Kulongosivua nʉ Mhepo ʉMwɨmɨke
8
Lɨno,
avaanhu vano valɨ mwa Yesu Kɨlɨsite,
navihɨghua kuuti vahosi.
2 Nijova ʉluo,
ʉlwakʉva mwa Yesu Kɨlɨsite,
ingʉfu sa Mhepo ʉMwɨmɨke jʉno ipela ʉvwʉmi,
sitʉvɨkile kuuva vavʉke kuhʉma mʉ ngʉfu isa vʉhosi nʉ vʉfue.
3 Indaghɨlo sa Moose nasilyale ni ngʉfu isa kʉtʉvɨɨka kuuva vavʉke,
ʉlwakʉva ingʉfu isa vʉhosi mʉ mavɨlɨ ghiitu silyatʉpeleliile kukunua kuvɨngɨlɨla indaghɨlo isio.
Neke ʉNgʉlʉve akansuungʼha ʉMwanaake,
iise mʉlwa mʼbɨlɨ ndavʉle amavɨlɨ ghiitu ʉsue twe vahosi,
kuuti mʉ mʼbɨlɨ ʉghuo atipule ʉvʉhosi.
4 Alyavombile ʉluo kuuti,
sino indaghɨlo salondagha tʉvombe,
sivombeke nkate mʉlyʉsue twe vano natulongosivua nʉ vʉnoghelua vwa mʼbɨlɨ,
looli ni ngʉfu sa Mhepo ʉMwɨmɨke.
5 Nijova ʉluo,
ʉlwakʉva avaanhu vano vilongosivua nʉ vʉnoghelua vwa mʼbɨlɨ,
visaagha kuvomba ʉvʉhosi.
Looli vano vilongosivua nʉ Mhepo ʉMwɨmɨke,
visaagha kuvomba isa Mhepo ʉjuo.
6 Ʉlwakʉva kulongosivua nʉ vʉnoghelua vwa mʼbɨlɨ kupelela ʉvʉfue,
looli kulongosivua nʉ Mhepo ʉMwɨmɨke kupelela ʉvwʉmi nʉ lʉtengaano.
7 Avaanhu vano vilongosivua nʉ vʉnoghelua vwa mʼbɨlɨ,
valʉgʉ va Ngʉlʉve,
ʉlwakʉva navikʉnda kuvɨngɨlɨla indaghɨlo saake nambe padebe.
8 Vano vikʉnda kulongosivua nʉ vʉnoghelua vwa mʼbɨlɨ,
navangavombe sino ikeela ʉNgʉlʉve.
9 Neke ʉmue namulongosivua nʉ vʉnoghelua vwa mʼbɨlɨ,
looli mulongosivua nʉ Mhepo ghwa Ngʉlʉve jʉno ikukala nkate mʉlyʉmue.
Nave ʉmuunhu naalɨ nʉ Mhepo ʉjuo,
ʉjuo namuunhu ghwa Kɨlɨsite.
10 Neke nave ʉKɨlɨsite ikukala nkate mʉlyʉmue,
nambe amavɨlɨ ghiinu ghifua vwɨmɨla ʉvʉhosi,
ʉMhepo ʉMwɨmɨke ɨkʉvapeela ʉvwʉmi,
ʉlwakʉva mʉvalilue kuuva vagholofu.
11 Nave ʉMhepo ghwa jʉno alyansyʉsisie ʉYesu kuhʉma kʉ vafue,
ikukala nkate mʉlyʉmue,
jʉno alyansyʉsisie ʉKɨlɨsite kwekʉti ʉNgʉlʉve,
ɨkʉghapeela ʉvwʉmi amavɨlɨ ghiinu ghano ghifua.
Ivomba ʉluo kukilila ʉMhepo ghwake jʉno ikukala nkate mʉlyʉmue.
12 Lɨno vanyalʉkolo vango,
ʉsue natulondua kulongosivua nʉ vʉnoghelua vwa mʼbɨlɨ,
13 ʉlwakʉva nave tulongosivua nʉ vʉnoghelua vwa mʼbɨlɨ,
apuo tufua.
Looli tʉngaleke kuvomba isa vʉnoghelua vwa mʼbɨlɨ mʉ ngʉfu sa Mhepo ʉMwɨmɨke,
apuo tuuva nʉ vwʉmi ʉvwa jaatu.
14 Avaanhu vooni vano vilongosivua nʉ Mhepo ghwa Ngʉlʉve,
avuo ve vaana va Ngʉlʉve.
