kʉdɨɨla.”g
29 Kange,
ndavʉle alyavɨlile ʉmʼbɨli ʉYesaya kuuti,
“Ale aleke ʉMʉtwa ʉNgʉlʉve ʉNyangʉfu Sooni
kʉkʉvaleka vamonga ava kɨsina kya Vaisilaeli,
twale tusila ndavʉle avaanhu ava kʉ Sodoma
na kʉ Gomola.”h
Kuvalɨlua ʉvʉgholofu vwɨmɨla ʉlwɨtɨko
30 Lɨno tʉʉti kɨki?
Avaanhu vano naVaisilaeli napano navakaghimbagha kulonda ʉvʉgholofu,
ʉNgʉlʉve alyavavaliile kuuva vagholofu vwɨmɨla ʉlwɨtɨko.
31 Neke aVaisilaeli vano vakaghimbagha kulonda ʉvʉgholofu vwɨmɨla kuvɨngɨlɨla indaghɨlo,
vakakunua kuuva vagholofu.
32 Kɨki valyakunilue kuuva vagholofu?
Valyakunilue,
ʉlwakʉva valyale vihʉvɨɨla amaghendele ghaave,
vakaleka kʉkʉmwɨtɨka ʉKɨlɨsite.
Vakakʉvala pa lɨvue lɨla lɨno likʉvasia,
kwekʉti ʉYesu Kɨlɨsite.
33 Ndavʉle lɨlembilue mʉ Malembe aMɨmɨke kuuti,
“Lolagha,
mʉ lɨkaaja ɨlya Syonii nivɨɨka ɨlɨvue
lɨno avaanhu vikʉvalagha,
ɨlɨnhalavue lɨno lɨkʉvaghwɨsyagha.
Neke ʉmuunhu ghweni jʉno ɨkʉmwɨtɨka naangasʉʉke.”j