Vano valɨ mwa Yesu navilongosivua ni ndaghɨlo
7
Vanyalʉkolo vango,
amasio ghano nitapijova mʉghatangʼhinie,
ʉlwakʉva nijova na vaanhu vano vasitangʼhinie indaghɨlo.
Indaghɨlo sikʉmʉlongosia ʉmuunhu pa pano ajiighe mwʉmi.
2 Lʉlɨ ndavʉle ʉnʼdala jʉno atolilue,
iiva mʉ ndaghɨlo sa vʉtolani pano ʉmʉghoosi ghwake ajiighe mwʉmi.
Looli ʉmʉghoosi ghwake angafue,
ʉnʼdala ʉjuo iiva mwavʉke mʉ ndaghɨlo isio.
3 Ʉnʼdala ʉjuo angatolue nʉ mʉghoosi ʉjʉnge pano ʉmʉghoosi ghwake ajiighe mwʉmi,
iiva mʼbwafu.
Looli ʉmʉghoosi ghwake angafue,
ʉnʼdala ʉjuo iiva mwavʉke,
naipinyua ni ndaghɨlo isa vʉtolani.
Kange,
nambe angatolue nʉ mʉghoosi ʉjʉnge,
naiiva mʼbwafu.
4 Vanyalʉkolo vango,
fye lʉlɨvuo,
na jʉmue mʉfwile palɨkɨmo nʉ Yesu Kɨlɨsite pa kɨkovekano,
namulongosivua ni ndaghɨlo sa Moose.
Lɨno,
mʉlɨ vaanhu va Yesu Kɨlɨsite jʉno alyasyʉkile kuhʉma kʉ vafue.
Alyasyʉkile kuuti tʉmʼbombelaghe ʉNgʉlʉve sino ikeela.
5 Ye tulongosivua nʉ lʉveelo lwa mʼbɨlɨ,
indaghɨlo sikapelela ʉvʉnoghelua ʉvwa kʉvomba inyɨvi,
vʉʉve ni ngʉfu mʉ filʉngo ifya mavɨlɨ ghiitu na kuvomba sino sipelela ʉvʉfue.
6 Tʉlyapinyilue ni ndaghɨlo,
neke lɨno tʉfwile palɨkɨmo nʉ Yesu Kɨlɨsite,
tʉlɨ vavʉke mʉlwa kʉpinyua ni ndaghɨlo.
Lɨno,
natʉkʉmʼbombela ʉNgʉlʉve mʉlwa kʉvɨngɨlɨla ɨsɨla ɨngʼhʉʉlʉ ɨja kʉlongosivua ni ndaghɨlo,
looli mʉlwa kʉvɨngɨlɨla ɨsɨla ɨmhia ɨja kʉlongosivua nʉ Mhepo ʉMwɨmɨke.
Indaghɨlo sihʉfia ʉvʉhosi
7 Lɨno tʉʉti kɨki?
Tʉʉti indaghɨlo vʉhosi?
Jeeje,
sale sileke indaghɨlo,
nanaale nikagʉla kuuti ʉvʉhosi kye kɨɨnu kɨki.
Nijova ʉluo,
ʉlwakʉva sale sileke indaghɨlo kulʉngɨka kuuti,
“Nʉngavisaghe nʉ vʉnoghelua ʉvʉviivi,”
a nanaale nikagʉla kuuti ʉvʉnoghelua ʉvʉviivi,
vʉhosi.
8 Neke ye nɨkagwile ʉlʉlaghɨlo ʉluo,
ʉvʉhosi vʉkapelela nɨɨve nʉ vʉnoghelua ʉvʉviivi vʉno vʉlɨ papinga,
ʉlwakʉva nave indaghɨlo nakwesili,
ʉvʉhosi vuuva vʉsila ngʉfu,
vuuva hwene vʉfwile.
9 Ʉlʉtasi ye nanɨsikagwile indaghɨlo,
sino nɨkavombagha nasikamhelelagha ʉvʉhɨghi mʉ mwojo.
Neke ye nɨsikagwile indaghɨlo,
ʉvʉhosi vʉkava ni ngʉfu mʉ mwojo,
10 nɨkava patali nʉ Ngʉlʉve,
nɨkava hwene nɨfwile.
Nɨkakagʉla kuuti,
indaghɨlo sino sikanoghiile kʉkʉmheela ʉvwʉmi,
sikamhelela ʉvʉfue.
11 Ʉlwakʉva vwɨmɨla indaghɨlo isio ʉvʉhosi vʉkava nɨ sɨla ɨja kʉsyanga ʉne na kʉkʉmhelela ʉvʉfue.
12 Lɨno,
indaghɨlo nyɨmɨke,
sihʉmile kwa Ngʉlʉve,
silʉngɨka kuvomba isa vʉgholofu,
kange nofu.
13 Asi,
kwekʉti ɨkɨɨnu ɨkɨnofu kɨmheleliile ʉvʉfue?
Jeeje,
looli ɨkɨɨnu ɨkɨnofu ɨkio kɨlisile kuuti ʉvʉhosi vʉkagʉlɨke kuuva vʉhosi.
Ʉvʉhosi ʉvuo vwe vʉno vʉkamheliile ʉvʉfue kukilila indaghɨlo inofu isio.
Lɨno,
indaghɨlo inofu isio,
sihʉfisie kuuti ʉvʉhosi vʉviivi kyongo.
Avaanhu vinoghelua kuvomba inofu, neke vikunua
14 Tʉkagwile kuuti,
indaghɨlo sa Moose sihʉma kwa Mhepo ghwa Ngʉlʉve,
neke ʉne nilongosivua ni sa mʼbɨlɨ,
nɨvɨkilue kuuva nkami ghwa vʉhosi.
15 Nijova ʉluo,
ʉlwakʉva nanɨkagwile kɨno nivomba!
Sino nilonda kuvomba,
nase sino nivomba,
neke sino nanilonda,
se sino nivomba.
16 Lɨno,
nave nivomba sino nanilonda,
apuo nikwɨtɨka kuuti indaghɨlo nofu.
17 Pano nivomba sino nanilonda,
naniiva neene,
looli vʉhosi vʉno vʉlɨ nkate mʉlyʉne.
18 Nɨkagwile kuuti nkate mʉlyʉne,
mʉ mʼbɨlɨ ghwango mʉsila lɨmonga ɨlɨnofu,
ʉlwakʉva pano nilonda kuvomba inofu,
nanivomba.
19 Kwekʉti,
pano nilonda kuvomba ɨlɨnofu,
nivomba ɨlɨviivi lɨno nanilonda.
20 Lɨno,
nave nivomba sino nanilonda,
apuo naniiva neene,
looli vwe vʉhosi vʉno vʉlɨ nkate mʉlyʉne.
21 Lɨno nɨkagwile kuuti,
pano nilonda kuvomba ɨlɨnofu,
nivona ninoghua kuvomba ɨlɨviivi.
22 Nkate mʉ mwojo ghwango nɨkʉsihovokela indaghɨlo sa Ngʉlʉve.
23 Neke ifilʉngo ifya mʼbɨlɨ ghwango filongosivua ni ngʉfu isa vʉhosi sino sikwilana na masaaghe ghango,
sikʉmbɨɨka nɨɨve nkami ghwa kʉvomba ʉvʉhosi vʉno vulongosia ifilʉngo ifya mʼbɨlɨ ghwango.