15 Nijova ʉluo,
ʉlwakʉva ʉNgʉlʉve naalyavapeliile ʉMhepo ghwake,
kuuti avavɨɨke vakami na kuuva voghofi pamaaso ghaake.
Looli alyavapeliile ʉMhepo ghwake kuuti avavɨɨke mʉʉve vaana vaake.
Mʉ ngʉfu sa Mhepo ʉjuo,
tʉkʉntambʉla ʉNgʉlʉve,
“Aba,”
kwekʉti,
Nhaata.
16 ɄMhepo ʉMwɨmɨke ʉjuo ikwoleka palɨkɨmo na moojo ghiitu kuuti ʉsue tʉlɨ vaana va Ngʉlʉve.
17 Lɨno,
ʉlwakʉva ʉsue tʉlɨ vaana va Ngʉlʉve,
tulikwʉpɨla sooni sino ʉNgʉlʉve avavɨkiile avaanhu vaake,
tulikwʉpɨla isio palɨkɨmo nʉ Kɨlɨsite.
Luliiva enendɨɨkɨ ʉlwakʉva nave tugude mʉ mhumuko ndavʉle aligudile ʉYesu,
tulighinisivua ndavʉle alyaghinisivue ʉmwene.
ɄNgʉlʉve ilikʉvaghinia avaana vaake
18 Imhumuko sino sikʉtwagha lɨno,
nivona nakɨɨnu ʉngalɨngʼhanie nʉ vʉvaha vʉno ʉNgʉlʉve ilihʉfia pambele.
19 Lolagha,
ifipelua fyoni ifya Ngʉlʉve,
fighulila nʉ vʉsyʉkue ʉvʉkome ʉnsiki ghʉno ʉNgʉlʉve ilihʉfia pa vʉvalafu avaana vaake.
20 Nijova ʉluo,
ʉlwakʉva ifipelua fyoni filyavɨkilue kukeela kʉvomba,
nakwekʉti filyavɨkilue ʉluo mʉ vughane vwa fyene,
looli mʉ vughane vwa Ngʉlʉve.
Palɨkɨmo nʉluo fili nʉ lʉhʉvɨɨlo,
21 kuuti ɨkɨghono kɨmonga,
ilikʉfivɨɨka kuuva fyavʉke kuhʉma mʉ vʉkami ʉvwa kʉtipulua,
neke fingile mʉ vwavʉke ʉvʉnya vʉvaha vʉno vilipelua avaana va Ngʉlʉve.
22 Nijova ʉluo,
ʉlwakʉva tʉkagwile kuuti kuhanga kufika lɨno,
ifipelua fyoni filɨla nʉ vʉvafi,
ndavʉle ʉvʉvafi ʉvwa mʉkɨjʉʉva pano ipaapa.
23 Nakwekʉti fi fipelua fyene fino filɨla,
looli na jʉsue tulɨla twe vano ʉNgʉlʉve atʉpeliile ʉMhepo ghwake,
kuuti tʉvonje ʉvʉnono mʉ sino ilikʉtʉpeela.
Tulɨla mʉ moojo ghiitu kʉmo tughuula kuvɨkua kuuva vaana vaake lwoni,
kwekʉti kuvangua kuhʉma mʉ mavɨlɨ ghano ghinangɨka na kupelua amavɨlɨ amapia.
24 Ʉlʉhʉvɨɨlo ʉluo tʉlyapelilue kuhʉma ye tupokua.
Neke nave ʉmuunhu ihʉvɨɨla ɨkɨɨnu kɨno ɨkʉkɨvona,
ʉluo naluuva lʉhʉvɨɨlo.
Asi,
ghwe veeni jʉno ihʉvɨɨla ɨkɨɨnu kɨno akyaghile?
25 Neke pano tuhʉvɨɨla ɨkɨɨnu kɨno natʉkʉkyagha,
tughuula nʉ vʉsyʉkue kɨsila kʉkatala.
26 Palɨkɨmo nʉluo ʉMhepo ʉMwɨmɨke ɨkʉtʉtanga kukunua kwitu.
Ʉsue natʉkɨmaanye kusʉʉma vʉle lʉnoghiile,
neke ʉMhepo jʉjuo ɨkʉtʉsʉmɨla nɨ kɨsa kwa Ngʉlʉve,
ɨkɨsa kɨno nakijoveka.
