Inyifuunyo vwɨmɨla ʉKɨlɨsite kʉkʉtʉsambania nʉ Ngʉlʉve
5
Lɨno,
ʉlwakʉva ʉNgʉlʉve atʉvaliile kuuva vagholofu vwɨmɨla ʉlwɨtɨko,
tʉlɨ nʉ lʉtengaano nʉ mwene vwɨmɨla ʉMʉtwa ghwitu ʉYesu Kɨlɨsite.
2 Vwɨmɨla kʉkʉmwɨtɨka ʉYesu Kɨlɨsite,
tukwʉpɨla ʉlʉsʉngʉ lwa Ngʉlʉve,
kange tʉjiighe tukukala mʉ lʉsʉngʉ ʉluo.
Mʉ ʉluo tʉlɨ nʉ lʉkeelo,
ʉlwakʉva tuhʉvɨɨla kuuti tuliiva palɨkɨmo nʉ Ngʉlʉve mʉ vʉvaha vwake.
3 Kange,
nambe pano tʉlɨ mʉ mhumuko,
tujigha nʉ lʉkeelo,
ʉlwakʉva tʉkagwile kuuti imhumuko sikʉtʉpeela ʉlugudo.
4 Ʉlugudo lʉkʉtʉpelela kukangala mʉ mwojo;
kukangala mʉ mwojo,
kʉkʉtʉpeela ʉlʉhʉvɨɨlo.
5 Ʉlʉhʉvɨɨlo ʉluo nalʉngatʉpelele tʉsʉʉke,
ʉlwakʉva tʉkagwile kuuti ʉNgʉlʉve atʉghanile fiijo.
Atʉpeliile ʉMhepo ʉMwɨmɨke jʉno amemisie ʉlʉghano lwa Ngʉlʉve mʉ moojo ghiitu.
6 Lolagha,
ye tʉjiighe tʉlɨ vasila lʉtango,
ʉYesu Kɨlɨsite alisile ʉnsiki ghʉno ʉNgʉlʉve alyataviike,
akafua vwɨmɨla ʉsue twe vahosi.
7 Kyangʼhaani,
lʉtalamu ʉmuunhu kukwɨtɨka kufua vwɨmɨla ʉmuunhu ʉmʉgholofu.
Pamo ndepoonu ʉmuunhu ikwɨtɨka kufua vwɨmɨla ʉmuunhu ʉnnofu.a
8 Neke ʉNgʉlʉve ahʉfisie kuuti atʉghanile fiijo,
ʉlwakʉva ʉsue ye tʉjiighe tʉlɨ vahosi,
akantavʉla ʉKɨlɨsite kuuti afue vwɨmɨla ʉsue.
9 Lɨno,
ʉlwakʉva tʉvalilue kuuva vagholofu vwɨmɨla ɨdanda ɨja Yesu,
kyangʼhaani vwɨmɨla ʉmwene ʉYesu tulipokua mʉ vʉhɨghi vwa Ngʉlʉve.
10 Kwekʉti,
ye tʉjiighe valʉgʉ nʉ Ngʉlʉve,
akatʉsambania nʉ mwene vwɨmɨla kufua kwa Mwanaake.
Lɨno,
nave alyatʉsambinie nʉ mwene,
kyangʼhaani tulipokua mʉ vʉhɨghi vwa Ngʉlʉve,
ʉlwakʉva ʉYesu mwʉmi.
11 Nakwekʉti mʉ ʉluo lwene,
looli palɨkɨmo na kuuva nʉ lʉkeelo mʉ sino ʉNgʉlʉve atʉvombiile vwɨmɨla ʉMʉtwa ghwitu ʉYesu Kɨlɨsite jʉno atʉsambinie nʉ mwene.
ɄAdamu aletile ʉvʉfue, ʉYesu aletile ʉvwʉmi
12 Lɨno,
vwɨmɨla ʉmuunhu jʉmo ʉAdamu,
ʉvʉhosi vʉlingiile mʉ ɨɨsi.
Ʉvʉhosi ʉvuo vʉkapelela ʉvʉfue.
Mʉ ʉluo avaanhu vooni vifua,
ʉlwakʉva vooni vahosi.
