ɄNgʉlʉve ghwa kyangʼhaani
3
Lɨno,
ʉMʉyahudi alɨ nɨ kɨɨnu kɨki kukila avange?
Nambe kuvombelua ɨkɨvʉngo ɨkya kʉdumulua ɨngola ɨja kɨdɨɨmi kʉlɨ lʉvʉmbʉlɨlo lʉki?
2 Kuuva Mʉyahudi kʉlɨ lʉvʉmbʉlɨlo lʉno lʉlɨ papinga.
Ʉlʉvʉmbʉlɨlo ʉlwa kwanda mʉ sooni lwe ʉlʉ,
ʉNgʉlʉve alyavapeliile aVayahudi ɨlɨsio lyake.
3 Neke aVayahudi vamonga navalyale vikwɨtɨka.
Lɨno mʉ ʉluo,
ʉNgʉlʉve ndepoonu ivʉhɨɨla kuvomba sino alyavalaghile?
4 Jeeje,
ʉNgʉlʉve ghwa kyangʼhaani,
nambe avaanhu vooni vadesi.
Ndavʉle lɨlembilue mʉ Malembe aMɨmɨke kuuti,
“Pano ghʉkʉvavʉʉla avaanhu ʉvʉhosi vwave,
amasio ghaako gha kyangʼhaani.
Pano ghʉkʉvahɨgha,
ʉvʉhɨghi vwako vwa kyangʼhaani.”a
5 Lɨno,
nave ʉvʉhosi vwitu vutanga kuhʉfia vʉle ʉNgʉlʉve ghwa kyangʼhaani,
pe tʉʉti kɨki?
Pe tʉʉti ʉNgʉlʉve pano ɨkʉtʉkopa,
naivomba mʉ vwakyangʼhaani?
Aghuo nijova masaaghe ghiitu twe vaanhu.
6 Amasaaghe aghuo naghegheene,
ʉlwakʉva lwale lʉʉve enendɨɨkɨ,
pe ndaani kange ʉNgʉlʉve ihɨgha avaanhu?
7 Ʉmuunhu ndepoonu iiti,
“Nave ʉvʉsyangi vwango vutanga kuhʉfia vʉle ʉNgʉlʉve ghwa kyangʼhaani na kʉkʉmpelela aghinwaghe fiijo,
lwandaani kange ɨkʉhɨgha kuuti nɨlɨ mhosi?”
8 Nave fye lʉlɨvuo,
kwekʉti,
“Tʉvombaghe inyɨvi neke twʉpɨle inofu”?
Avaanhu vamonga vikʉtʉdesela viiti na jʉsue fye tuvʉlanɨsia.
Avaanhu avuo vilihɨghua na kukwʉpɨla ʉlʉpumuko kulɨngʼhana nʉ vʉhosi vwave.
Avaanhu vooni vahosi
9 Lɨno tʉʉti kɨki?
Asi,
ʉsue twe Vayahudi tʉnoghiile kukila avaanhu vano naVayahudi?
Jeeje!
Ndavʉle nɨtalile kʉkʉvavʉʉla kuuti,
aVayahudi na vano naVayahudi vooni vahosi,
ʉlwakʉva valɨ mʉ vʉkamɨngʼhanɨlua vwa kʉvomba inyɨvi.
10 Ndavʉle lɨlembilue mʉ Malembe aMɨmɨke kuuti,
“Nakwale ʉmuunhu jʉno mʉgholofu,
nakwale nambe jʉmo.
11 Nakwale ʉmuunhu ʉnya vʉkagʉsi,
nambe jʉno ilonda kʉkʉnkagʉla ʉNgʉlʉve.
12 Avaanhu vooni vamʉlekile ʉNgʉlʉve,
navanoghiile pamaaso ghaake.
Nakwale jʉno ivomba inofu,
nakwale nambe jʉmo!”b
13 “Amasio ghaave ghibuda avaanhu,c
imili saave simemile ʉvʉdesi.”d
“Mʉ malomo ghaave ghihʉma amasio ghano ghalɨ nɨ sumu,
ɨsumu ndavʉle ɨja njoka.”e
14 “Amalomo ghaave ghamemile amasio agha kʉghuna
na kuvafia.”f
15 “Amaghʉlʉ ghaave mapyafu kulʉta kubuda.
16 Kwoni kʉno vilʉta,
ɨmbombo jaave kunangania
na kupumusia avaanhu.
