ɄAbulahamu alyavalilue kuuva mʉgholofu vwɨmɨla ʉlwɨtɨko
4
Lɨno,
mʉlwa kʉvalɨlua ʉvʉgholofu,
tʉʉti kɨki vwɨmɨla ʉnkʉʉlʉ ghwitu ʉAbulahamu?a
2 Nave tʉʉti ʉAbulahamu alyavalilue kuuva mʉgholofu vwɨmɨla amaghendele ghaake amanofu,
ale iiva nɨ kya kughinia.
Neke naale ikughinia pamaaso gha Ngʉlʉve,
3 ʉlwakʉva aMalembe aMɨmɨke ghiiti,
“ɄAbulahamu alyamwɨtiike ʉNgʉlʉve,
mʉ ʉluo akavalɨlua kuuva mʉgholofu.”b
4 Ʉmuunhu angavombe ɨmbombo,
ʉlʉhombo lwake naluuva lʉvonolo,
looli kiiva kɨɨnu kɨno anoghiile kuhombua.
5 Neke ʉmuunhu jʉno naihʉvɨɨla amaghendele ghaake kuvalɨlua kuuva mʉgholofu,
neke ɨkʉmwɨtɨka ʉNgʉlʉve jʉno ɨkʉvavalɨla avahosi kuuva vagholofu,
ʉmuunhu ʉjuo ivalɨlua kuuva mʉgholofu vwɨmɨla ʉlwɨtɨko lwake.
6 Najʉ ntwa ʉDavɨdi alyajovile ʉluo,
vwɨmɨla inyifuunyo sino ʉNgʉlʉve ɨkʉmpeela ʉmuunhu,
jʉno amʼbaliile kuuva mʉgholofu kɨsila kwɨmɨla amaghendele ghaake ʉmuunhu ʉjuo,
7 “Vafunyilue vano ʉNgʉlʉve avapyaniile ʉvʉhosi vwave,
na kʉkʉvavalasia inyɨvi saave.
8 Afunyilue ʉmuunhu
jʉno ʉMʉtwa ʉNgʉlʉve naɨkʉmʼbalɨla kuuva mhosi.”c
9 Inyifuunyo isi navifunyua va vano vavombilue ɨkɨvʉngo ɨkya kʉdumula ɨngola ɨja kɨdɨɨmi,
looli vifunyua na vano navavombilue ɨkɨvʉngo ɨkio,
ndavʉle tʉjovile kuuti,
ʉAbulahamu alyavalilue kuuva mʉgholofu vwɨmɨla ʉlwɨtɨko lwake.d
10 Lɨno nɨkʉvavʉʉla kuuti,
ʉAbulahamu ye ivalɨlua kuuva mʉgholofu alyakyale kuvombelua ɨkɨvʉngo ɨkya kʉdumulua ɨngola ɨja kɨdɨɨmi.
Pambele akavombelua ɨkɨvʉngo ɨkio.
11 Kuvombelua ɨkɨvʉngo kyale kye kɨvalɨlo kya kʉvonia kuuti,
ʉNgʉlʉve amʼbaliile ʉAbulahamu kuuva mʉgholofu vwɨmɨla ʉlwɨtɨko lwake.
Ʉlwɨtɨko ʉluo alyale nalwo ye akyale kuvombelua ɨkɨvʉngo ɨkio.
Mʉ ʉluo ʉAbulahamu akava nhaata ghwa vaanhu vooni vano vikʉmwɨtɨka ʉNgʉlʉve,
na kuvalɨlua kuuva vagholofu,
napano navavombilue ɨkɨvʉngo ɨkio.
12 Kange,
akava nhaata ghwa vano vavombilue ɨkɨvʉngo ɨkio,
nakwekʉti ʉlwakʉva vavombilue ɨkɨvʉngo ɨkio,
looli ʉlwakʉva vikʉmwɨtɨka ʉNgʉlʉve ndavʉle ʉAbulahamu jʉjuo vʉle alyamwɨtiike ye akyale kuvombelua ɨkɨvʉngo.