27 ɄNgʉlʉve jʉno ilola sino sili mʉ moojo gha vaanhu,
akagwile navʉ vʉfumbue vwa Mhepo ghwake,
ʉlwakʉva ʉMhepo ɨkʉvasʉmɨla avɨmɨke mʉ vughane vwa Ngʉlʉve jʉjuo.
28 Tʉkagwile kuuti,
mʉ sooni ʉNgʉlʉve ɨkʉvapeela inofu avaanhu vano vamʉghanile,
kwekʉti vano avakemelile mʉ vʉfumbue vwake.
29 Nijova ʉluo,
ʉlwakʉva avaanhu vano ʉNgʉlʉve alyavasalwile kuuva vaanhu vaake kuhʉma ɨɨsi ye jɨkyale kupelua,
alyavavɨkile vahwanane nʉ Mwanaake.
Alyavombile ʉluo kuuti ʉMwanaake ʉjuo aave mʼbele mʉ vɨtɨki vooni va Ngʉlʉve.
30 Lɨno,
vano alyavasalwile kuhʉma mʼbʉkʉʉlʉ,
akavakemeela;
vano alyavakemelile,
akavavalɨla kuuva vagholofu;
kange vano alyavavaliile kuuva vagholofu,
akavaghinia.
Ʉlʉghano lwa Ngʉlʉve
31 Lɨno,
tʉʉti kɨki vwɨmɨla isio?
Nave ʉNgʉlʉve alɨ nusue,
ghwe veeni jʉno ndepoonu ɨkʉtʉtola?
32 ɄNgʉlʉve naalyamʼboniile ɨkɨsa ʉMwanaake jʉjuo,
akantavʉla afue vwɨmɨla ʉsue tweni.
Lɨno,
nave alyantavwile ʉMwanaake jʉjuo vwɨmɨla ʉsue,
kyangʼhaani naangaleke kʉkʉtʉpeela inofu sooni.
33 Kyangʼhaani nakwale ʉmuunhu jʉno ndepoonu iiti avasalʉlua va Ngʉlʉve vahɨghue,
ʉlwakʉva ʉNgʉlʉve jʉjuo ghwe jʉno ɨkʉvavalɨla avasalʉlua kuuva vagholofu.
34 Kange,
nakwale jʉno ndepoonu ɨkʉvahɨgha kuuti vahosi,
ʉlwakʉva ʉYesu Kɨlɨsite ghwe jʉno alyafwile,
akasyʉka kuhʉma kʉ vafue.
Ʉmwene alɨ nʉ vʉtavʉlɨlua palɨkɨmo nʉ Ngʉlʉve,
ghwe jʉno ɨkʉtʉsʉmɨla.
35 Nakwekɨlɨ nambe kɨmonga kɨno ndepoonu kɨkʉtʉvʉsia mʉ lʉghano lwa Kɨlɨsite!
Siive mhumuko nambe lʉsukunalo,
vʉʉve vʉvafi nambe njala,
vʉʉve vʉghaju nambe kuuva mʉ lʉtalamu lʉmonga,
nambe kʉʉve kwe kʉfua,
ifio fyoni nafingatʉvʉsie mʉ lʉghano lwa Kɨlɨsite.
36 Ndavʉle lɨlembilue mʉ Malembe aMɨmɨke kuuti,
“Ifighono fyoni tufwɨmua vwɨmɨla kʉkʉkʉvombela ʉve.
Avaanhu vatʉvɨkile hwene ngʼholo sa kʉhɨnjua.”a
37 Neke isio sooni ʉsue tʉkʉsilema lwoni,
ʉlwakʉva ʉYesu jʉno atʉghanile,
ɨkʉtʉtanga.
38 Lɨno nɨkagwile kyangʼhaani kuuti,
nakwekɨlɨ nambe kɨmonga kɨno ndepoonu kɨkʉtʉvʉsia mʉ lʉghano lwa Ngʉlʉve,
vʉʉve vwe vʉfue nambe ʉvwʉmi,
vaave ve vanyamhola nambe ifinya vʉtavʉlɨlua,
siive se sino pwesili nambe sino silikwisa,
nambe ifinya ngʉfu fyoni,
39 siive se ngʉfu isa kʉkyanya nambe isa paasi.
Nakwekɨlɨ nambe ɨkɨpelua kɨmonga kɨno ndepoonu kɨkʉtʉvʉsia mʉ lʉghano lwa Ngʉlʉve lʉno ahʉfisie kʉlyʉsue mwa Yesu Kɨlɨsite,
ʉMʉtwa ghwitu.