17 Navisaagha kuleeta ʉlʉtengaano.”g
18 “Navikʉmwoghopa ʉNgʉlʉve nambe padebe!”h
19 Lɨno,
tʉkagwile kuuti sooni sino sili mʉ Malembe aMɨmɨke,
silembilue vwɨmɨla vano vapelilue aMalembe aghuo,
kuuti valeke kuuva nɨ kɨteghe ɨkya kʉti vasila nkole.
Kange,
ghihʉfia kuuti avaanhu vooni vahosi,
vanoghiile kuhɨghua nʉ Ngʉlʉve.
20 Mʉ ʉluo nakwale ʉmuunhu jʉno ivalɨlua kuuva mʉgholofu pamaaso gha Ngʉlʉve vwɨmɨla kuvɨngɨlɨla indaghɨlo.
Looli indaghɨlo sikʉntanga ʉmuunhu kukagʉla kuuti avombile inyɨvi.
Ʉmuunhu iiva mʉgholofu vwɨmɨla ʉlwɨtɨko
21 Neke lɨno ʉNgʉlʉve ahʉfisie ɨsɨla ɨja kʉmʼbalɨla ʉmuunhu kuuva mʉgholofu,
kɨsila kwɨmɨla indaghɨlo.
Indaghɨlo sa Moose na malembe agha vavɨli ghikwoleka ʉluo.
22 ɄNgʉlʉve ɨkʉvavalɨla avaanhu kuuva vagholofu vwɨmɨla kʉkʉmwɨtɨka ʉYesu Kɨlɨsite.
Ivomba ʉluo kʉ vaanhu vooni,
naisalʉla muunhu,
23 ʉlwakʉva avaanhu vooni vahosi,
kange amaghendele ghaave naghihʉfia ʉvʉvaha vwa Ngʉlʉve.
24 Neke ʉNgʉlʉve mʉ lʉsʉngʉ lwake,
ɨkʉvavalɨla vʉvʉle avaanhu kuuva vagholofu pamaaso ghaake.
Avombile ʉluo mʉlwa kʉtʉvanga vwɨmɨla ʉYesu Kɨlɨsite.
25-26 ɄNgʉlʉve alyantavwile ʉYesu aave lɨtekelo lya kʉvasambania avaanhu nʉ mwene,
neke avaanhu vano vikwɨtɨka kuuti ʉYesu alyafwile vwɨmɨla aveene,
vapyanɨlue inyɨvi saave.
Ɨlɨtekelo ɨlio livonia kuuti ʉNgʉlʉve ghwa kyangʼhaani.
Kange livonia kuuti,
mʼbʉkʉʉlʉ aligudile naakavatipula avahosi ʉlwakʉva alyale ighuula amasiki agha.
Alyavombile ʉluo kuuti ahʉfie ʉvwakyangʼhaani vwake,
ʉlwakʉva ʉmwene ghwa kyangʼhaani,
aave ghwe nya kʉmʼbalɨla ʉvʉgholofu ʉmuunhu jʉno ɨkʉmwɨtɨka ʉYesu.
27 Lɨno,
natʉngighinie nambe padebe,
ʉlwakʉva ʉNgʉlʉve naɨkʉtʉvalɨla kuuti tʉlɨ vagholofu vwɨmɨla kuvɨngɨlɨla indaghɨlo sa Moose,
looli vwɨmɨla kʉkʉmwɨtɨka ʉYesu Kɨlɨsite.
28 Kwekʉti,
ʉNgʉlʉve ɨkʉmʼbalɨla ʉmuunhu kuuva mʉgholofu vwɨmɨla kʉkʉmwɨtɨka ʉYesu,
nakwekʉti vwɨmɨla kuvɨngɨlɨla indaghɨlo isio.
29 Asi,
ʉNgʉlʉve,
Ngʉlʉve ghwa Vayahudi veene?
Kwekʉti avaanhu vano naVayahudi naNgʉlʉve ghwave?
Kyangʼhaani,
ʉNgʉlʉve,
Ngʉlʉve ghwa vaanhu vooni,
30 ʉlwakʉva ʉNgʉlʉve alɨ jʉmo mwene.
Ʉmwene ɨkʉvavalɨla avaanhu vooni aVayahudi na vano naVayahudi kuuva vagholofu pamaaso ghaake,
ɨkʉvʉpɨla vooni kuuva vagholofu vwɨmɨla kʉkʉmwɨtɨka ʉYesu Kɨlɨsite.
31 Mʉ ʉluo,
pano tusimilisia kuvalɨlua ʉvʉgholofu vwɨmɨla kʉkʉmwɨtɨka ʉYesu,
kwekʉti indaghɨlo sila lʉvʉmbʉlɨlo?
Jeeje,
ʉlwene tuuva tukangasia sino sijovua mʉ ndaghɨlo.