Sino alaghile ʉNgʉlʉve sikwʉpɨlua vwɨmɨla ʉlwɨtɨko
13 ɄNgʉlʉve alyamʉlaghile ʉAbulahamu nɨ kɨsina kyake kuuti ilikʉvapeela ɨɨsi jooni kuuva vʉhaasi vwave.e
Nakwekʉti ʉNgʉlʉve alyamʉlaghile ʉluo ʉAbulahamu ʉlwakʉva alyale ivɨngɨlɨla indaghɨlo,
looli ʉlwakʉva alyale ɨkʉmwɨtɨka ʉNgʉlʉve.
Mʉ ʉluo,
ʉNgʉlʉve akamʼbalɨla ʉAbulahamu kuuva mʉgholofu.
14 Nave vano vivɨngɨlɨla indaghɨlo ve vano vilikwʉpɨla sino alaghile ʉNgʉlʉve,
kwekʉti kʉkʉmwɨtɨka ʉNgʉlʉve kʉsila lʉvʉmbʉlɨlo,
na sino alaghile ʉNgʉlʉve pe sa vʉdesi.
15 Ʉlwakʉva kudeenya indaghɨlo kupelela avaanhu kuhɨghua.
Neke nave kʉsila ndaghɨlo,
kudeenya indaghɨlo nakwekʉle.
16 Lɨno,
sino alaghile ʉNgʉlʉve sikwʉpɨlua vwɨmɨla kʉkʉmwɨtɨka ʉmwene na kuhʉvɨɨla ʉlʉsʉngʉ lwake.
Ʉluo naluuva kʉ vano vivɨngɨlɨla indaghɨlo veene,
looli kʉ vooni vano vikʉmwɨtɨka ʉNgʉlʉve ndavʉle ʉAbulahamu.
ɄAbulahamu ghwe nhaata ghwitu tweni vwɨmɨla ʉlwɨtɨko.
17 Isio se sino silembilue mʉ Malembe aMɨmɨke kuuti,
“Nɨkʉvɨkile kuuva nhaata ghwa fisina finga.”f
Sino silyalaghilue silyale nofu pamaaso gha Ngʉlʉve jʉno ʉAbulahamu alyamwɨtiike,
ʉNgʉlʉve jʉno isyʉsia avaanhu kuhʉma kʉ vafue na kupela ifiinu fino nakwefilyale kuuti kwefivisaghe.
18 ɄAbulahamu ye avʉlilue kuuti,
“Ɨkɨsina kyako kiliiva na vaanhu vinga hwene nhondue,”g
alyɨtiike na kuhʉvɨɨla ɨmhola ɨjio jɨno jɨlyale nhalamu kukwɨtɨka.
Mʉ ʉluo akava nhaata ghwa fisina finga.
19 ɄAbulahamu alyale na maaka kɨlʉndo ndɨɨkɨ.
Napano alyakagwile kuuti aghosiipe,
naghʉ mʼbɨlɨ ghwake ghʉlyale nsila ngʉfu,
kange ʉnʼdala ghwake ʉSala alyale mʉghʉmba,
naalyale ni nganighani mʉ lwɨtɨko lwake,
akajigha ifikʉmhʉvɨɨla ʉNgʉlʉve.
20 Kange,
naalyale ni nganighani vwɨmɨla sino alaghile ʉNgʉlʉve,
ʉlwene akaghina kʉkʉmwɨtɨka,
akamʉghinia ʉmwene.
21 Alyavombile ʉluo,
ʉlwakʉva alyakagwile kyangʼhaani kuuti,
ʉNgʉlʉve sooni sino alaghile ivomba,
22 mʉ ʉluo,
“ɄNgʉlʉve alyamʼbaliile kuuva mʉgholofu.”h
23 Neke amasio aghuo ghano ghiiti,
“ɄNgʉlʉve alyamʼbaliile kuuva mʉgholofu,”
naghalyalembilue vwɨmɨla ʉAbulahamu mwene.
24 Looli amasio aghuo ghalyalembilue vwɨmɨla na jʉsue twe vano ʉNgʉlʉve ɨkʉtʉvalɨla kuuva vagholofu,
twe vano tʉkʉmwɨtɨka ʉmwene jʉno alyansyʉsisie ʉMʉtwa ghwitu ʉYesu kuhʉma kʉ vafue.
25 ɄNgʉlʉve alyantavwile ʉYesu kuuti abudue vwɨmɨla ʉvʉhosi vwitu,
kange alyansyʉsisie kuhʉma kʉvʉlʉngʉi kuuti tʉvalɨlue kuuva vagholofu.