13 ɄMoose ye akyale kupelua indaghɨlo,
ʉvʉhosi kwevʉlyale mʉ ɨɨsi.
Neke ʉvʉhosi navʉkavalɨlwagha kuuva vʉhosi,
ʉlwakʉva kʉlyale kʉsila ndaghɨlo.
14 Kuhʉma ʉAdamu kuhanga kufika ʉMoose,
ʉvʉfue kwevʉlyale nambe kʉ vaanhu vano navalyavombile ʉvʉhosi ʉvwa kʉdeenya indaghɨlo ndavʉle ʉAdamu.
ɄAdamu alyale kɨhwani kya Kɨlɨsite jʉno alisile pambele.
15 Neke ʉlʉsʉngʉ lwa Ngʉlʉve lʉkome fiijo,
nalʉlɨngʼhiine nʉ vʉhosi vwa Adamu!
Ʉlwakʉva ʉvʉhosi ʉvwa muunhu jʉmo ʉAdamu,
vʉlyapeleliile avaanhu vinga kufua.
Neke vwɨmɨla ʉlʉsʉngʉ lwa Ngʉlʉve kukilila ʉmuunhu jʉmo ʉYesu Kɨlɨsite,
avaanhu vinga vipyanɨlua ʉvʉhosi vwave.
16 Kange,
sino sihʉma kwa Ngʉlʉve vwɨmɨla ʉlʉsʉngʉ lwake,
nasilɨngʼhiine na sino sihʉma vwɨmɨla ʉvʉhosi vwa Adamu.
Ʉlwakʉva ʉvʉhosi vwa muunhu jʉmo ʉAdamu,
vʉkapelela avaanhu vinga kuhɨghua kuuti vahosi.
Neke ʉvʉhosi ye vwongeliile mʉ ɨɨsi,
ʉNgʉlʉve akahʉfia ʉlʉsʉngʉ lwake mʉlwa kʉvavalɨla avaanhu kuuva vagholofu.
17 Ʉvʉhosi vwa muunhu jʉmo ʉAdamu,
vʉlyapeleliile ʉvʉfue vʉteme avaanhu vooni.
Neke kyangʼhaani avaanhu vano vikwʉpɨla ʉlʉsʉngʉ lwa Ngʉlʉve na kuvalɨlua kuuva vagholofu,
vilitema kʉ vwʉmi ʉvwa kʉvʉsila kʉsila vwɨmɨla ʉmuunhu jʉmo ʉYesu Kɨlɨsite.
18 Lɨno,
ndavʉle ʉnkole ghwa muunhu jʉmo vʉle ghʉlyapeleliile avaanhu vooni vahɨghue kuuti vahosi,
fye enendɨɨkɨ ʉmuunhu jʉmo kuvomba isa vʉgholofu kʉpeleliile avaanhu vooni kuvalɨlua kuuva vagholofu na kukava ʉvwʉmi.
19 Kange,
ndavʉle ʉmuunhu jʉmo jʉno naalyankʉndile ʉNgʉlʉve,
akapelela avaanhu vinga kuuva vahosi,
fye enendɨɨkɨ ʉmuunhu jʉmo jʉno alyankʉndile ʉNgʉlʉve ilikʉvapelela avaanhu vinga vavalɨlue kuuva vagholofu.
20 Indaghɨlo sa Moose ye siletilue,
sikapelela ʉvʉhosi vwongelele.
Neke ʉvʉhosi ye vwongeliile,
ʉlʉsʉngʉ lwa Ngʉlʉve lʉkongelela fiijo.
21 Ʉlʉsʉngʉ lʉkongelela kuuti,
ndavʉle ʉvʉhosi vʉle vʉlyatemile avaanhu na kuleeta ʉvʉfue,
fye enendɨɨkɨ ʉlʉsʉngʉ lwa Ngʉlʉve lʉteme vwɨmɨla kʉkʉvavalɨla avaanhu kuuva vagholofu kuhanga kufika kʉ vwʉmi ʉvwa kʉvʉsila kʉsila.
Ʉluo luvombeka vwɨmɨla kʉkʉmwɨtɨka ʉYesu Kɨlɨsite,
ʉMʉtwa ghwitu.