Kufua na kusyʉka palɨkɨmo nʉ Yesu
6
Asi,
lɨno pe tʉʉti kɨki?
Tʉfivombaghe ʉvʉhosi neke ʉlʉsʉngʉ lwa Ngʉlʉve lwongelelaghe fiijo?
2 Jeeje!
Ʉsue tʉlɨ ndavʉle avafue mʉ mbombo isa vʉhosi,
lɨno lwandaani kange tʉjighaghe tuvomba ʉvʉhosi?
3 Asi,
namʉkagwile kuuti,
ʉsue tweni twe vano twofughue mwa Yesu Kɨlɨsite,
tʉlyafwile nʉ mwene?
4 Ye twofughue,
tʉlyafwile na kusyɨlua palɨkɨmo nʉ mwene,
kuuti ndavʉle ʉKɨlɨsite vʉle alyasyʉsivue kuhʉma kʉ vafue mʉ ngʉfu imbaha isa Ngʉlʉve,
fye enendɨɨkɨ na jʉsue tʉvisaghe na mikalɨle amapia mʉ vwʉmi vwitu.
5 Lɨno,
ndavʉle tʉlyafwile palɨkɨmo nʉ Kɨlɨsite ye tukwofughua,
fye enendɨɨkɨ tuliiva palɨkɨmo nʉ mwene mʉlwa kusyʉsɨvua kuhʉma kʉ vafue ndavʉle ʉmwene.
6 Ʉsue tʉkagwile kuuti,
ʉlʉveelo lwitu ʉlʉkʉʉlʉ lʉlyakomelilue pa kɨkovekano palɨkɨmo nʉ Yesu,
kuuti ingʉfu isa vʉhosi nkate mʉlyʉsue sitipulue,
tʉleke kuuva vakami va vʉhosi,
7 ʉlwakʉva ʉmuunhu angafue enendɨɨkɨ,
iiva avɨkilue mwavʉke kuhʉma mʉ ngʉfu isa vʉhosi.
8 Lɨno,
ʉlwakʉva tʉlyafwile palɨkɨmo nʉ Kɨlɨsite,
tuhʉvɨɨla kuuti tulikukala palɨkɨmo nʉ mwene.
9 Ʉsue tʉkagwile kuuti,
ʉYesu Kɨlɨsite alyasyʉkile kuhʉma kʉ vafue,
naifua kange,
ʉvʉfue vʉsila ngʉfu kange kwa mwene.
10 Ye ifua,
alyafwɨliile ʉvʉhosi vwa vaanhu kamo keene.
Neke lɨno mwʉmi,
mʉ vwʉmi vwake ikukala mʉlwa kʉmhovosia ʉNgʉlʉve.
11 Na jʉmue muvonaghe kuuti mʉlɨ vafue mʉlwa kʉvomba ʉvʉhosi,
neke kwa Ngʉlʉve mʉlɨ vʉʉmi mwa Yesu Kɨlɨsite.
12 Lɨno,
namʉngalekaghe ʉvʉhosi kutema amavɨlɨ ghiinu ghano ghifua,
ʉlwakʉva vʉngateme vʉkʉvapelela kuvɨngɨlɨla ʉvʉnoghelua vwake ʉvʉviivi.
13 Namʉngafilekaghe ifilʉngo ifya mavɨlɨ ghiinu kuvomba ʉvʉhosi.
Looli mutavʉlaghe kwa Ngʉlʉve,
kuuti ifilʉngo ifya mavɨlɨ ghiinu fivombaghe isa vʉgholofu,
ʉlwakʉva ʉNgʉlʉve akavasyʉsisie na kʉkʉvingisia mʉ vwʉmi ʉvʉpia.
14 Lɨno,
ʉvʉhosi navʉngavateme kange,
ʉlwakʉva namulongosivua ni ndaghɨlo,
looli nʉ lʉsʉngʉ lwa Ngʉlʉve.
Avavɨngɨlɨli va Yesu vakami va kʉvomba isa vʉgholofu
15 Asi,
tʉʉti kɨki?
Tʉvombaghe inyɨvi ʉlwakʉva tʉlɨ mʉ lʉsʉngʉ lwa Ngʉlʉve,
natulongosivua ni ndaghɨlo?
Jeeje,
natʉngavombaghe ʉluo!
16 Mʉkagʉlaghe kuuti,
mʉngitavʉle kuuva vakami va jʉmonga na kʉkʉnkʉnda,
kyangʼhaani muuva vakami va muunhu ʉjuo jʉno mʉkʉnkʉnda.
Kwekʉti,
nave muvɨngɨlɨla ʉvʉhosi muuva vakami va vʉhosi,
ʉkuo kupelela ʉvʉfue.
Nave mʉkʉmʼbɨngɨlɨla ʉNgʉlʉve muuva vakami va Ngʉlʉve,
ʉkuo kupelela ʉvʉgholofu.
17 Ʉlʉtasi mʉlyale vakami va kʉvomba inyɨvi,
neke lɨno nɨkʉmhongesia ʉNgʉlʉve,
ʉlwakʉva mwʉpiile nʉ mwojo ghwoni imbʉlanɨsio sooni sino mʉpelilue.
18 Kange,
mʉpokilue kuhʉma mʉ vʉkami ʉvwa kʉvomba inyɨvi,
mʉvɨkilue kuuva vakami va kʉvomba isa vʉgholofu.
19 Nijova mʉ kɨhwanɨkɨsio ɨkya vʉkami,
ʉlwakʉva nakɨhʉʉgʉ ʉmue kukagʉla ɨmhola ɨjɨ.
Ndavʉle ʉlʉtasi vʉle mʉlyatavwile ifilʉngo ifya mavɨlɨ ghiinu kuvomba inyali ni nyɨvi mʉlwa kukala mʉ vʉhosi,
fye enendɨɨkɨ mʉtavʉlaghe ifilʉngo ifya mavɨlɨ ghiinu kuvomba isa vʉgholofu mʉlwa kukala mʉ vwɨmɨke.
20 Ye mʉlɨ vakami va kʉvomba inyɨvi,
namʉlyʉmɨlɨsivue kuvomba isa vʉgholofu.
21 Ifighono ifio mʉkavombagha imbombo sino ʉnsiki ʉghʉ muvona nya soni.
Lɨno,
vwɨmɨla imbombo isio mʉkavʉmbʉliile kɨki?
Ʉvʉsililo ʉvwa mbombo isio vwe vʉfue.
22 Neke lɨno ʉlwakʉva mʉvɨkilue vavʉke kuhʉma mʉ vʉkami ʉvwa kʉvomba inyɨvi na kuuva vakami va Ngʉlʉve,
mʉlɨ nʉ lʉvʉmbʉlɨlo.
Ʉlʉvʉmbʉlɨlo ʉluo kwe kʉvalasivua kuuva vɨmɨke na kukwingila kʉ vwʉmi ʉvwa kʉvʉsila kʉsila.
23 Nijova ʉluo,
ʉlwakʉva ʉmuunhu ghweni jʉno ivomba inyɨvi,
ʉlʉhombo lwake vwe vʉfue.
Neke ʉNgʉlʉve ɨkʉtʉpeela ʉvwʉmi ʉvwa kʉvʉsila kʉsila,
ʉluo nalʉhombo looli lʉvonolo kuhʉma kwa Ngʉlʉve mwa Mʉtwa ghwitu ʉYesu Kɨlɨsite.